Imama 6

1 # Pod. 5:5-8 Ondae i Ue mepau ndi Musa, 2”Tewala asa mia moweweu hala ka melelu nahi petenunu ndi Ondae i Ue kai pompopo'oo pe'asa miano mongkona sangka anu pine'ala-alaako ndi onae, ke pinepenaa ndi onaeke anu rinontuno; ke tewala onae momporo'i mpe'asa miano, 3ke mohawe sangka anu tetadi, sine mehapu kai pesumpa megaupi mongkona hapamokoa wineweuno asa mia ranta kai tehala, 4tewala kanandio ipoweweu hala ka isaala, asalakono ipokuleo sangka anu umari rinontuno ke anu pinoro'ino ke anu pine'ala-alaako ndi onaeke sangka tetadi anu hinaweno atuu, 5ke luwuakoano anu hinapuno ka ipesumpa megaupi. Asalakono i'owahio euno buke saru metiangi asantia olima ka ipeweengakono ia ueno a oleo ipompesombaako pesomba pontolosi saalano. 6Gagi pesomba pontolosi saala, asalakono ipompesombaako ndi Ondae i Ue asa bimba lakino anu nahina tataano inso a asa bawaa bembe bimba anu pinonaako olino, gagi pesomba pontolosi saala kai peweengakono ndi sando mpesomba. 7Sando mpesomba asalakono moweweu pesintuwua tiano mia atuu i aro-Do i Ue, ka onae ta montarima te'onini halano a maupo hapa wineweuno ranta kai saala.”

Pesomba tinunu

6:8-13

8Ondae i Ue mepau ndi Musa, 9”Parentaomo i Haruni ka luwuno anano: Ndiomo songka mongkona pesomba tinunu. Pesomba tinunu atuu asalakono mo'ia mpiha a wawo api i wawono meda pontunua pesomba, asa wongi hawe mo'oru ka api a meda pontunua pesomba asalakono dinagai kai melanga mpiha i wawono. 10Sando mpesomba asalakono mompokona sangka lena ka mesaluara lena anu tumutuwio anuno. Asalakono itandeo awu anu i wawono meda pontunua pesomba umarino pesomba tinunu pingko ikaano api, ka inaao i horino meda pontunua pesomba. 11Ka i'amba lumohuo sangkano ka ipompokona sangka susua ka i wawao awu atuu i bungkuno pekemaa i asa po'ianga anu morina. 12Api i wawono meda pontunua pesomba asalakono dinagai kai melanga mpiha, si pino'inee kai mate. Sompo mo'oru asalakono sando mpesomba monaa keu a wawo meda pontunua pesomba, mo'atora pesomba tinunu i wawono ka tumunuo luwuno tabano pesomba tekaduduia i ra'ai. 13Api a wawo meda pontunua pesomba asalakono dinagai kai melanga mpiha, kasi mansa mate.”

Pesomba kaanga

6:14-23

14”Ndiomo songka mongkona pesomba kaanga. Luwuno anano i Haruni asalakono mewawao i aro-Do i Ue i arono meda pontunua pesomba. 15Asalakono sando mpesomba monsiao inso a mpesomba kaanga atuu asa raku tarigu moiko ntu'u ka lana, saru luwuno dupa anu i wawono pesomba kaanga atuu, ka i'amba tumunuo i wawono meda pontunua pesomba, ranta woono mompoko mawongko gagi tiano pepopoto'ori ndi Ondae i Ue. 16Toreano asalakono ikaano i Haruni saru luwuno anano, kinaa kana roti nahi peragi i asa po'ianga anu mempori. Asalakono domengkaano i kintalano Kema Tepotowoa. 17Anu tiano atuu si tinunu saru ragi. Kuweeako iramo gagi tiado inso a luwuno pesomba ndi Ongkue anu tinunuako api. Onaemo tiano tedoa mempori, mengkena kana pesomba po'onini hala ka pesomba po'onini saala. 18Sompo tama i olono anano i Haruni, asalakono mengkaano. Onaemo asa pompakosi ndi omiu ranta inulemiu anu nahina tampulaano. Onaemo atuu tiamiu inso a luwuno pesomba ndi Ongkue anu tinunuako api. Sompo mia anu tepodanggi saru luwuno pesomba atuu gagi mempori.”

19Ondae i Ue mepau ndi Musa, 20”Ndiomo pesomba anu asalakono ipesombaakono i Haruni saru luwuno anano ndi Ondae i Ue a oleo i'inurapi: asantia hopulu efa tarigu moiko ntu'u gagi pesomba kaanga anu wineweu mpiha, entongano i tempono mo'oru ka entongano i tempono ngkiniwia. 21Asalakono pesomba atuu sinaloako lana i wawono poraramia. Mansano tesalo asalakono kau wawaomo gagi pesomba kaanga ka mesombaakono luwuno batuno anu tinunu atuu gagi woo anu mokomawongkoo i aro-Do i Ue. 22Sando mpesomba inso i olono luwuno anano anu inurapi gagi euno, asalakono sumaloo. Onaemo asa pompakosi anu nahina tampulaano. Luwuno asalakono tinunu gagi pesomba ndi Ondae i Ue. 23Sompo pesomba kaanga inso a asa sando mpesomba asalakono luwuno tinunu, nahi moiko ikinaa.”

Pesomba po'onini hala

6:24-30

24Mepau Ira i Ue ndi Musa, 25”Pauakono i Haruni saru luwuno anano: Ndiomo songka mogkona pesomba po'onini hala. A mpo'ianga ponsumbelea pesomba tinunu, asalakono i tu'aimo isinumbele pesomba po'onini hala i aro-Do i Ue. Onaemo pesomba tedoa mempori. 26Sando mpesomba anu mesombaakono pesomba po'onini hala atuu, onaemo anu kumaano. Asalakono pesomba atuu ikaano i asa po'ianga mempori, a kintalano Kema Tepotowoa 27Sompo mia anu tepodanggi saru bau mpesomba atuu, gagi mempori. Tewala hinao reano anu tetawisi a sangka, asalakono imewo'ohio sangka atuu i asa po'ianga anu mempori. 28Kuro wita nahuano pesomba atuu asalakono pineha. Tewala pesomba atuu ninahu a ngkuro mala, asalakono kuro atuu hinahi ka wino'ohiako uwoi. 29Sompo tama i olono luwuno sando mpesomba asalakono mengkaano. Onaemo pesomba tedoa mempori. 30Sine sompo pesomba po'onini hala anu asantia reano winawa a Ngkema Tepotowoa kai wineweu pesintuwua a mpo'ianga mempori, si kinaa, tendeano tinunu luwu kai pingko ikaano api.”

Currently Selected:

Imama 6: XMZ

Highlight

Compare

Copy