Imama 3
3
Pesomba tekaduduia
3:1-17
1”Tewala pesombano onaemo pesomba tekaduduia ka anu pinesombaakono atuu sapi, lakino ke waino, asalakono ipesombaakono anu nahina tataano i aro-Do i Ue. 2Asalakono inaao kaeno a wawo uluno pesomba atuu, ka isumbeleo i arono pewowa Kema Tepotowoa. Ka i'amba luwuno anano i Haruni, sando pesomba atuudo asalakono mesiwuiakono reano liimbu a meda pontunua pesomba. 3Inso a mpesomba tekaduduia atuu asalakono ipesombaakono taba anu walungio ihi kompo ka luwuno taba anu metako a ihi kompo atuu gagi pesomba ndi Ondae i Ue anu tinunuako api, 4saru orua wua horino ka tabano anu metako i horino ka taba anu umapiio ate umpeda wua horino atuu asalakono iponsiao. 5Luwuno anano i Haruni asalakono mentunuo i wawono meda pontunua pesomba, i wawono pesomba tinunu anu kontongaano tinunu i wawono api, gagi pesomba tinunuako api anu woono mokomawongkoo aroa-Do i Ue.
6Tewala pesombano ndi Ondae i Ue, pesomba tekaduduia onaemo asa bawaa bembe bimba, lakino ke waino, asalakono ipesombaakono anu nahina tataano. 7Tewala ipesombaakono asa bimba gagi pesombano, asalakono iwawao i aro-Do i Ue. 8Asalakono inaao kaeno a wawo uluno pesombano atuu ka isumbeleo i arono Kema Tepotowoa. Ka i'amba luwuno anano i Haruni asalakono domensiwuiakono reano liimbu meda pontunua pesomba. 9Inso a mpesomba tekaduduia atuu, gagi pesomba ndi Ondae i Ue anu tinunuako api, asalakono ipesombaakono tabano, luwuno ikino anu mentaba asalakono tinotopi umpeda wuku ntorukuno, ka taba anu walungio ihi kompo, saru luwuno taba anu metako a ihi kompo atuu, 10saru orua wua hori ka taba anu metako i horino ka taba anu umapiio ate umpeda wua hori atuu asalakono iponsiao. 11Asalakono itunuo sando mpesomba i wawono meda pontunua pesomba gagi kaanga, asa pesomba ndi Ondae i Ue anu tinunuako api.
12Tewala pesombano asa bembe, asalakono iwawao i arodo i Ue. 13Asalakono inaao kaeno a wawo uluno bembe atuu ka isumbeleo i arono Kema Tepotowoa. Ka i'amba luwuno anano i Haruni asalakono domesinwuiakono reano liimbu a meda pontunua pesomba. 14Inso a hapa anu ipesombaako atuu, gagi pesomba ndi Ondae i Ue anu tinunuako api, asalakono ipesombaakono taba anu walungio ihi kompo ka luwuno taba anu metako a ihi kompo atuu, 15saru mbo'u orua wua hori ka taba anu metako ndi onae anu mo'ia i horino ka taba anu umapiio ate umpeda wua hori atuu anu asalakono iponsiao. 16Luwuno atuu asalakono itunuo sando mpesomba i wawono meda pontunua pesomba gagi kaanga kana pesomba tinunuako api gagi woo anu mompokomawongko. Luwuno taba onaemo tia-Do i Ue.
17Ndiomo aasa pompakosi mpiha ndi omiu hawe a inulemiu i sompo po'iangamiu: osi'i ntu'u imengkaano taba ka rea.”
Currently Selected:
Imama 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
