Imama 12

Pepokomorina umari me'ana

12:1-8

1Ondae i Ue mepau ndi Musa, kanandio, 2”Pauako ira to Isaraeli: Tewala asa beine me'ana ka ipe'anaako ana ntama, onae gagi mokoburu opitu oleo tehineno, mengkena mokoburuno kana beine i aluo wulano. 3#Teg. 17:12; Luk. 2:21A oleo anu ko'oalu, asalakono tinindiomo nana'ote atuu. 4Umarino atuu tolu pulu ka otolu oleo beine atuu asalakono sumikorio morinaano inso a reano umari me'ana. Onae nahi moiko ipodanggi hapamokoa anu mempori ka nahi moiko ipewinso a mpo'ianga mempori, hawe kai sompo luwuno oleo pepokomorinaano. 5Sine tewala onae me'anaako beine, onae gagi mokoburu orua minggu tehineno mengkena kana tempono beine i aluo wulano. Umarino atuu nomo pulu oleo tehineno onae asalakono sumikorio morinaano inso a rea umarino me'ana. 6Tewala sompoomo tempono pepokomorinaano, onae asalakono mowawaakono ana ntama ke beine asa bimba me'umuru asa nta'u gagi pesomba tinunu ka asa anano manu-manu marapati ke manu-manu wurokou gagi pesomba po'onini hala a mpewowano Kema Tepotowoa ndi sando mpesomba. 7Sando mpesomba atuu asalakono mesombaakono i aro-Do i Ue ka moweweu pesintuwua tiano beine atuu. Kanatuumo beine atuu ipinokomorina inso a peluarakoano rea. Onaemo songka mongkona beine anu umari me'anaako tama ke beine. 8#Luk. 2:24Sine tewala nahi polio mompatinda asa bimba, asalakono i'alao orua manu-manu wurokou ke orua anano manu-manu marapati, anu asa gagi pesomba tinunu ka anu asa mbo'u gagi pesomba po'onini hala. Sando mpesomba atuu asalakono moweweu pesintuwua tiano beine atuu, ka morinaomo.”

Currently Selected:

Imama 12: XMZ

Highlight

Compare

Copy