Imama 1
1
Pesomba tinunu
1:1-17
1Ondae i Ue moboio i Musa ka Dopepau inso a laro Kema Tepotowoa, 2”Pepaumo a nto Isaraeli ka pauako ira: Tewala asa mia inso i olomu ta mompowe pesombano ndi Ondae i Ue, asalakono pesomba anu komiu mpesombaakono atuu inso a mpinotuwu, ke sapi ke asa bawaa bembe bimba.
3Tewala pesombano anu tinunu inso a nsapi, asalakono ipesombaakono anu lakino ka nahina tataano. Asalakono iwawao a mpewowano Kema Tepotowoa, kai moiko i aro-Do i Ue. 4Ka i'amba numaao kaeno a wawo uluno pesomba tinunu atuu, ranta pesomba atuu, pinemoiko wineweu pesintuwua ndi onae. 5Ka i'amba onae asalakono sumumbeleo sapi atuu i aro-Do i Ue. Ka i'amba luwuno anano i Haruni, luwuno sando mpesomba atuu, asalakono mpesombaakono reano sapi atuu ka domensiwuiakono liimbu a meda pontunua pesomba, i arono pewowano Kema Tepotowoa. 6Umarino atuu asalakono ikulisio pesomba tinunu atuu kai batu-batuo montonda tiano. 7Luwuno anano sando mpesomba i Haruni asalakono mponaa api i wawono meda pontunua pesomba ka mpotudao keu i wawono api atuu. 8Luwuno anano i Haruni, luwuno sando mpesomba atuu asalakono me'atorao luwuno batuno pesomba atuu, saru uluno ka tabano i wawono keu anu kontongaano melanga i wawono meda pontunua pesomba. 9Ihi kompono ka witino asalakono wino'ohiako uwoi ka sando mpesomba tumunuo luwu i wawono meda pontunua pesomba, gagi pesomba tinunu anu woono mokomawongkoo aroa-Do i Ue.
10Tewala pesombano anu tinunu inso a asa bawaa bembe bimba, moiko atuu bembe ke bimba, asalakono ipesombaakono anu lakino ka nahina tataano. 11Asalakono isumbeleo i apano meda pontunua pesomba te'alaako i utara i aro-Do i Ue, ka i'amba luwuno anano i Haruni, luwuno sando mpesomba atuu mensiwuiakono reano liimbu a meda pontunua pesomba. 12Ka i'amba sumampao montonda tiano, saru uluno ka tabano, luwuno i'atorao sando mpesomba i wawono keu anu kontongaano melanga i wawono meda pontunua pesomba. 13Ihi kompono ka witino asalakono wino'ohiako uwoi. Luwuno dompesombaakono sando mpesomba ka tinunu i wawono meda pontunua pesomba. Onaemo pesomba tinunu, pesomba tinunuako api anu woono mokomawongkoo aroa-Do i Ue.
14Tewala pesombano ndi Ondae i Ue onaemo pesomba tinunu inso a manu-manu, asalakono ipesombaakono pesombano atuu inso a manu-manu wurokou ke inso a anano manu-manu marapati. 15Sando mpesomba asalakono mewawao a meda pontunua pesomba, ka do'amba melisuo uluno ka mentunuo i wawono meda pontunua pesomba. Reano domempisio kai peluarako a rereno meda pontunua pesomba. 16Takuwea saru wuluno asalakono liniahako kai tinadi i horino meda pontunua pesomba i sabaano oleo, a mpotadia awu. 17Asalakono isopio manu-manu atuu a mpu'u panino sine si teponsia. Ka i'amba sando mpesomba tumunuo i wawono meda pontua pesomba i wawono keu anu kontongaano melanga. Onaemo pesomba tinunu, pesomba tinunuako api anu woono mokomawongkoo aroa-Do i Ue.”
Currently Selected:
Imama 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
