Yosua 9

Akalado to Gibeo

9:1-27

1Mansado merongeo mokole i sumooano oleo i asa towano koro Yarade, ia mentorukuno, ia pongkuno wita, ia tompaano wiwi ntahi langkai hawe i asa mbalino torukuno Libano, po'iangaado mokoledo to Heti, to Amori, to Kana'a, to Perisi, to Hewi ka to Yebusi, 2ntepo'asa ira moroso, meteaakono i Yosua ka to Isaraeli.

3Sine mansado merongeo palilido to Gibeo, hapa anu wineweuno i Yosua i kota Yeriko ka Ai, 4mpompewowolo iramo akala; melako ira mpompatinda kaangado, mpo'ala ira kampili mososao ta po'ulaado kaanga pinateke ia kalidedo, ponaapado anggoro mososa'o, anu teberi ka tinompili, 5sandalado memososa'o, sineu, ka dompesandalaako, sangka anu dompelembaako ntebeberi, sekonopo roti kaangado motutu'iomo, tepe'awuomo. 6Kanatuumo domelako ndi Yosua, a kemado i Giliga. Dompotaeakonomo ka a nto Isaraeli, ”Omami ndio nte'inso i wita olai; moiko to mpedandi.” 7#Pel. 23:32; 34:12; Win. 7:2Sine mpotae ira to Isaraeli a nto Hewi atuu, ”Bara'ura omiu andio mpo'ia komiu i olo mami, kana'umpe ntu'u kami mpoweweu pedandia saru omiu?” 8Mpotae ira ndi Yosua, ”Omami andio ata miu.” Mesikeno i Yosua, ”Isema ke omiu andio ka isua imente'inso?” 9Domesangkio, ”Me'inso kami a olaiano ue, omami andio, mehawe kami hangano nee-Do i Ue, Ue Ala miu, ka kimerongeomo lele mongkona Ondae, luwuakoano anu wineweu-Do i Masiri, 10#Pod. 21:31-35ka luwuakoano anu wineweu-Do a orua mokoledo to Amori, i asambalino koro Yarade, Sihoni, mokole Hesiboni, ka i Ogo, mokole i Basani, anu mpo'ia i Asita. 11Onaekoa mia motota'u mami ka luwuno palili mpotae ira ndi omami kanandio: Tompowawa kaangato ia nsala, ka tomelako ndi ondae: Omami andio tetenaa miu gaagi kanandio tompedandimo. 12Ndiomo roti mami, da mokula tempono kimpelungka inso i raha mami aiwa tepohaweakomiu, sine kanandio, imengkitaomo, mokariomo ka butumokoa rawo-rawono. 13Ndio ponaapa mami anggoro, da wo'ohu tempono kime'ihiio, sine kanandio teberiomo; ndio sangka ka sandala mami mosa'oomo luwu hangano pelempaa mami tedoa olai.” 14Dome'alao to Isaraeli kaangado mia atuudo, sine nahi dompo'ema pontiso-Do i Ue. 15Ka i'amba i Yosua moweweu pesintuwua ka pedandia saru ondae, nine ta mo'inee ira mentuwu; ka petewawa bawaa atuu mpesumpa ndi ondae.

16Sine mansano laloomo otolu oleo, umarido mpedandi to Isaraeli ka mia atuudo, domerongeomo motae mia atuudo po'ia ira umpeda ndi ondae, ka mpo'ia ira i olodo. 17Nde melako iramo to Isaraeli, ko'otolu oleono hawe iramo ia kota-kotado mia atuu; onaemo Gibeo, Kepira, Beero, ka Kiriati-Yearimi. 18To Isaraeli nahi dompompepate, nde petewawado mpesumpa iramo ia nee-Do i Ue, Ue Ala Isaraeli. Onaemo ka dompewuruki ndi ondae petewawado. 19Mpepau iramo petewawado ia luwudo bawaa, ”Pesumpa kamimo ndi ondae a nee-Do i Ue, Ue Alado to Isaraeli; onaekoa ka nahi kita sumaari ira. 20Kanandiomo ba toweweu ira: Po'ineomo domentuwu, kasi tomemasola hangano sumpa, anu tontepo'asaakonomo.” 21Mpotae ira mbo'u luwudo petewawa, ”Po'ineomo domentuwu.” Ondae mempinokogagi puu mpobansi keu, ka puu mpontambu uwoi tiano luwuno bawaa, kana anu pinakosidomo petewawa mongkona ondae. 22Ipoboi iramo i Yosua mia atuudo ka ipotaeako ira kanandio, ”Tembio ka ipopo'oo kami motae: Omami andio mpo'ia kami tedoa olai inso ndi omiu, ka hinaano mpo'ia komiu itonga-tonga mami? 23Onae pu'uno, tetotonaakomiumo ka nahi ta te'otu komiu gagi tetenaa, puu mpobansi keu ka puu mpontambu uwoi tiano raha-Do Ue Alaku.” 24Domesangkio i Yosua, dompotae, ”Lano pinaleleomo ndi omami, motae Ondae i Ue, Ue Ala miu tumenao i Musa tetenaa-Do, meweengakono luwuno wita andio ndi omiu ka rumopu ira luwuno palili inia atuu i aromiu. Onaemo ka kitedoa medoito memate, umaropi komiu; onaemo ka kimpoweweu kanatuu. 25Gaagi kanandio, omami ndio ia ngkae miu, po'ineeomo iweweu kami kana'umpe anu pinemoikomiu ka mentee.” 26Kanatuumo doweweu ira. Dopotola iramo inso a ngkaedo to Isaraeli, onaemo ka nahi domempinepate. 27Ka i tempo atuu ipokogagi ira i Yosua puu mpobansi keu ka puu mpontambu uwoido to Isaraeli ka a meda pontunua mpesombaa ndi Ondae i Ue, ranta kanandio ia mpo'iangaa anu ta bininiki-Do.

Currently Selected:

Yosua 9: XMZ

Highlight

Compare

Copy