Yosua 7

Hala ka hukuno i Akani

7:1-26

1Sine to Isaraeli baliomo aroado nde mpo'ala ira sangka anu dome'inontoako, hangano i Akani anano i Karimi, anano i Sabadi, anano i Sera, inso ia nto Yehuda mpo'ala ira sangka anu dome'inontoako. Tekuda iramo Ondae i Ue a nto Isaraeli.

2Montenaomo mia i Yosua orua ira inso i Yeriko lumako i Ai, umpeda i Beti-Awe, sabaano oleo inso i Beteli, ka i potaeako ira kanandio, ”Lakomo raane ka i padasoo inia atuu.” Lumako iramo mia atuu ka dopadasoo i kota Ai. 3Umari atuu mekule iramo ndi Yosua ka dopauakono, ”Siimo domelako luwu tongkuto, maupo te'orua ke otolu nsowumokoa mia anu sumapoio i kota Ai atuu. Sii pokomasusa ira lumako raane, nde mia i ra'ai tedei ira koa.” 4Melako iramo bara'ura tolu nsowu mia, sine mpolai ira inso i arodo to Ai. 5Nde to Ai mepate ira bara'ura tolupulu ka onoo mia inso ndi ondae; to Isaraeli melinulu ira inso ia mpewowano kota, hawe i Sebari ka domenangi ira i korimbino torukuno. Tedoaomo telusa aroado tongku atuu. 6Ipeberisakonomo i Yosua lembano, menggolontuomo i Yosua ra'ino hawe ia wita mesomba i arono burua-Do i Ue ranta ngkiniwia, mperonga ka mia memota'udo to Isaraeli, ka toro'uludo domerawosiakono awu wita. 7Mepauomo i Yosua, ”O, Ueku Ue Ala, tembio ka Itena ira tongku andio mensakio koro Yarade? Ka kimempineweengako ia mia to Amori ka kimempinepate? Da laluopo ba kimempakosio mpo'ia i asatowano koro Yarade! 8O Ue, hapa ke anu ta pinauku, ba to Isaraeli mpebungkui ira iwalido? 9Nde ba domerongeo to Kana'a ka luwuno palili i wita andio, iramo sumapoi kami ka dome'upu kami luwu inso i wawontolino andio. Ka hapa ta wineweu Miu kai tepokule nee Miu, nee Miu anu langkai?”

10Mepau Iramo Ondae i Ue ndi Yosua, ”Pewangumo! Tembio ka upesomba kanandio? 11To Isaraeli mpoweweu iramo hala, nahi domentondao pedandia-Ku anu Kupauako ira, mpo'ala ira hapa anu lano pinesusua, domemponakoo, domewunio, ka domenaao mesaloako sangkado. 12Onaemo ka to Isaraeli nahi dompoko'aropi ira iwalido. Dompebungkui ira iwalido nde ondae atuu lano pinesusua iramo anu ira mempinepate. Komba aku kumongkomiko mbo'u ba sangka anu pinakosi atuu nahi pinokotampula inso i olomiu. 13Pewangumo, pokomempori iramo tongku atuudo ka upauako ira: Pokomemporio koroi miu tisomo, nde kanandio pau-Do i Ue, Ue Alado to Isaraeli: Oo, to Isaraeli, hinao sangka anu pinakosi imentadio te'inso ndi omiu. 14Tisomo mo'oru impe'aro nte'o'asa tongku ka tongku anu tiniso-Do i Ue asalakono ira mpe'aro nte'o'asa ondae anu mpepe'etu, ka anu tiniso-Do i Ue ira mpe'aro nte'o'asa sombori, ka sombori anu tiniso-Do i Ue ira mpe'aro nte'o'asa mia. 15Ka ba isema anu hinawe monaa sangka anu pinakosi atuu ta tinunu a api, onae ka luwuno hapamokoa anu ndi onae, nde onae molalo songka pedandia-Do i Ue ka moweweu hala i olodo to Isaraeli.”

16Tisomono da mo'oru mewanguomo i Yosua kai tena ira to Isaraeli mpe'aro nte'o'asa tongku, hinaweomo ia tongku Yehuda. 17I tempono domentinena to Yehuda mpe'aro domehaweo to Sera. Mansado mentinena to Sera mpe'aro nte'o'asa mia, hinawe i Sabadi. 18Mansado mentinena mbo'u mpe'aro nte'o'asa mia domehaweo i Akani anano i Karami, anano i Sabadi, anano i Sera, te'inso ia to Yehuda. 19Mepauomo i Yosua ndi Akani, ”Anaku pelangkai Ira i Ue, Ue Alado to Isaraeli, ka umangakumo ndi Ondae; pauo ndi ongkue hapa anu wineweumu, silako wunio ndi ongkue.” 20Sumangki i Akani ndi Yosua, ipotae, ”Mentee, ongkuemo anu tehala ndi Ondae i Ue, Ue Alado to Isaraeli, nde kanandiomo wineweuku: 21Kukitao i olono luwuno sangka anu pinomuru atuu lemba anu tekosi, wineweu inso i Sineari ka rua etu salaka ka asa wata wulaa limapulu sika mobeano; tedoa ineheku, ku'alao, ka kuwunio luwu ia kema a laro wita, salaka itotono ntu'u.”

22Montenaomo mia i Yosua lumako ia kema, ka menteeomo, luwuno atuu winuni a kemano i Akani, ka salaka i totono ntu'u. 23Dome'alaomo luwu inso ia kemano, domewawao ndi Yosua, i arodo to Isaraeli, dompe'uwusakono i aro-Do i Ue. 24Ka i'amba i Yosua, ka luwudo to Isaraeli merakoo i Akani anano i Sera ka dome'alao luwuno salaka, lemba, asa wata wulaa, anano anu tama ka beine, sapino, kalideno, bembe ka bimba, kema ka luwuakoano domewawao i lembono Akoro. 25Mepauomo i Yosua, ”Hangano omue ka kintebobarasai, onaemo ka Ondae i Ue bobarasaiko i oleo andio.” Luwudo to Isaraeli mewunoako ira watu, ka domentunu ira. 26Umari atuu domewanguo asahowuno watu langkai da kongkono ranta kanandio. Luntuomo tekuda-Do i Ue. Domeneakono wita atuu lembono Akoro ranta kanandio.

Currently Selected:

Yosua 7: XMZ

Highlight

Compare

Copy