Yosua 4

Watu petondoni anu hopulu ka orua

4:1-24

1Mansado mpesakiako luwu to Isaraeli ia Koro Yarade, mepau iramo i Ue ndi Yosua, kanandio, 2”Pobinikimo inso ia tongku atuu te hopulu ka orua mia, nte'o'asa sompo tongku, 3ka tena ira kanandio: Tandeomo hopulu ka orua watu inso i ndi'ai, i tongano koro Yarade andio, anu a mpelandaado sando mpesomba atuu, wawaomo luwuno atuu i asatowano ka imenaao a mperatoamiu te'ingka wongi.”

4Ipoboi iramo i Yosua hopulu ka orua mia anu pinakosinomo nte'o'asa mia inso ia tongkudo to Isaraeli, 5ka ipotaeako ira i Yosua, ”Impesakiakomo i arono burua pedandia-Do i Ue, Ue Alamiu, i tonga-tongano koro Yarade, ka impo'ala nte'o'asa mia asa watu ka imempo'ahao, montonda doano tongkudo to Isaraeli, 6ka igagi tondonino ndi omiu. Tewala te'ipua mpesikeno ira anamiu: Hapa pengkonaano watu andio ndi omiu? 7Asalakono pauako ira motae: Uwoi koro Yarade te'otu i arono burua pedandia-Do i Ue; itempono burua atuu sinakiako. Onaemo pu'uno watu andiodo ta gagi petondoni ia nto Isaraeli ranta nahina tampulaano.” 8Domeweweuomo to Isaraeli kana petenano i Yosua. Mpontande iramo watu hopulu ka orua inso i tongano koro Yarade, kana petena-Do i Ue ndi Yosua, montonda doado tongku Isaraeli. Luwuno atuu domewawao i asatowa a mperatoado, ka domenaao i tu'ai. 9Mowangu mbo'u i Yosua hopulu ka orua watu i tongano koro Yarade ia hangangkarudo sando mpesomba anu mpontande burua pedandia atuu. Luwuno watu atuu da koongko ranta hawe kanandio.

10Luwudo sando mpesomba anu mpontande burua pedandia mpentade ira mpiha i tongano koro Yarade, ranta ka i'umari wineweu luwuno anu Dotenaakono i Ue ndi Yosua ka domempinauako a tongku atuu, menunu kana petenano i Musa ndi Yosua. Umari atuu mpopari-pari iramo tongku atuu mpesakiako. 11Mansado luwuno tongku atuu umari mpesakiako, domensakiakonomo mbo'u burua pedandia-Do i Ue atuu saru luwudo sando pesomba i arono matado tongku atuu. 12Inuleno i Rube, inuleno i Gadi, ka tongku Manase anu asantia atuu, mpesakiako, mpesangka petea, i arodo to Isaraeli atuu kana ipauako ira i Musa. 13Bara'ura patopulu nsowu mia anu mpepatinda mpetea mpesakiako i aro-Do i Ue lumako i lembono Yeriko ira mpetea.

14I temponomo atuu Ondae i Ue Dopokolangkaio neeno i Yosua i arodo to Isaraeli, ranta ka domedoitoakono, kana domedoitoakono i Musa asa ntinumuwuno.

15Mepau iramo i Ue ndi Yosua, kanandio, 16”Tena iramo sando mpesomba mpontande burua songka-Do Ue Ala atuu ka dompewuatako inso ia koro Yarade.” 17Onaemo ka itena ira i Yosua sando mpesomba mentandeo burua pedandia, ”Impeluarakomo inso ia koro Yarade.” 18Mansado mpeluarako inso ia koro Yarade sando mpesomba saru anu pontande burua pedandia-Do i Ue atuu, ka da'iaopo dompelanda ia wita motu'i, tepokuleomo uwoi Koro Yarade umili kana se'eluno, buuso hawe ia wiwino. 19Luwuno tongkudo to Isaraeli mpeluarako inso ia koro Yarade ia tanggala hopulu wula ko'asa, ka mpoweweu kema i Giliga, i sabaano oleo Yeriko.

20Watu anu hopulu ka orua anu inalani inso a ngkoro Yarade atuu iwanguo i Yosua i Giliga. 21Motae i Yosua a nto Isaraeli, ”Ba mpesikeno ira ana miu te'ipua hapa pengkonaano watu andiodo? 22Asalakono ka imempauako ira anamiu kanandio, ’Mpesakiako iramo to Isaraeli a ngkorono Yarade andio ia wita anu motu'i!’ 23Nde Ondae i Ue, Ue Alamiu anu Dopokomotu'io koro Yarade i aromiu, onaemo ka dopokompesakiako, kana Doweweuo i Ue, Ue Alamiu tahi Teberau, anu Dopokomo'areo i aroto, ka tompokompesakiako, 24ka domento'orio luwuno mia i tolino, motae moroso kae-Do i Ue, ka domedoito mpiha ndi Ondae i Ue, Ue Alamiu”

Currently Selected:

Yosua 4: XMZ

Highlight

Compare

Copy