Yosua 23
23
Pau petompano i Yosua ia luwuno petewawa tongku atuu
23:1-16
1Tehine umari-Do i Ue moweeako ira rodoa a nto Isaraeli ia sompo siuno wita inso ia luwuno iwalido, ka itempono tinuwuno i Yosua mota'uomo, 2ipoboi ira luwudo to Isaraeli, mia memota'u, luwuno petewawa, puu mpobitara, tadulako, ka ipotae ndi ondae: ”Mota'u akumo, melaiomo tumuwuku. 3Imengkitaomo luwuno anu wineweu-Do i Ue, Ue Alamiu, ia luwuno tongku i ndi'ai hangano omiu, nde Ondae i Ue, Alamu, Ondae anu me'iwaliakomiu. 4Impewowoloo, kutiaakomiumo mesala ia undi, luwuno tongku anu da tebinta atuu gagi pusakamiu montonda luwuno tongkumiu, kanakoa mbo'u luwuno tongku anu kuropu iramo atuu, mompu'u a koro Yarade hawe i Tahi Molue te'alaako i sumooano oleo. 5Ka Ondae i Ue, Ue Alamiu, Ondaemo anu sumaari ira ka moko'olai ira inso i aromiu, ranta ka impo'iangario witado, kana anu Dodandiakomiu i Ue, Ue Alamiu. 6Impokomorosoo ntu'u aroa miu mpekariao ka meweweuo luwuno anu teburi ia wuntano i Musa. Sii mepansia i koana ke i manggali. 7Sii mpe'asaako ira luwuno tongku anu da tepo'ia i olomiu atuu. Sii me'akuio neeno anu pinesombai susua ke ba mesumpa ia nee atuu. Sii mpesombaio lahumoa atuu. 8Tendeano impe'ini temoroso ndi Ondae i Ue, Ue Alamiu, kana anu wineweumiu hawe kanandio. 9Dosaari iramo i Ue inso i aromiu luwuno tongku anu langkai ka moroso atuu. Ka omiu nahina mau te'asa mia anu moko'aropi komiu ranta oleo andio. 10#Win. 3:22; 32:30Asa mia koa inso ndi omiu, anu mokolumulu ira asa nsowu mia, nde Ondae i Ue Ue Alamiu anu me'iwali mokowali komiu, kana anu Dodandiakomiu. 11Kongkomo impetenunu mehohawa Ira Ondae i Ue, Ue Alamiu! 12Nde tewala mpewolili komiu ka mpe'ini moroso a toreano luwuno tongku anu da mpo'ia i olomiu, pada mpekokombia saru ondae ka mpe'asaako ira, 13imento'oriomo te manasa, motae Ondae i Ue, Ue Alamiu, nami Ira sumaario mbo'u luwuno tongku atuu inso i aromiu. Tendeano ira megagi dampa ka oho ndi omiu, gagi ponsepi ia koroimiu, ka rui ia matamiu, ranta ka imeropu inso ia wita anu moiko andio, anu Doweeakomiumo Ondae i Ue Ue Alamiu, ndi omiu. 14Nami tehine mbo'u aku lumempaio sala anu luwuakoano ta tampula. Onaemo ka intepidimo ia tompaano aroamiu ka tompaano sumangamiu nde inso a luwuno dandi anu moiko anu pinau-Do i Ue, Ue Alamiu, ndi omiu nahi ta hina mau te'asa anu ta tetadi. Luwuakoano inihii. Mau te'asa nahina anu ta tetadi 15Sine kana anu haweomo ndi omiu luwuno anu moiko, anu Dodandiakomiumo Ondae i Ue, Ue Alamiu, kanandiomo Ondae i Ue Ira moweeakomiu luwuno anu nahi moiko ranta ka Dopokoropu komiu inso ia wita anu moiko andio, anu Doweeako miumo Ondae i Ue, Ue Alamiu. 16Tewala imelinggeio pedandia, anu Dotenaakomiumo i Ue, Ue Alamu, ka imelako mpesomba ia pinesombai susua. Tekuda-Do i Ue ta tensila ndi omiu onaemo ka imeropu inso ia wita anu mioko anu Doweakomiumo ndi omiu.”
Currently Selected:
Yosua 23: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
