Yeremia 39
39
Tedontano kota Yerusale
39:1-10
(2Mok. 24:20–25:21; 2Taw. 36:17-21; Yer. 52:3-30)
1Tempono Yerusale pinongko'ala, a nta'u ko'osio poparentaano i Sedekia, a wula kohopulu, haweomo i Nebukanesa, mokole i Babeli, saru luwuno sorodaduno ta kumaduo Yerusale. 2A nta'u kohopulu ka asa poparentaano i Sedekia, a wula ko'opaa, tanggala osio wula atuu, rere watuno kota atuu rinongka. 3Mehawe iramo mia pinemota'uno mokole i Babeli atuu, ka do'amba mpo'ala po'ianga a mpewowa langkai i tongano. Ondae onaemo i Neregali-Sareseri, anu langkai potorono inso i Sini-Magiri, asa mia tadulako, ka i Nebusasibani, petewawa langkanae, ka luwuno petewawa sorodadu susuano inso ndi mokole i Babeli.
4Kumita ira luwu, i Sedekia, mokoledo to Yehuda, saru luwuno sorodaduno mpolai. Domebintao kota tempono wongi melaloo sala bonde bungano mokole ka pewowa langkai olono orua rere watu, ka do'amba mpeluarako nte'aro i Araba-Yarade. 5Sine, sorodadudo to Kasidimi melampuio ka mehaweo i Sedekia i lembono Yeriko. Domerakoo ka mewawao i kota Ribela i wita Hamati, ndi Nebukanesa, mokole i Babeli, anu modontai pohuku ndi onae. 6Mokole i Babeli sumumbele ira anano i Sedekia i arono matano i kota Ribela. Mokole i Babeli sumumbele ira mbo'u luwuno anu langkai potorono i Yehuda. 7Umarino atuu matano i Sedekia ipokomorawuo, ka i'amba ponguakono rante mala ka iwinawa i Babeli. 8To Kasidimi rumopuo langkanaeno mokole ka rahado palili, ka do'amba mehoao luwuno rere watuno Yerusale. 9Ka i'amba i Nebusaradani, petewawa sorodadu podagai mokole, wawa ira palili anu da mentuwu a pontadia i Babeli anu da mpo'ia i kota atuu ka luwuno mia anu mpe'alaako ndi ondae saru palili susuano anu da mentuwu. 10Sine, asa ntia inso a mpalili, mia mongkokolaro tuwudo anu nahina hapa-hapado, ibinta ira i Nebusaradani, petewawa sorodadu podagai mokole i wita Yehuda. I tempo atuu ipoweeako ira mbo'u lere anggoro ka pelerea.
Parentano i Nebukanesa ka ipinotola i Yeremia
39:11-14
11I Nebukanesa, mokole i Babeli mompoweeomo parenta mongkona i Yeremia molalo ndi Nebusaradani, petewawa sorodadu podagai mokole, kanandio, 12”Wawaomo ka pekakaakono. Si poweweu hapamo koa anu mosa'o ndi onae, tendeano weweuakono menunu saru po'emano ndi omue!” 13Onaemo pu'uno i Nebusaradani, petewawa sorodadu podagai mokole, saru i Nebusasibani, petewawa langkanae, ka i Neregali-Sareseri, tadulako, ka luwuno anu langkai pangkano ndi mokole i Babeli, mpotena mia 14ondae mpotena mia umalao i Yeremia inso a kintala podagaia, ka i'amba pineweengako ndi Gedalia anano i Ahikami anano i Sapani ka iwawao mekule i raha. Kanandiomo i Yeremia mo'ia i tonga-tongano palili.
Dandi ndi Ebedi-Meleki
39:15-18
15Tempono i Yeremia da inuko a kintala podagaia, pau-Do i Ue hawe ndi onae, kanandio, 16”Lakomo ndi Ebedi-Meleki, to Etiopia atuu ka pauakonomo: Kanandiomo pau-Do Ueno luwuakoano, Ue Alado to Isaraeli: Mentee ntu'u, Aku mokogagio pau-Ku i kota andio a masolaa ka komba moikoano. Luwuno atuu ta gagi i arono matamu i tempo atuu. 17Sine, Aku motolako i tempo atuu, kanandiomo pau-Do i Ue. Omue nahi kopineweengako a ngkaedo mia anu dinoitoakomu, 18tendeano, manasa Aku motolako. Omue nahi kotebangkuako ponai; penaamu ta kinadudui, hangano omue mompe'ala-ala ndi Ongkue, kanandiomo pau-Do i Ue.”
Currently Selected:
Yeremia 39: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
