Yeremia 15
15
1 #
Pel. 32:11-14; Pod. 14:13-19; 1Sam. 7:5-9 Mepau Iramo i Ue ndi ongkue, ”Maupo i Musa ka i Semueli mentade i aro-Ku, aroa-Ku nahi ta mepokule a tongku andio. Saari iramo inso i aro-Ku ka domelako! 2#Meng. 13:10Tewala mpesikeno ira ndi omue, ’Isuake asalakono kami melako?’ Pauako iramo, ’Kanandiomo pau-Do i Ue:
Anu tinantui tiano matea, lakomo a matea!
Anu tiano ponai, lakomo a mponai!
Anu tiano mokoninggoa, lakomo a mokoninggoa!
Ka anu tiano gagi tinawa, lakomo a pontawaa!’
3Aku mompotiiako ira opaa rupa pohuku, kanandiomo pau-Do i Ue, ponai pompepate, dahu mporende, manu-manu i laro meene ka luwuno kondehora i tolino ka dompongkaa ka mepingkoo. 4#2Mok. 21:1-16; 2Taw. 33:1-9Aku mokogagi ira mongkokongiria a luwuno poparentaa i tolino, hangano i Manase anano i Hisikia, mokole i Yehuda, hangano luwuno anu wineweuno i Yerusale.”
Ondae Ue Ala te'osa mehohawa ira bawaa-Do
15:5-9
5”Isemake anu ta mehohawako, hei Yerusale,
ka isema anu ta metonda mompemasusa saru omue?
Isemake anu ta tetoro mesikenoakono
teweweumu?
6Omue isa'a nahi utarima Aku,
kanandiomo pau-Do i Ue,
upebungkui Akumo.
Onaemo ka Kutandeo kae-Ku ka mepateko;
te'osa Akumo mehohawako.
7Kudukuako ira poduku
a luwuno pewowa langkaino wita.
Bawaa-Ku Kuweweu ira tetadi anado ka Kuweweu ira memate,
hangano nahi dompepokule inso a mpeleludo.
8Kupokogagi ira tuwu beine hadioopo
sekono one a ntahi.
Kupotiio a ine ka mia mongura
asa puu pompepate tempono ntonga oleo.
Nahi kinookoo Kupotiiako ira
danggara ka doitoa.
9Beine anu pepintumo ipe'ana ta me'i'isei,
ka penaano kongasa-ngasa.
Ndi onae mata'oleo sumoomo tekonai da meene,
onae gagi mokoko'ii ka ipemoteweomo koroino.
Anu da tebinta inso ndi ondae Aku meweengako ira a mponai
i arono luwuno iwalido,
kanandiomo pau-Do i Ue.”
Pompemasusano i Yeremia ka sangki-Do i Ue
15:10-21
10Masola aku, oo ineku, nine omiu me'anaakune,
asa mia anu gagi pontiiano pegagaa
ka pe'u'uaado luwuno wita.
Nahina kupokompepasuao
ke mepasua ndi semamo koa,
sine luwudo mentotonaa aku.
11Ondae i Ue mepau Iramo: Mentee ntu'u, omue Kupotolako hangano moikoa;
mentee ntu'u Aku weweuo iwali mepepehohawa ndi omue
i tempo urasa'o ka ma'isoa!
12Polioke mia mompudu labu, labu inso i utara ka mala?
13”Arataa kaeamu ka luwuno sangka pinekariamu
Aku meweengakono gagi rontua nahina sulono
hangano luwuno halamu
a luwuno wita pinabawaimu.
14Aku weweuko gagi atado iwalimu
i wita anu nahi uto'orio,
hangano a laro ntekuda-Ku api melanga,
langano tumunuko.”
15Omiu tumo'orio, oo Ue.
Irambeomo ka Iperio akumo;
Ipombaloakunemo a luwuno mia anu lumampui aku.
Si po'inee aku inala, hangano melai sabara-Miu;
Ito'oriomo mobeano kutembio pontetewehi hangano Omiu!
16Mansano hinawe luwuno pau-Miu, kumawongkoakono.
Pau-Miu atuu gagi ineheku,
ka mawongkono aroaku,
hangano ongkue wawao nee-Miu,
oo Ue, Ue Alano luwuakoano.
17Nahi kupentoro saru mia mpompemaroa
a laro ntepotowoado mia anu mpepau mpemae-mae.
Podansono kae-Miu weweu aku mentoro asa-asaku,
hangano Ibuketiakunemo bamburu-Miu.
18Tembioke marasaiku nahina tompaano,
ka mobelaku tedoa mahaki, nahi tepakuli?
Mentee ntu'u, Omiu kana korono anu wela motu'i ndi ongkue,
uwoi anu nahi pinokomperorohi.
19Onaemo pu'uno kanandiomo pau-Do i Ue,
”Tewala inehemu mepokule,
Aku mokuleko
gagi puu pompekakaako-Ku,
ka tewala mompauko hapa anu mentudu ka komba anu mokoburu,
asalakono omue kogagi ponsombu elo ndi Ongkue.
Maupo ira mpepokule ndi omue,
omue siimo pepokule ndi ondae.
20A tongku andio Aku weweuko
gagi rere watu anu mebente inso a mala.
Ira mpeteaakomu,
sine nahi ira menangiko,
hangano Ongkue kumongkomiko
ka utekadudui ka motolako,
kanandiomo pau-Do i Ue.
21Aku motolako inso a ngkaedo mia mpoweweu mosa'o
ka motolako inso a pokungkudo mia melambaha.”
Currently Selected:
Yeremia 15: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
