Yeremia 1
1
Pu'u Mpau
1:1-3
1Ndiomo luwuno pauno i Yeremia anano i Hilikia, inuleno sando mpesomba anu i Anatoti i wita Benami. 2#2Mok. 22:3–23:27; 2Taw. 34:8–35:19A tempono i Yosia anano i Amoni, mokoledo to Yehuda, i larono ta'u kohopulu ka otolu poparentaano, haweomo pau-Do i Ue ndi Yeremia. 3#2Mok. 23:36–24:7; 24:18–25:21; 2Taw. 36:5-8; 11–12Pau atuu hawe mbo'u a tempono i Yoyakimi anano i Yosia, mokoledo to Yehuda, hawe tampulaano ta'u kohopulu ka asa tempono i Sedekia anano i Yosia, mokoledo to Yehuda, ranta palilino Yerusale mewinawa a pontadia i larono wula ko'olima.
Ondae i Ue moboio ka tumenao i Yeremia
1:4-19
4Pau-Do i Ue hawe ndi ongkue, kanandio,
5”Se'eluno napi Kupokogagiko a laro mpe'anakaano inemu, Kuto'orikomo,
ka se'eluno napi upeluarako inso a mpe'anakaa, Kupokomemporikomo,
Kupakosikomo gagi nabido luwuno tongku.”
6Ka kusangki, ”Oo, Ue Ala, menteeano nahi kupande mepau, hangano ongkue da mongura.” 7Sine Ondae i Ue mepau ndi ongkue, ”Sii potae: Ongkue da mongura,
sine maupo ndi sema kutenako, asalakono ka ulako,
ka maupo hapa anu Kuparentaakomu, asalakono ka upohaweo
8Sii doitoako ira,
hangano Ongkue kumongkomiko ka motolako, kanandiomo pau-Do i Ue.”
9Ka Do'amba i Ue weroo kae-Do umanggao ngangaku. Ondae i Ue mepau ndi ongkue,
”Menteeano Kunaao luwuno pau-Ku a laro ngangamu.
10To'oriomo, a oleo andio Kupotoroko
a luwuno tongku ka a luwuno poparentaa
ka upobuta ka mompobangku,
ka upompepate ka mongkale-kale,
ka upowangu ka mompaho.”
11Umarino atuu pau-Do i Ue hawe ndi ongkue, kanandio, ”Hapake kinitamu, hei Yeremia?” Kusangki Ira, ”Kukitao asa sampano keu badami.” 12Ka i'amba pau-Do i Ue ndi ongkue, ”Menteeomo pongkitamu, hangano tetinda Akumo mokogagio pau-Ku.”
13Pau-Do i Ue hawe ndi ongkue anu kompenduano, kanandio, ”Hapake anu kinitamu?” Sangkiku, ”Kukitao asa kawali anu reede; haweno inso i utara.” 14Ka i'amba pau-Do i Ue ndi ongkue,
”Inso i utara ta umaluo masolaa
a luwuno palilino wita andio.
15Hangano menteeano, Kupoboi
ira luwu ulea mokole a luwuno poparentaa inso i utara, kanandiomo pau-Do i Ue,
ira me'aiwa ka singge pompotade kadera poparentaado
a luwuno pewowa pewinsoa a mpewowa langkai Yerusale,
umpeda luwuno rere watu anu lumimbuo
ka umpeda luwuno kotano Yehuda.
16Aku mokomengkaao pohuku-Ku ndi ondae,
hangano luwuno wineweudo anu mosa'o;
domebinta Akumo,
ka mpontunu ira dupa a mpinesombai susua
ka mpenggolontu mpesombaio
wineweuno kaedo.
17Sine omue, onggoomo tongamu,
ka pompari-parimo pauako ira
luwuno anu Kuparentaakomu.
Si doitoako ira,
ka si Kuweweuko doito i arodo!
18Ka Ongkue, menteeano a oleo andio
Kuweweuko gagi kota mebente,
gagi karu labu ka gagi rere mala
umewaio luwuno wita andio,
umewai ira mokoleno Yehuda ka luwuno mia pinemota'udo,
umewai ira sando mpesombado ka palilino wita andio.
19Ira mpeteaakomu, sine nahi ira menangiko,
hangano Ongkue kumongkomiko ka utola, kanandiomo pau-Do i Ue.”
Currently Selected:
Yeremia 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
