YAKOBU 5
5
Pompopoto'ori a mia kaea
5:1-6
1Gaagi kanandio-andio hei omiu mia mengkaea, impengesemo ka mensabangiomo marasaia anu ta umalukomiu! 2#Mat. 6:19 Kaeamiu mobooomo ka sangkamiu ikaanomo ule-ule! 3Wulaa ka salakamiu menta'ilasiomo, ka ta'ilasino ta gagi sakosii ndiomiu ka ta kumaano ihimiu kana api. Mpopumpu komiumo arataa a mpokotompaano tempo. 4#Win. 24:14-15 Menteeano terongeomo pebooli meroku, hangano nahi ime'owahio tambodo mia anu mensowio hasilino leremiu, ka haweomo a biri-Do Ueno luwuakoano pompemasusado anu mponsewo hasilino leremiu. 5Mentuwu komiumo a laro mare'ea ka mpompemana-manangai i tolino, impotendeomo aroamiu mengkena kana a oleo ponsumbelea. 6Mpohuku komiumo, tendeano mpompepate komiumo mia anu mentee ka nahi poko'ewai komiu.
Sabara a laro marasaia
5:7-11
7Onaemo pu'uno, pepaekompo luwu-luwu, imensabaramo ranta a hawea-Do i Ue! Menteeano mia melere monsikori hasili anu masuli olino inso a witano ka isabara hawe ka ipetiimo usa tempo amba-ambano ka pokotompaano. 8Omiu asalakono mensabara mokorosoo aroamiu hangano hawe-Do i Ue umpedaomo! 9Pepaekompo luwu-luwu, si mpewuruki ka mambepokonsala, ka si mehinuku. Menteeano Puu Mpobitara mentade Iramo a mpuu pewowa. 10Pepaekompo luwu-luwu, imentondaomo pandiri tebobarasaia ka sabarado luwuno nabi anu mpepau iramo a nee-Do i Ue. 11#Ayb. 1:21-22; 2:10; Pud. 103:8 Menteeano kimempau ira meme'ura, onaemo andio anu mpompedato iramo; imerongeomo mongkona pompedatono i Ayubi ka imento'oriomo hapa anu poko'ariano Dopatiandaakono i Ue, hangano Ondae i Ue tedoa mompehahowa ka buke pe'aroa.
Mongkona sumpa, ka pekakai tiado mia mahaki
5:12-20
12 #
Mat. 5:34-37
Sine anu lalua, pepaekompo luwu-luwu, si mpesumpa mesakosiiako suruga maupo mesakosiiako tolino ke mesakosiiako hapamo koa anu susua. Tewala humbee, impotaemo humbee, tewala naahi impotae naahi, ka si kona komiu pohuku.
13Tewala hinao asa mia i olomiu anu mompemarasai, moikoomo i pekakai! Tewala hinao asa mia anu mo'unde moikoomo i penani! 14#Mrk. 6:13 Tewala hiao asa mia i olomiu anu mahaki, moiko impoboi ira penatua bawaa, ka dompekakaiakono saru mehahiakono lana a nee-Do i Ue. 15Ka pekakai anu meluarako inso a pompe'ala-ala ta kumaduduio mia mahaki atuu ka Ondae i Ue Ira wanguo; ka tewala moweweu hala, ka hala atuu ta inampuni. 16Onaemo pu'uno ka imemambe mangakuakono halamiu ka memambe pekakaiako, ka imetompa. Pekakaino mia mentee, tewala ipe'ala-alao ntu'u ipinekakaiako, langkai ntu'u pabawano. 17#1Mok. 17:1; 18:1 I Elia onaemo mia kana ontae, ka inso ntu'u i aroano i pekakai, ka si petii usa, ka nahi petii mbo'u usa i tolino i larono otolu nta'u ka onoo wula. 18#1Mok. 18:42-45 Ka i'amba mekakai mbo'u ka langi mompotii usa ka tolino mbo'u moluarako wuano.
19Luwuno pepaekompo, tewala hinao i olomiu anu pansia inso a menteea ka hinao asa mia anu weweuo ka ipepokule, 20#Pow. 10:2; 1Pet. 4:8 to'oriomo, nine ba isema weweuo mia tehala ka ipepokule inso a salano anu tesaa, onae ta kumaduduio sumangano mia atuu inso a matea ka hadio hala tinutuwino.
Currently Selected:
YAKOBU 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
