Yesaya 64
64
1Ande-andeno Iberio langi ka Ipetii,
ranta luwuno torukuno lelu i aro-Miu,
2kana api anu sumongkoo sampa keu anu motu'i
ka kana api mokoredeo uwoi,
ka nee-Miu domento'orio anu umewai Komiu,
ka luwuno tongku mpondidi-ndidi i aro-Miu.
3Hangano, Omiu moweweu wineweu mongkokodoito anu nahi kimperorohio,
Omiu metii ka luwuno mbo'u torukuno lelu i aro-Miu.
4 #
1Kor. 2:9
Mompu'u i ndi'ipua se'eluno nahi hori teronge,
nahina biri anu moronge,
ka nahina mata anu hori mongkita
maupo Ue Ala isua, sangkadio Omiu, anu moweweu tiado mia anu sumikori Ira.
Butu Omiu anu moweweu kanatuu.
5Omiu tumotowoo mia anu mawongko moweweu anu mentee,
ka anu rumambe-Komiu a nsala anu tiniso-Miu!
Menteeano, Omiu tekuda, hangano omami mentehala mompu'u i ndi'ipua se'eluno.
Nde kami koa mengkinadudui?
6Kanatuumo luwumami kana asa mia mokoburu
ka luwuno pesombamami ntu'u kana sawu hawe wula.
Luwumami gagi moleu kana lewe
ka tampula hangano mosa'ono wineweumami
kana lewe ipaneeo angi.
7Nahina anu moboio nee-Miu
ke anu me'usaha metako ndi Omiu;
hangano Omiu wunio rupa-Miu ndi omami,
ka meweengako kami alaro pokungkuno salamami.
8Sine kanandio-andio, oo Ue, Omiumo Amamami!
Omami andio wita pulu ka Omiumo anu weweu kami,
luwumami onaemo wineweuno kae-Miu.
9Oo Ue, siimo Itekuda lahi
ka siimo Ipewowoloo hala lembuino!
Oo, po'ineeomo ka Ikita kami,
hangano omami luwu onaemo bawaa-Miu.
10Luwuno kota-Miu anu mempori gagiomo pada one,
Sioni gagiomo pada one,
Yerusale boni-boni.
11Rahamami anu mempori ka maramba,
po'iangado uempu'umami umunde-unde-Komiu,
gagiomo pompaani api,
ka luwuno pine'uemami anu lalu tekosi gagiomo terawo-rawo.
12Kumitao luwuno andio, oo Ue, kana'umpe ka Komiu mo'iaakono,
saru mo'ia merodo-rodo ka mokonsii kami kanandio gagiano?
Currently Selected:
Yesaya 64: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
