Yesaya 61
61
Lele moiko ndi Sioni
61:1-11
1 #
Mat. 11:5; Luk. 7:22 #
Luk. 4:18-19
Penaa-Do Ue Ala kongko ndi ongkue,
hangano Do'urapi akumo i Ue.
Dotena akumo mohaweo lele moiko a mia memarasai,
ka mekakaako ira mia anu masusa aroano,
ka paleleo pompotolaa a mia mentinawa,
ka tepotolaado mia anu nte'uko a torungku,
2 #
Mat. 5:4
ka paleleo ta'u pompehohawa-Do i Ue
ka oleo pombaloa-Do Ue Alato,
ka tumarero ira mia anu mpo'inombo,
3ka moweeako ira ramba-ramba ulu gagi euno awu,
lana pakea a mpogawea gagi euno sawu po'inombo,
penani po'unde-unde gagi euno roso anu molema,
ka dompotaeako ira mia ”keu tarabanti menteea,”
anu pinaho-Do i Ue ka mopokitao maramba-Do.
4Ondae ira wali mewanguo anu tekale-kale tehineomo ntu'u,
ka montadeo luwuno po'ianga anu mompu'u i ndi'ipua gagi boni-boni.
Ira mempokowo'ohuo luwuno kota anu tekale-kale,
luwuno po'ianga anu mapa'api-apiomo inule gagi boni-boni.
5Luwuno mia susua ira mpekakaakomiu kana puu mpopakambi bawaano bembe bimbamiu,
ka mia mehawe ira mpo'anggaakomiu kana puu mpelere ka puu mpelere anggoromiu.
6Sine, komiu mempinau sando mpesomba-Do i Ue
ka komiu menineeako puu pompekakaako-Do Ue Alato.
Komiu mperapio kaeado tongku
ka komiu pompelangka-langkaiako luwuno arataado.
7Gagi euno mokoko'iimiu anu meluka mpedua hadiono,
ka gagi euno tesosa'ori, komiu mengkokora-kora mawongko hangano tia anu hinawemiu.
Komiu mpohawe pusaka meluka mpendua i witamiu
ka mawongkoa nahina tampulaano ta gagi tiamiu.
8Hangano Ongkue, Ue, kumekewoio songka,
umo'aliaakono porontua ka molengkua.
Aku moweeko tambomiu anu mentee,
ka mowutu pedandia anu nahina tampulaano saru omiu.
9Inulemiu ta teto'ori i olono luwuno tongku,
ka ana'uemiu i tonga-tongado suku tongku,
ranta luwuno mia anu kumita ira, ira me'akuio
nine ondae inuledo anu rinonso-Do i Ue.
10 #
Meng. 21:2
Mawongko aku ndi Ondae i Ue,
sumangaku kokora-kora mawongko ndi Ondae Ue Alaku,
hangano Dopokonaakune sangka tekaduduia
ka sumoumbuakune lemba meloe menteea,
kana umbungkoroi tama anu mompokona ramba-ramba ulu
ka kana umbungkoroi beine anu mompake ramba-rambano.
11Hangano, kana tolino moluarako pinopaho,
ka kana lere motuwuo inii anu rinawo,
kanatuumo Ondae Ue Ala Ira motuwuo menteea
ka po'unde-unde i arodo luwuno tongku.
Currently Selected:
Yesaya 61: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
