Yesaya 5
5
Penani mongkona lere anggoro
5:1-7
1 #
Mat. 21:33; Mrk. 12:1; Luk. 20:9 Aku menaniako penani mongkona pinehohawaku,
penanino pinehohawaku mongkona lere anggorono:
Pinehohawaku hinao lere anggorono
a laano pongku anu mewalo.
2Ibingkuo ka itadi ira watuno,
ipompahoakono keu anggoro bininiki;
onae mowangu asa menara podagaia i tonga-tongano
ka mongkeke aa pomporo'ia anggoro.
Ka i'amba sumikorio lere atuu ka ipehasiliako wua anggoro,
sine anu ipehasiliako wua anggoro anu mo'olo.
3Kanandio-andio, hei palilino Yerusale,
ka to Yehuda,
bitaraomo olono ongkue ka lere anggoroku.
4Hapa mbo'uke anu asalakono wineweu a lere anggoroku atuu
anu napi kuweweuo ndi onae?
Kusikorio ka ipehasiliako wua anggoro,
tembio anu ipehasiliako butu wua anggoro anu mo'olo?
5Gagi kanandio-andio, aku pauakomiu
hapa anu aku weweuo a lere anggoro-Ku atuu:
Aku tumuehio wala ruino,
ranta lere atuu ipingko kinaa,
aku mobangkuo rere watuno,
ranta ka ilinolanda lere atuu;
6aku mo'ineeo
nahi pinesampai ka nahi binondei,
ka ituwu ewo ka rui;
aku parenta ira seru,
ka si dopompotii usa i wawono.
7Hangano lere anggoro-Do Ueno luwuakoano
onaemo sukudo to Isaraeli,
ka to Yehuda
onaemo bonde anu inehe-Do;
Dosikorio moleoa,
sine butu lambaha anu hinao,
Dosikorio menteea,
sine butu marisua anu hinao.
Pontekudaako mongkona mperupa-rupa nahina moleoa
5:8-24
8Masola ntu'u mia anu mansa mompewinsoki raha melimba a raha susua
ka moronto lere melimba a lere susua,
ranta nahina mbo'u po'iangado mia susua.
Imeweweuo butu koroimiu anu mpo'iangario wita atuu.
9A biriku teronge sumpa-Do Ueno luwuakoano,
”Menteeano hadio raha ta gagi boni-boni;
luwuno raha anu langkai ka tekosi
nahi ta hina mo'iangario.
10Menteeano, lere anggoro anu maluano hopulu semedi
ta mehasiliako butu asa bati anggoro;
ka inii asa homeri
ta mehasiliako butu asa efa tarigu.”
11Masola ntu'u mia anu mewangu mo'o-mo'oru
ka tetutu mo'ungke inua anu mompokomolangu,
ka i'amba mentoro-toro hawe wongi,
molanguako anggoro!
12Katapi ka gambusu, rebana ka siloli,
saru anggoro mokomaroao luwuno pogawedo,
sine wineweu-Do i Ue nahi pinelangkai
ka inangga-Do i Ue nahi pinerio.
13Onaemo pu'uno, bawaa-Ku asalakono melako a pontadia,
hangano nahi domponto'ori hapa-hapa;
luwuno mia anu maramba ira memokoninggo,
ka mia hadio ira memarasai mokoranga.
14Onaemo pu'uno, tolinodo mia mate ta umungkahio burokono temalua
ka ta konganga-nganga nahina otuano,
ranta i larono tampulaomo mewantano ka maroano Yerusale,
magagano ka mawongkoa i kota atuu.
15Ka mia ta pinokompetuundu,
ka mia ta pine'uru-uru,
humbee, mia mompelangka-langkai ta pine'uru-uru.
16Sine Ondae Ueno luwuakoano lano tedoa mantande a laro moleoa-Do,
ka Ondae Ue Ala anu tedoa mempori mokomengkaao pentoroa-Do a laro menteea-Do.
17Bimba ira mpongkaa ewo i ra'ai kana a mpada po'iangado,
anano bembe ira mpo'ungke mpongkaa a nterongkano rahano mia kaea.
18Memasola ira ntu'u anu mpo'ungke-ungkeako sala mompake koloro pegaupi
ka hala mompake kolorono porende roda,
19anu mpotae, ”Moikoomo Ondae Ue Ala ka Doronga
mokogagio wineweu-Do,
ka tomengkitao;
moikoomo tinoo-Do Anu Tedoa mempori, Ue Alado to Isaraeli,
ka i'umpedamo ka imengkaa, ka tomento'orio.”
20Masola ntu'u anu motae wineweu mosa'o atuu moiko
ka moikoa atuu mosa'o,
anu balio wongi-wongi gagi mewine
ka mewine gagi wongi-wongi,
anu balio mopa'i gagi mo'ahi,
ka mo'ahi gagi mopa'i.
21Masola ntu'u mia anu tumuduo koroino pande mosongka,
anu tumuduo koroino pande!
22Masola ntu'u mia anu mokora mo'inu
ka anu pande ntu'u monsalo inua anu mompokomolangu;
23anu mokomenteeo mia mosa'o gauno hangano pompowee nahi pototono
ka anu humapuo tiano mia mentee.
24Onaemo pu'uno, kana elo api mongkaa seami,
ka kana ewo mokari pingko tampula a laro langano api,
kanatuumo luwuno hakado ta moboo,
ka sisino mpenee kana awu,
hangano nahi domentarimao pompaguru-Do Ueno luwuakoano
ka mentatao pau-Do Anu Tedoa mempori, Ue Alado to Isaraeli.
Tongkudo mia mehawe gagi pesalaano tekuda-Do i Ue
5:25-30
25Onaemo pu'uno, tesingkaomo tekuda-Do i Ue a bawaa-Do,
kae-Do Dopotiio ndi ondae ka Dotunduhi ira;
torukuno mpondidi-ndidi, ka wata ngkoroido
kana ta'i a ntonga nsala.
Maupo gagiomo luwuno andio, tekuda-Do napi temonto,
ka kae-Do kongkono pinotii.
26Ira mowuatako bandera tiano tongku anu inso a olaino,
ka momansu moboi ira inso i tompano tolino;
menteeano ira koa ronga me'aiwa mpotuturako!
27Nahina maupo te'asa mia i olodo anu mokendo, nahina maupo te'asa mia anu tetidu;
ondae nahi domerodo ka nahi dontekoturi,
nahi tepotola peboo ntongado,
nahi tebite onggono sandalado;
28ana mpanado pinokomontasoomo,
ka luwuno panado linongkuomo;
kukuno ngarado motea kana watu api
ka bolano karetado kana lompiu.
29Pengaolido kana singa waino,
kana singa mongura dompengaoli;
ondae mperaali ka mporako kaangado,
mewawao mpelulu ka nahina mokompotolao.
30A oleo atuu ira mperaali
kana tahi u'uru.
Tewala mia mengkita i tolino,
tengkita butu wongi-wongi anu mompokoma'iso,
ka mewine gagi wongi-wongi hangano seru!
Currently Selected:
Yesaya 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
Yesaya 5
5
Penani mongkona lere anggoro
5:1-7
1 #
Mat. 21:33; Mrk. 12:1; Luk. 20:9 Aku menaniako penani mongkona pinehohawaku,
penanino pinehohawaku mongkona lere anggorono:
Pinehohawaku hinao lere anggorono
a laano pongku anu mewalo.
2Ibingkuo ka itadi ira watuno,
ipompahoakono keu anggoro bininiki;
onae mowangu asa menara podagaia i tonga-tongano
ka mongkeke aa pomporo'ia anggoro.
Ka i'amba sumikorio lere atuu ka ipehasiliako wua anggoro,
sine anu ipehasiliako wua anggoro anu mo'olo.
3Kanandio-andio, hei palilino Yerusale,
ka to Yehuda,
bitaraomo olono ongkue ka lere anggoroku.
4Hapa mbo'uke anu asalakono wineweu a lere anggoroku atuu
anu napi kuweweuo ndi onae?
Kusikorio ka ipehasiliako wua anggoro,
tembio anu ipehasiliako butu wua anggoro anu mo'olo?
5Gagi kanandio-andio, aku pauakomiu
hapa anu aku weweuo a lere anggoro-Ku atuu:
Aku tumuehio wala ruino,
ranta lere atuu ipingko kinaa,
aku mobangkuo rere watuno,
ranta ka ilinolanda lere atuu;
6aku mo'ineeo
nahi pinesampai ka nahi binondei,
ka ituwu ewo ka rui;
aku parenta ira seru,
ka si dopompotii usa i wawono.
7Hangano lere anggoro-Do Ueno luwuakoano
onaemo sukudo to Isaraeli,
ka to Yehuda
onaemo bonde anu inehe-Do;
Dosikorio moleoa,
sine butu lambaha anu hinao,
Dosikorio menteea,
sine butu marisua anu hinao.
Pontekudaako mongkona mperupa-rupa nahina moleoa
5:8-24
8Masola ntu'u mia anu mansa mompewinsoki raha melimba a raha susua
ka moronto lere melimba a lere susua,
ranta nahina mbo'u po'iangado mia susua.
Imeweweuo butu koroimiu anu mpo'iangario wita atuu.
9A biriku teronge sumpa-Do Ueno luwuakoano,
”Menteeano hadio raha ta gagi boni-boni;
luwuno raha anu langkai ka tekosi
nahi ta hina mo'iangario.
10Menteeano, lere anggoro anu maluano hopulu semedi
ta mehasiliako butu asa bati anggoro;
ka inii asa homeri
ta mehasiliako butu asa efa tarigu.”
11Masola ntu'u mia anu mewangu mo'o-mo'oru
ka tetutu mo'ungke inua anu mompokomolangu,
ka i'amba mentoro-toro hawe wongi,
molanguako anggoro!
12Katapi ka gambusu, rebana ka siloli,
saru anggoro mokomaroao luwuno pogawedo,
sine wineweu-Do i Ue nahi pinelangkai
ka inangga-Do i Ue nahi pinerio.
13Onaemo pu'uno, bawaa-Ku asalakono melako a pontadia,
hangano nahi domponto'ori hapa-hapa;
luwuno mia anu maramba ira memokoninggo,
ka mia hadio ira memarasai mokoranga.
14Onaemo pu'uno, tolinodo mia mate ta umungkahio burokono temalua
ka ta konganga-nganga nahina otuano,
ranta i larono tampulaomo mewantano ka maroano Yerusale,
magagano ka mawongkoa i kota atuu.
15Ka mia ta pinokompetuundu,
ka mia ta pine'uru-uru,
humbee, mia mompelangka-langkai ta pine'uru-uru.
16Sine Ondae Ueno luwuakoano lano tedoa mantande a laro moleoa-Do,
ka Ondae Ue Ala anu tedoa mempori mokomengkaao pentoroa-Do a laro menteea-Do.
17Bimba ira mpongkaa ewo i ra'ai kana a mpada po'iangado,
anano bembe ira mpo'ungke mpongkaa a nterongkano rahano mia kaea.
18Memasola ira ntu'u anu mpo'ungke-ungkeako sala mompake koloro pegaupi
ka hala mompake kolorono porende roda,
19anu mpotae, ”Moikoomo Ondae Ue Ala ka Doronga
mokogagio wineweu-Do,
ka tomengkitao;
moikoomo tinoo-Do Anu Tedoa mempori, Ue Alado to Isaraeli,
ka i'umpedamo ka imengkaa, ka tomento'orio.”
20Masola ntu'u anu motae wineweu mosa'o atuu moiko
ka moikoa atuu mosa'o,
anu balio wongi-wongi gagi mewine
ka mewine gagi wongi-wongi,
anu balio mopa'i gagi mo'ahi,
ka mo'ahi gagi mopa'i.
21Masola ntu'u mia anu tumuduo koroino pande mosongka,
anu tumuduo koroino pande!
22Masola ntu'u mia anu mokora mo'inu
ka anu pande ntu'u monsalo inua anu mompokomolangu;
23anu mokomenteeo mia mosa'o gauno hangano pompowee nahi pototono
ka anu humapuo tiano mia mentee.
24Onaemo pu'uno, kana elo api mongkaa seami,
ka kana ewo mokari pingko tampula a laro langano api,
kanatuumo luwuno hakado ta moboo,
ka sisino mpenee kana awu,
hangano nahi domentarimao pompaguru-Do Ueno luwuakoano
ka mentatao pau-Do Anu Tedoa mempori, Ue Alado to Isaraeli.
Tongkudo mia mehawe gagi pesalaano tekuda-Do i Ue
5:25-30
25Onaemo pu'uno, tesingkaomo tekuda-Do i Ue a bawaa-Do,
kae-Do Dopotiio ndi ondae ka Dotunduhi ira;
torukuno mpondidi-ndidi, ka wata ngkoroido
kana ta'i a ntonga nsala.
Maupo gagiomo luwuno andio, tekuda-Do napi temonto,
ka kae-Do kongkono pinotii.
26Ira mowuatako bandera tiano tongku anu inso a olaino,
ka momansu moboi ira inso i tompano tolino;
menteeano ira koa ronga me'aiwa mpotuturako!
27Nahina maupo te'asa mia i olodo anu mokendo, nahina maupo te'asa mia anu tetidu;
ondae nahi domerodo ka nahi dontekoturi,
nahi tepotola peboo ntongado,
nahi tebite onggono sandalado;
28ana mpanado pinokomontasoomo,
ka luwuno panado linongkuomo;
kukuno ngarado motea kana watu api
ka bolano karetado kana lompiu.
29Pengaolido kana singa waino,
kana singa mongura dompengaoli;
ondae mperaali ka mporako kaangado,
mewawao mpelulu ka nahina mokompotolao.
30A oleo atuu ira mperaali
kana tahi u'uru.
Tewala mia mengkita i tolino,
tengkita butu wongi-wongi anu mompokoma'iso,
ka mewine gagi wongi-wongi hangano seru!
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
LAI 2021