Yesaya 42
42
Penanino Tetenaa-Do i Ue
42:1-9
1 #
Mat. 3:17; 17:5; Mrk. 1:11; Luk. 3:22; 9:35 #
Mat. 12:18-21
Kitao, atuu tetenaa-Ku anu inini-Ku,
mia bininiki-Ku, anu ndi onae Kupemoikoo.
Kunaaomo Penaa-Ku ndi onae,
ka ipokomengkaao songka a luwuno tongku.
2Onae nahi ta mebooli ke mokolangkaio suarano
ke moporongeo suarano a nsala.
3Balo anu telupe nahi ta umotuhio,
sumbu anu mo'oro langano nahi ta mepateo;
onae ta metenunu mokomengkaao songka.
4Onae nahi ta gagi momite ka nahi ta telupe,
ranta ka iteahakono songka i tolino;
luwuno togo mpoperorohi pompaguruno.
5 #
Tin. 17:24-25
Kanandiomo pau-Do Ue Ala, Ue,
anu mokogagio langi ka wileo,
anu tumalesakono tolino saru luwuno anu tuwu i wawono,
anu moweeakono penaa a mia anu mo'iangario
ka penaa ndi ondae anu mentuwu i wawono:
6 #
Yes. 49:6; Luk. 2:32; Tin. 13:47; 26:23 ”Ongkue, Ue, Kupoboikomo a laro menteea,
Ku'iniomo kaemu;
Kuweweukomo ka mokogagiko
po'oloti pedandia tiado mia,
mewineno luwuno tongku,
7ka mowile mata anu morawu,
ka moluarako mia hinuku inso a ntorungku
ka luwuno mia anu mpentoro a wongi-wongiano inso a raha po'ukoa.
8Ongkue Ue, onaemo nee-Ku;
nahi Kupeweengakono maramba-Ku a nsusuaano
ke telele-Ku a ntinaha.
9Mongkona anu pinau i ndi'ipua kanandio-andio gagiomo mengkaa,
mongkona anu wo'ohu Aku pauo.
Se'eluno ipe'umbaako mongkona atuu,
Aku mopoto'oriakomu.”
Po'unde-unde ndi Ondae i Ue anu gagi pongkiari
42:10-17
10Penaniakonomo penani wo'ohu tia-Do i Ue
ka unde-unde Iramo inso i tompano tolino,
hei omiu anu mpetii a ntahi, hei luwuno ihino,
luwuno togo saru luwuno palilino.
11Moikoomo ipokolangkaio pada one suarano
saru luwuno kotano ka inia anu dompo'iangario to Kedari!
Moikoomo domengkokora-kora palilino Pongku Watu,
moikoomo dompeboo-booli inso a punsuno luwuno torukuno!
12Moikoomo dompelangkai Ira i Ue,
ka mempaleleo maramba-Do a luwuno togo.
13Ondae i Ue meluarako metea kana pongkiari,
kana sorodadu Dopokingkio roso-Do metea; maroa
Ondae kokora-kora, oo, mebooli Ira hio,
a luwuno iwali-Do Dopokomengkaao pongkiari-Do.
14Nahi Kupepau mompu'u i ndi'ipua,
menoro-noro Aku, Kupeteao aroa-Ku;
kanandio-andio Aku meraepi kana beine anu me'ana,
Aku memuuli ka mewunsuli.
15Aku mokolonda ira torukuno ka pongku,
ka mokomoleuo luwuno pinopahono;
Aku weweuo luwuno korono gagi wita motu'i
ka mokomo'are ira limbo.
16Aku tumaate ira mia memorawu
a nsala anu nahi domento'orio,
a pesalaa anu nahi domento'orio.
Aku wawa ira mpelempa.
Aku weweuo wongi-wongi i arodo gagi mewine
ka wita anu mpebanga-bangano gagi wita anu merete.
Mongkonamo anu kanatuu Aku weweuo ndi ondae,
anu asalakono Aku weweuo.
17Mia anu mompe'ala-ala a lahumoa pina'o
ta mewolili i bungkuno ka mokoko'ii,
kanatuumo mia anu mpotae a ntinaha tinawa,
”Omiumo pinesombaimami.”
I Isaraeli, tetenaa-Do i Ue anu morawu ka nahi gagi
42:18-25
18Rongeomo, hei mia memobongo
pengkitamo ka kitaomo, hei mia memorawu!
19Isemake anu morawu sangkadio tetenaa-Ku,
ka anu mobongo kana tinena anu tinena-Ku?
Isemake anu morawu kana tinena-Ku
morawu kana tetenaa-Do i Ue?
20Hadio anu kinitamu, sine nahi upekokoongakono,
uta'oo birimu, sine nahi poronge.
21Dopemoikoomo i Ue hangano moleo-Do
ka ipinokomengkaa langkaino ntu'u ka marambano pompaguru-Do;
22sine ondae asa tongku anu pinomuru ka rinontu,
luwudo ntekonta a laro ngkineke
ka mewinuni a laro raha po'ukoa; ondae megagi pomurua
ka nahina anu motola ira,
ka gagi rontua ka nahina anu motae, ”Pokuleomo!”
23Isemake i olomiu anu behe monta'o biri tiano mongkona andio,
anu behe mompekokoongako ka merorongeakono tiano tempo anu ta hawe?
24Isemake anu meweengakono i Yako ka irinontu,
ka i Isaraeli a anu mompomuru?
Kombake Ondae i Ue isa'a? Hangano, mentehala kitamo ndi Ondae.
Ondae nahi domebehe mentondao sala-Do,
ka pompaguru-Do nahi dobehe merongeo.
25Onaemo pu'uno, Do'uwuo ndi onae mokulano tekuda-Do
ka mongkokongirino peteaa,
anu mokomo'aio inso a luwuno siuno, sine nahi pe'o'oleakono,
ka anu tumunuo, sine nahi pekokoongakono.
Currently Selected:
Yesaya 42: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
