Yesaya 38

I Hisikia mahaki ka pinokotompa

38:1-22

(2Mok. 20:1-11; 2Taw. 32:24-26)

1I tempo atuu i Hisikia mahaki ka tedeipo imate. Nabi Yesaya anano i Amosi aiwa ka ipotae ndi onae, ”Kanandiomo pau-Do i Ue: pobintamo pe'oliwi a nsomborimu, hangano omue komate, nahi kotompa mbo'u.” 2I Hisikia wolilio rupano me'aro a rere ka mekakai ndi Ondae i Ue. 3Ipotae, ”Oo, Ue, po'ineeomo ka Irambeo nine tuwu akumo metenunu i aro-Miu ka inso a moputeno aroaku; moweweu akumo hapa anu moiko a pongkita-Miu.” Ka i'amba i Hisikia mengese tedoa mompemasusa. 4Haweomo pau-Do i Ue ndi Yesaya, 5”Lakomo ka pauakonomo i Hisikia: Kanandiomo pau-Do i Ue, Ue Alano i Daudi, uempu'umu: Kurongeomo pekakaimu ka Kukitaomo uwoi matamu. Menteeano Aku mokomelaio tumuwumu hopulu ka olima nta'u mbo'u. 6Aku motolako ka kota andio inso a ngkaeno mokoledo to Asiuri ka Aku walao kota andio. 7Ndiomo anu ta gagi petondoni inso ndi Ondae i Ue nine Ondae i Ue Ira weweuo hapa anu Dodandiomo: 8Menteeano, eo-eo a mpontiso mata oleo wineweuno i Ahasi Aku weweuo mosuka hopulu laampa'a i bungkuno inso a olono anu ipelempaiomo.” A mpontiso mata oleo atuu wantano oleo mbo'u mosuka i bungkuno hopulu laampa'a inso a olono anu ipelempaiomo.

9Powadino i Hisikia, mokoledo to Yehuda, umarino mahaki ka tompa inso a hakino;

10Ongkue andio motae: A entongano tinuwuku

asalakono aku lumako,

a mpewowa langkaino tolinodo mia mate ongkue tinantuako

a ntoreano tinuwuku.

11Kupotae: nahi aku kumita Ira mbo'u i Ue

a witado mia mentuwu;

nahi aku mongkita mbo'u maupo te'asa mia

i olodo palilino tolino.

12Laika po'iangaku rinongka ka linimba

kana kemano puu pompakambi;

tuwuku pinalulu kana sawu hinoru,

Dopoleio kana toreano bana hinoru.

Meene wongi Ipo'inee aku,

13mebooli aku mepetulungi hawe mo'oru;

kana singa kanatuumo Dopuro-puroo i Ue luwuno wukuku;

meene wongi Ipo'inee aku.

14Kana manu-manu wowitu kanandiomo kupepiuli,

suaraku nahi meroku kana suarano marapatii.

Mataku mokendo mentombu i wawono,

oo Ue, ongkue tepokonsii; gagimo pe'iniaku!

15Hapake anu aku mokopauo ka kupauo ndi Ondae i Ue?

Komba Ondaemoke anu weweuo?

Molehako nahi kupompokoturi

hangano maparino tuwuku.

16Oo Ue, hangano ndiomo aroaku merorohi Komiu;

pokorodoomo aroaku,

pokomadoo aku, po'ineeomo ka kukongko tuwu!

17Menteeano, pompemarasai anu pinembasaiku gagiomo tekaduduiaku;

Ipe'eheo ntu'u sumangaku tola inso a masolaa.

Mentee ntu'u, Itadiomo luwu halaku

inso i aro-Miu.

18Hangano, tolinodo mia mate nahi poko'unde-unde Komiu,

ka matea nahi poko'umunde-unde komiu;

luwuno mia anu metii a laro ngkaburu

nahi ponsikori petenunu-Miu.

19Sine mia anu tuwu, oo butu koa mia tuwu

anu moko'unde-unde komiu,

kana ongkue oleo ndio;

petenunu-Miu ipauakono ama

a luwuno anano.

20Ondae i Ue memoikoo kumadudui aku!

Aiwamo to mpo'unio katapi,

asa ntinuwuto

a Raha-Do i Ue.

21Ka i'amba motaeomo i Yesaya, ”Moikoomo i inala asa laba wua ara motu'i ka hinahiako a mpiho atuu ka itompa!” 22Se'eluno i Hisikia motaeomo, ”Hapeke anu ta gagi petondoni nine aku lumako i Raha-Do i Ue?”

Currently Selected:

Yesaya 38: XMZ

Highlight

Copy

Compare