Yesaya 35
35
Tekaduduiado bawaa-Do i Ue
35:1-10
1Pada one ka wita motu'i ta mo'unde,
pada malua ta kokora-kora ka mensisi;
2kana bunga rosi onae ta marombo sisino,
mengkokora-kora, oo mengkokora-kora ka maroa mengkokora-kora.
Marambano Libano ta wineeako ndi onae,
mewantano Karameli ka Saroni;
oo, ira mengkitao maramba-Do i Ue,
mewanta-Do Ue Alato.
3 #
Ibr. 12:12
Pokorosoomo kae anu molema
ka pokorosoomo olontuu anu leedu.
4Pauako iramo mia anu motewe aroado,
”Impokorosoo aroamiu, siimo imedoito!
Kitaomo, Ondae Ue Alamiu Ira hawe saru pombaloa,
saru pohuku-Do Ue Ala.
Ondae isa'a hawe kumadudui komiu!”
5 #
Mat. 11:5; Luk. 7:22 I tempo atuu matano mia morawu ta pinokotompa,
ka birino mia mobongo ta moronge.
6I tempo atuu mia pungku ta melonso-lonso kana rusa
ka ngangano mia bebe ta kokora-kora;
hangano mata uwoi mesumpiri i pada one,
ka korono a mpada malua.
7Wita me'one anu mokula-kula ta gagi limbo,
ka wita londa gagi insoano uwoi;
a mpepomboleano serigala
ta tuwu intowu ka tole balaba.
8I ra'ai ta hina sala langkai,
anu nineeako Sala Mempori;
mia anu nahi mempori nahi ta lumaloo,
– sine sala atuu pinatindaako bawaa-Do –
mia mpelakopi ka maupo mia benge-benge nahi ta tesaa i wawono.
9I ra'ai nahi ta hina singa,
kondehora lambaha nahi ira ntelaloio
ka nahi ta hinawe i ra'ai;
sine mia anu mentinolosi ira mpelempa i ra'ai,
10mia anu mempinotola-Do i Ue ira mpekule
ka mpewinso i Sioni saru mengkokora-kora,
po'unde nahina tampulaano ta gagi peramba-ramba uludo;
mawongkoa ka po'unde ta buke ndi ondae,
masusa ka pompemasusa me'olaiako.
Currently Selected:
Yesaya 35: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
