Yesaya 33
33
Ondae i Ue gagi puu pongkadudui ka mokole i Sioni
33:1-24
1Masolakomo ntu'u, hei anu monsolangi anu napi sinolangi,
ka omue, hei puu mporuntu anu napi rinontu!
Tewala umarikomo monsolangi, omue isa'a kosinolangi;
tewala omue umari morontu, omue isa'a korinontu.
2Oo Ue, Ipehohawa kami,
Omiu sinisikorimami!
Igagimo kae pongkongkomimami sompo mo'oru,
ka tekaduduiamami i tempo ma'isoa!
3Tempono teronge suara rurundu mpolai iramo tongku,
tempono Ipentade ntesiarawo iramo suku tongku.
4Mia mpopumpu pinomuru kana kosume modoko mongkaa montele kaangano;
domensapoio kana ponsapoino bawaano kosume.
5Ondae i Ue tedoa mantande, hangano Ondae mo'ia a mantandeano;
Sioni Dopokobukeakono moleoa ka menteea.
6Ta hawe tempo rodoamu,
hadio ntu'u tekaduduia, ponto'ori anu mentee ka ponto'ori.
Doitoako Ira i Ue, onaemo arataa kaeano Sioni.
7Kitao, miano i Arieli mperaali a nsala,
anu mentinena mpo'ema manangai mpengese mpopemasusa.
8Luwuno sala langkai gagi boni-boni
ka mia mpelakopi nahina mbo'u.
Pedandia hinapuomo,
luwuno sakosii nahina tinarima,
ka mia nahi tinudu.
9Wita mo'inombo ka me'i'isei;
Libano montembi pontata ka gagi telusa;
Saroni gagiomo kana pada malua,
Basani ka Karameli rumonta leweno.
10Kanandio-andio, Aku mentade, pau-Do i Ue,
kanandio-andio, Ongkue mo'ia a mantandeano ntu'u,
kanandio-andio, Ongkue pinokomantande!
11Omiu mementiaako ewo mokari,
ka komiu mpe'anaako seami;
tekudamiu onaemo api anu kumaakomiu.
12Tongku ira mentinunu gagi kapuru,
ira mentinunu a laro api kana poleno ewo rui.
13Hei mia anu me'olai, rongeomo hapa anu Kuweweuomo,
hei mia anu me'umpeda, to'oriomo moroso-Ku!
14Mia mentehala ntededengke i Sioni
mia anu mpebungkui Ira i Ue ipabawai ira doitoa.
Dompotae, ”Isemake i oloto anu polio mo'ia umpeda api anu mompokomo'ai andio?
Isemake i oloto anu polio mo'ia umpeda a pompotuwua api anu nahina tampulaano andio?”
15Mia anu tuwu a laro menteea,
anu mepau a menteeano,
anu nahi pontarima untu hasilino pompokonsiia,
anu metapisakono kaeno, ka si pontarima pompowee nahi pototono,
anu umonsoo birino, ka si rongeo tinoo po'uwua rea,
anu mepusu, ka si kitao wineweu mosa'o,
16onaemo kana mia anu mo'ia rodo a mpo'ianga mantande,
benteno mo'ia a pongku watu anu melaapimpi;
rotino wela tetinda, uwoi inuano sompo.
17Matamu ta kumitao mokole a laro marambano,
ta kumitao wita anu tewile malua.
18Aroamu ta rumambeo mongkokongiria anu umariomo,
”Isuake puu mpodoa, isuake puu mpontimba,
ka isuake mia anu dumoa ira menara?”
19Nahi kokumitao mbo'u tongku anu nahi ponto'ori gau atuu,
tongku anu pepauno nahi mengkaa menteeno, nahi tino'ori,
anu pepauno montala'u'u, nahi pinokonto'ori.
20Kitaomo Sioni, kota tepumpua langkaito!
Matamu ta kumitao Yerusale, po'ianga anu rodo, kema anu nahi pelimba-limba,
pandorano kongkono mpiha nahi binuta,
ka luwuno kolorono nahi ta tebite.
21I ra'ai Ondae i Ue atuu maramba Ira ntu'u ndi ontae,
kana po'ianga bukeako korono ka waaano anu malua;
nahi telaloio bangka binose,
ka nahi sakio kapala langkai.
22Hangano, Ondaemo i Ue puu mpobitarato,
Ondaemo i Ue tadulako sorodaduto;
Ondaemo i Ue mokoleto,
Ira kumadudui kita.
23Luwuno koloromu luntuomo,
nahi pokotanggoo moroso karuno somba a mpo'iangano,
nahi pokowileo somba.
I tempo atuu mia ira mpetia-tiao hadio rinontu,
ka maupo mia pungku ta mo'ala pinomuru.
24Nahina maupo te'asa mia anu mo'ia i ra'ai ta motae, ”Ongkue mahaki,”
ka luwuno palilino ta inampuni salano.
Currently Selected:
Yesaya 33: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
