Yesaya 31
31
Ondaemo i Ue kumongkomio Sioni
31:1-9
1Masola ntu'u mia anu lumako mepetulungi i Masiri,
anu momperorohi ngara,
anu mompe'ala-ala a ngkaretano anu hadio,
ka a sorodadu mpengara anu tedoa hadio,
sine nahi dompengkita ndi Ondae Anu Tedoa Mempori, Ue Alado to Isaraeli,
ka nahi dome'ungke Ira i Ue.
2Sine, Ondae tedoa pande mosongka.
Ira mompotii masolaa,
ka nahi Dopokuleo pau-Do;
Ira mentade umewai ira mia mpoweweu mosa'o,
ka umewaio anu mompokowali mia lambaha.
3Hangano to Masiri mia koa, komba Ue Ala,
ka ngarado onaemo anu ta tampula, komba penaa.
Tewala Dotandeo i Ue kae-Do,
telendoomo anu montulungi ka tedontaomo anu tinulungi,
ondae mepingko luwu mate mperonga-ronga.
4Hangano kanandiomo pau-Do i Ue ndi ongkue:
Kana asa singa ke singa mongura bamburu kumorahakono pinongko'alano,
ka nahi tededengke rumongeo peboolido luwuno bawaano puu mpopakambi
anu tinena umewaio,
ka nahi tenangi a magagado,
kanatuumo Ondae Ueno luwuakoano Ira metii metea
a wawo ntorukuno Sioni ka a wawo pongkuno.
5Kana manu-manu mongkapa-kapa a wawo nsenono,
kanatuumo Ondae Ueno luwuakoano Ira kumongkomio Yerusale,
kumongkomio ka kumaduduio,
dumagaio ka motolao.
6Impepokulemo, hei to Isaraeli, ndi Ondae anu tedoa iramo pinebungkui! 7Mentee ntu'u, a oleo atuu omiu singge mia ta tumadio lahumoa salaka ka lahumoa wulaano wineweuno kaemiu anu bukeako hala.
8Asiuri ta tebangkuako ponai, sine komba ponaino mia,
ka ta pingko ikaano ponai, sine komba ponaino pe'asa miano;
ondae ira mpolai inso a mponai,
ka mia mongurado ira megagi puu mpo'angga dinadai.
9Anu kumadudui ira ta moliu hangano doito,
ka tadulako sorodaduno ta molai tededengke binta ira bandera,
kanandiomo pau-Do i Ue
anu me'ueo api i Sioni
ka awu pompotuwua api i Yerusale.
Currently Selected:
Yesaya 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
