Yesaya 29
29
Yerusale kinadu sine kinadudui
29:1-8
1Masola ntu'u Arieli, Arieli,
kota pekemaano i Daudi!
Po'ineeomo ta'u me'eu ta'u
luwuno porame-ramea pinotilaloako me'eu-eu!
2Aku mokoma'isoo Arieli,
ranta mia mpekalaki ka mpopemasusa,
ka kota atuu ta gagi kana pompotuwua api ndi Ongkue. 3Aku mekema kumaduko,
ka moweweu po'ianga pompadasoa ka ute'asi,
ka mompontade hadio bente pekorahakoa kumaduko.
4Omue komepau inso i totono, inso a laro wita,
pinaumu nahi teronge lahi inso a laro pampawu;
suaramu ta me'uni kana suarano onitu inso a laro wita,
ka pinaumu ta teronge kana petanga-tanga inso a laro pampawu.
5Sine, pehowuno sorodadudo iwalimu ta tampula kana awu motutu,
ka pehowuno mia lambaha ta gagi kana kuli mpae anu tepanee.
Hangano nahi kinoo-koo, i larono asa mpiniro,
6kokumitao hawe-Do Ueno luwuakoano
a laro rundu, lelu ka uni mongkokodoito, a laro lompiu ka angi mokora,
a laro langano api anu mongkaa ranta ka ipingko.
7Ka i'amba pehowuno sorodadudo tongku
anu mpetea umewaio Arieli,
luwuno mia anu meteaakono ka luwuno bente pekorahako pongkaduano,
mia anu mpokoma'isoo
ta kana mo'ipi ka kana pongkita wongi.
8Kana pandirino asa mia anu mokoninggo mo'ipi onae tekonai mongkaa,
mansano mekaangako, kompono da mooa,
ke kana pandirino asa mia anu mokoranga mo'ipi onae tekonai mo'inu,
mansano mekaangako, mengkaa onae da mokendo, burokono da motu'i,
kanandiomo teweweuno pehowuno sorodadudo tongku
anu mpetea umewaio torukuno Sioni.
Tataano tongku anu morawu
29:9-16
9Intekokodohomo, ranta ka intekokodoho mpiha,
impepusumo, ranta ka impepusu mpiha!
Imemolangumo, sine komba hangano anggoro,
impobangku-bangkumo, sine komba hangano ara!
10 #
Rom. 11:8
Hangano Doweweu komiumo i Ue ka impoturi rodo;
matamiu, onaemo luwuno nabi, Dopokompepusu iramo
ka rupamiu, onaemo luwuno puu pongkita, Doborungi iramo.
11Ndi omiu pongkita inso a luwuno atuu kana ihino asa wunta anu tinondoni. Tewala atuu wineeako mia anu bisa mobasa, saru pe'oliwi, ”Basaomo andio,” onae ta sumangki, ”Nahi kupolio hangano wunta atuu tinondoni.” 12Tewala wunta atuu wineeako mia anu nahi pokompobasa, saru pe'oliwi, ”Basaomo andio,” onae ta sumangki, ”Nahi kupokompobasa.”
13 #
Mat. 15:8-9; Mrk. 7:6-7 Mepau Iramo i Ue,
”Hangano tongku andio aiwa me'umpedaako ngangano
ka melangkaia-Kune wiwino,
sine aroano olai inso ndi Ongkue,
ka pesombano ndi Ongkue
butu koa parentano mia anu hinapalano,
14 #
1Kor. 1:19
menteeano, Aku weweu ira mbo'u
mongkona anu kinohali-haliako a tongku andio,
kinohali-haliako anu mompokotededengke;
ponto'orido mia anu mponto'ori ta tetadi,
ka pandedo mia anu mempande ta tampula.”
15Masola ntu'u mia anu wunio tedoa ondalo
tinoono ndi Ondae i Ue,
anu luwuno inanggano iweweuo a laro wongi-wongi
saru motae, ”Isemake anu kumita kami
ka isemake anu tumo'ori kami?”
16 #
Yes. 45:9; Rom. 9:20 Luwuno impoposuleo!
Polioke anu moweweu parewa inso a wita pulu pinongkena kana wita pulu?
Polioke anu wineweu mepau mongkona anu weweuo,
”Komba onae anu weweu aku?”
Polioke anu wineweu tadeno mepau mongkona anu weweuo,
”Onae nahi ponto'ori hapa-hapa?”
Tekaduduia ineuaako pompokonsiia
29:17-24
17Kombake tedeimo koa mbo'u tempo,
Libano ta bali gagi lere wua mpinopaho,
ka lere wua mpinopaho ta rineke tobu?
18I tempo atuu mia mobongo ta rumongeo
luwuno pauno asa wunta,
ka tepotola inso a wongi-wongia,
matano mia morawu ta mongkita.
19Mia ntebobarasai ira mpo'unde mbo'u ndi Ondae i Ue,
ka mia anu tedoa memongkokolaro ira mengkokora-kora mpo'unde ndi Ondae Anu Tedoa Mempori, Ue Alado to Isaraeli!
20Hangano mia lambaha ntu'u ta menaa-naa ka puu mpopasinggiri ta pingko,
ka luwuno mia anu magasi mpoweweu mosa'o ira mempinokotampula,
21ondaemo anu moruana mpopokosala mia a laro asa kara-kara,
ka mpota'oakono oho anu monteahako songka a mpewowa langkai,
ka anu mpoposule moleoa a mia mentee me'empehiako anu nahi mengkaa pepu'uano.
22Onaemo pu'uno, kanandiomo pau-Do i Ue, Ue Alado inuleno i Yako,
Ondaemo anu tumolosio i Burahima,
”Mompu'u kanandio-andio i Yako nahi pohawe mbo'u mokoko'ii,
ka rupano nahi momite mbo'u.
23Hangano, i tempono domengkitao inuleno,
hapa anu wineweuno kae-Ku i tongado,
ira mpokomemporio nee-Ku;
ira mpokomemporio Anu Tedoa Memporino i Yako,
ka dontededengkeako Ira Ue Alado to Isaraeli;
24mia anu tesosaelo pinewowolono ta humaweo pengkonaano,
ka mia anu hadio pompemasusano ta mohawe pompaguru.”
Currently Selected:
Yesaya 29: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
