Yesaya 21
21
Pohuku-Do anu pabawa a nto Babeli
21:1-10
1Pau-Do anu pabawa a ”Mpada One i Wiwi Ntahi.”
Kana lompiu sumapoio Wita Nege,
kanatuumo haweno inso i pada one, inso a wita anu mongkokodoito.
2Aasa pongkita anu mongkokongiri pinaleleomo ndi ongkue,
”Puu porontu morontu, puu ponsolangi monsolangi!
Lakomo, hei Elami, kaduomo, hei Madai!
Luwuno pompemasusaa hangano onae Aku mokompenaa-naao.”
3Onaemo pu'uno, tongaku tedoa mahaki,
mahaki kompo umalu aku
kana mahakino kompono beine anu me'ana;
mompemasusa aku hangano hapa anu rinongeku,
tededengke aku hangano hapa anu kinitaku.
4Aroaku tesosanggelo, doitoa lumimbu aku,
tekamburi anu kinekewoiku
ibalio gagi asa anu mompokodoito.
5Meda pinatinda,
pentoroa me'inatora,
mia mpongkaa ka mpo'inu.
”Hei tadulako sorodadu impepatindamo!
imelanaomo kanta!”
6Kanandiomo pau-Do i Ue ndi ongkue,
”Lakomo, naaomo asa mia puu pompadaso,
hapa anu kinitano asalakono ipauakomu.
7Tewala mongkita asa bawaa,
sorodadu mpengara mpepasa-pasa,
bawaano kalide, bawaano unta,
asalakono ipekokoongakono ntu'u
ka tedoa mantii.”
8Ka i'amba mebooliomo mia anu mongkita atuu,
”A pompadasoa, oo ueku, mentade aku
asa oleo mondo,
ka a mpodagaia metangkoro aku
i larono asa wongi.”
9 #
Meng. 14:8; 18:2 Kitao, mehawe iramo asa bawaa mia,
sorodadu mpengara mpepasa-pasa!
Ka i'amba mebooliomo,
”Tedontaomo, tedontaomo Babeli,
ka luwuno tinaha lahumoano
ntesiarawo a wita.”
10Hei tongkuku anu tinunduhi ka linolanda!
Hapa anu rinongeku inso ndi Ondae Ueno luwuakoano,
Ue Alado to Isaraeli, kupauakomumo.
Pau-Do anu pabawa a nto Duma
21:11-12
11Pau-Do anu pabawa a nto Duma.
Asa mia mebooli ndi ongkue inso i Seiri,
”Hei puu mpodagai, da tehineke wongi andio?
Hei puu mpodagai, da tehineke wongi andio?”
12Puu mpodagai atuu sumangki,
”Mo'oru ta hawe, sine wongi mbo'u.
Tewala komiu mpesikeno, ime'aiwamo mbo'u ka impesikenomo!”
Pau-Do anu pabawa a nto Arabia
21:13-17
13Pau-Do anu pabawa a nto Arabia.
A ntonga ewo, a mpada malua komiu mperato,
hei to Dedani anu mpebalu-balu!
14Hei palilino wita Tema,
impeluarakomo, wawaomo uwoi a mia anu mokoranga,
lakomo, totowoako iramo roti mia mpolai!
15Hangano ondae mpolaiako ponai,
oo inso a mponai anu tebuta,
inso a mpana anu linongkuomo,
ka inso a mongkokongiriano peteaa.
16Hangano kanandiomo pau-Do i Ue ndi ongkue, ”I larono tempo asa nta'u mbo'u, mengkena kana luwuno oleodo sorodadu mentinambo, luwuno marambano Kedari ta pingko. 17Inso i olodo puu pompona anu moroso ka mosia inso a inuleno i Kedari anu ta tebinta tedeimokoa, hangano Dopauomo i Ue, Ue Alado to Isaraeli.”
Currently Selected:
Yesaya 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
