Yesaya 19

Pau-Do anu pabawa a nto Masiri

19:1-25

1 # Yer. 46:2-26; Yeh. 29:1–32:32 Pau-Do anu pabawa a nto Masiri.

Kitao, Ondae i Ue me'ula a nseru anu magasi

ka aiwa i masiri;

luwuno lahumoa i Masiri mpondidi-ndidi i aro-Do,

ka aroado to Masiri gagi tengkuru a laro aroado.

2Aku lumelu ira to Masiri umewai ira to Masiri,

ka dompetea, sompo mia umewaio pepaekompono,

ka sompo mia umewaio walino,

kota mo'ewai kota,

poparentaa mo'ewai poparentaa;

3sumangado to Masiri ta tetadi,

ka tinoodo ka Aku mokomarisuo;

ondae ira mpo'ema pontiso a lahumoa ka a mia anu mpebali-bali mata,

a onitu ka a mpenaa mpopau anu nahi manasa ta gagi.

4Aku meweengako ira to Masiri

a ngkaeno asa mia pe'uea anu lambaha,

ka asa mokole anu lambaha ta parenta ira;

kanandiomo pau-Do Ueno asa wawontolino.

5Uwoi inso a ngkoro Nili ta pingko,

ka korono atuu ta gagi motu'i ntu'u.

6Luwuno potilaloano ta mewoo mana moboo,

ka luwuno ana ngkoro Masiri ta gagi morempe ka motu'i,

ewo gelaga ka teberau ta gagi moleu.

7Ewo i wiwino ka ngangano kora Nili

ka luwuno wita pontiwua a ngkoro Nili

ta gagi mokari ka tampula ipuurio angi.

8Anu puu mporako bou ira mpopemahaki,

luwuno anu mpomeka a ngkoro Nili ira mpopemasusa,

luwuno anu mpobuani i ra'ai ira mpe'i'isei.

9Mia anu mpoweweu lena ira memokoko'ii,

beine anu mpoweweu ponsango wuu ka anu mpohoru ira megagi momite.

10Anu mpohoru atuudo ta tedoa masusa aroado.

Luwuno anu mpo'angga mentinambo ta masusa aroado.

11Anu langkai potorodo ndi Soani mia mebenge-benge mpena;

Puu pompatuduno i Pirao anu lalu monto'ori

mompowee patudu anu nahina pengkonaano.

Kana'umpeke komiu polio mpotae ndi Pirao,

”Ongkue andio inuledo mia pande mompewowolo,

inuledo mokole tempo se'eluno”?

12Isua irake miamiu anu pande mompewowolo?

Po'ineeomo ka domempaleleakomiu saru mempauakomiu

hapa anu Ira putusio Ueno luwuakoano mongkona Masiri.

13Anu langkai potorodo ndi Soani mpoweweu nahi mentee,

anu langkai potorodo ndi Memipisi ntepopandei iramo;

anu mempinemota'u a nsukudo

wawa ira to Masiri a masolaa.

14Doweweuomo i Ue

penaa marisua i olodo,

anu weweu ira to Masiri memarisu a laro luwuno usahano,

kana mia molangu anu mokolili ulu tempono melua-lua.

15Ka nahina usahano Masiri anu ta mehasili

anu wineweuno petewawa ka atano,

wineweuno pu'uno ka sampano.

16I tempo atuu to Masiri ira mengkana beine; ira mpondidi-ndidi ka ntededengke a ngkae-Do Ueno luwuakoano anu pino'io-Do ndi ondae. 17Ka wita Yehuda ta gagi tewukado to Masiri, ka sompo domempauo mia i arodo, ira mpondende hangano pomputusi anu inala-Do Ueno luwuakoano umewai ira.

18I tempo atuu ta hina olima kota i Masiri anu mpepauako pau Kana'a ka anu mpesumpa mpetenunu ndi Ondae Ueno luwuakoano. Asa i olono ta pinau Ire-Heresi.

19I tempo atuu ta hina meda pontunua pesomba ndi Ondae i Ue i tongano wita Masiri ka tugu pepopoto'ori ndi Ondae i Ue a ntidano. 20Onae atuu ta gagi petondoni sakosii ndi Ondae Ueno luwuakoano i wita Masiri; tewala mpebooli ira ndi Ondae i Ue hangano luwuno pompokonsii, asalakono Ira tumenao asa mia Puu Pongkadudui ndi ondae, anu ta merokuhi ka ta motola ira. 21Ondae i Ue Ira mepokomengkaa a nto Masiri, ka to Masiri ira mento'ori Ira i Ue i tempo atuu; ondae ira mpesombaako pesomba sinumbele ka pesomba kaanga, ka ira mpontanga ndi Ondae i Ue saru me'owahio pontanga atuu. 22Ondae i Ue Ira tumunduhi ira to masiri, Ira montunduhi ka mompokotompa; ka ira mpepokule ndi Ondae i Ue ka Ira uminduo pekakaido saru mokotompa ira.

23I tempo atuu ta hina sala langkai inso i Masiri lumako i Asuri, ka masiri ira mpesomba mperonga-ronga to Asuri.

24I tempo atuu Isaraeli, gagi anu ko'otolu i horino Masiri ka Asuri, ta gagi ronso i wawontolino, 25anu rinonso-Do Ueno luwuakoano saru pau, ”Rinonsoomo Masiri, bawaa-Ku ka Asuri wineweuno kae-Ku, saru Isaraeli, tia pusaka-Ku.”

Currently Selected:

Yesaya 19: XMZ

Highlight

Copy

Compare