IBARANI 6
6
1Onaemo pu'uno aiwamo tomebintao pu'uno amba-ambano inso a pompaguru mongkona Ondae i Kerisituu ka tompelimba a tetiangino anu mentee. Si tomenaao mbo'u pu'uno tepidia inso a luwuno wineweu anu nahina tuduno, ka empehino pompe'ala-ala ndi Ondae Ue Ala, 2onaemo pompaguru mongkona mperupa-rupa pebahoa, modampoako kae, pewanguado mia mate ka pohuku anu nahina tampulaano. 3Ka onaemo anu kita meweweuo, tewala Do'induo Ue Ala. 4Hangano ondae anu horio pinokomewine aroado, anu horio mpenamio pompowee inso i suruga, ka anu horio mohawe tia a laro Penaa Mempori, 5ka anu menamio pau anu moiko inso ndi Ondae Ue Ala ka luwuno pompoweeno wawontolino anu ta hawe, 6sine anu humapu Ira mbo'u Ue Ala, nahi ira mempinokowo'ohu tepohona mbo'u kanarau, ranta ka dontepidi, hangano domempaso Ira mbo'u Ana-Do Ue Ala tiano koroido ka mokongkodei Ira i arodo mia hadio. 7Hangano wita anu mo'oso uwoi usa anu mararu ipetii i wawono, ka anu mehasiliako hadio pinopaho anu mentudu ndi ondae anu me'anggao, montarima ronso inso ndi Ondae Ue Ala; 8#Teg. 3:17-18 sine tewala wita atuu mehasiliako tonga ewo rui ka ewo rui, nahina tuduno ka umpedaomo a pontotonaa, anu poko'ariano sinongko.
Me'ini moroso a pomperorohia
6:9-20
9Sine, hei pepaekompoku luwu-luwu anu kinekewoiku, maupo kimpotae kanandio mongkona omiu, kimpe'ala-alao, nine hinao ndi omiu anu lalu moiko, anu mowawa tekaduduia. 10Hangano Ondae Ue Ala komba nahi Domoleo, ranta Ira kumolupeo inanggamiu ka pompehohawamiu anu pinopokitamiu te'aro a nee-Do hangano pompekakaakomiu a luwuno mia mempori, anu da imeweweuo hawe kanandio-andio. 11Sine inehemami, ka isingge mpopokitao bobotolino aroamiu anu mengkena mokogagio pomperorohimiu asa pe'umbua anu manasa, hawe a pokotompaano, 12ka si megagi mongguu, sine megagi anu tumonda ira anu hangano pompe'ala-ala ka pompedato mohawe tia a laro hapa anu dinandi-Do Ue Ala.
13Hangano tempono Ondae Ue Ala weeakono i Burahima dandi-Do, mesumpa Ira a ngkoroi-Do Ondae-Do, hangano nahina mia anu lalu mantande sekono Ondae, 14#Teg. 22:16-17 pau-Do, ”Menteeano Aku rumonsoko hadio ntu'u ka weweuko tedoa hadio.” 15I Burahima sabara mesikori ka hangano kanandio ihaweo hapa anu dinandiako ndi onae. 16Hangano mia mesumpa a neeno mia anu lalu mantande, ka sumpa atuu gagi aasa pompokoroso ndi onae, anu mokotampulao luwuno pengengea. 17Onaemo pu'uno, ka ilalu manasado anu tekona mentarimao dandi atuu ka dompe'ala-alao koa ntu'u manasano pomputusi-Do, Ondae Ue Ala wutuakono sumpa koroi-Do, 18hangano orua mengkaaano anu nahi bali, mongkona isua Ondae Ue Ala nahi Ira megaupi, ontae anu mpo'ungke pepekaduduia, ka tompohawe pompokoroso mentehaweo pomperorohia anu mo'ia i aroto. 19#Ima. 16:2 Pomperorohia atuu onaemo ladu anu moroso ka mokorodoo sumangato, anu pineladuakoomo hawe a bungkuno pelingo, 20#Pud. 110:4 i tu'aimo Dopewinso i Yesu gagi Pese'eluto, tempono Dogagi Sando Mpesomba Langkai ranta nahina tampulaano, montonda atorano i Melekisede.
Currently Selected:
IBARANI 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
