GALATIA 6
6
Imemambetulungimo
6:1-10
1Pepaekompo, tewala mansa hinawe asa mia moweweu aasa polimpaia songka, omiu anu hinao rohani, asalakono mewawao mia atuu a nsala anu menteeako penaa mauru, saru metangkoroo koroimiu, ka si kona komiu mbo'u po'ara-arahako. 2Imemambetulungimo tumembio tinembimiu! Kanandiomo ime'ihiio songka-Do i Kerisituu. 3Hangano tewala potaeno asa mia, nine onae mentudu, kahinaano onae nahina ntu'u tuduno, ipopo'oo onaeno koroino. 4Sompo mia moikoomo ka ipepenteeo inanggano onaeno; ka moiko imemawongkoakono kumitao teweweuno onaeno ka komba mongkita teweweudo mia susua. 5Hangano sompo mia ta tumembio tinembino onaeno. 6Ka moikoomo onae, anu montarima pompaguru a mpau-Do i Ue, ka dopetiao saru mia anu paguruo atuu luwuakoano anu hina ndi onae. 7Si ntepopo'oo! Ondae Ue Ala si Dopinepalindoako. Hangano hapa anu rinawono mia, onae koa mbo'u ta sinowino. 8Hangano ba isema morawo a tuwu ntolinono, onae ta sumowi matea inso a ntuwu tolinono, sine ba isema morawo a Mpenaa, onae ta sumowi tuwua anu nahina tampulaano inso a Mpenaa atuu. 9Si tonte'osa mpoweweu moiko, hangano tewala haweomo tempono, kita mensowi, tewala komba gagi kita memolema. 10Onaemo pu'uno, tekonai da hinao tempoto, aiwamo ka tompoweweu moiko a luwuno mia, sine tamoako lahi a wali-walito pe'asa pompe'ala-ala.
Pompopoto'ori ka tabea
6:11-18
11Kitaomo, kana'umpe langkaino luwuno hurupu anu kuburiakono kaeku hawe ndi omiu. 12Ondae anu mentuwu tolino inehedo mentandeo koroido, ondaemo anu mpeteahako medadai komiu ka impetindi, butu tinoodo, ka si domebinobarasai hangano keu pinotamba-Do i Kerisituu. 13Hangano maupo ondae anu mpetindi, nahi dompekakaakono songka Taura. Sine po'ehedo, ka impetindi, ka dompokomawongko a nteweweumiu anu tuwu ntolino. 14Sine ongkue nahi kubehe ntu'u mawongko, sangkadio a ngkeu pinotamba-Do Ueto i Yesu Kerisituu, hangano Ondae ka kupinasoako wawontolino a ngkeu pinotamba, ka ongkue tiano wawontolino. 15Hangano metindi ke nahi petindi nahina pengkonaano, sine anu pinokogagi wo'ohu, onaemo anu hinao pengkonaano. 16Ka luwuno mia, anu meweengakono koroino itaateo pontiso andio, po'ineeomo rodoa ka pompehohawa ka ipetii ndi ondae ka a nto Isaraeli bawaa-Do Ue Ala. 17Ka i'amba si hina mia anu mokonsusa aku, hangano a ngkoroiku kongko luwuno petondoni mia-Do i Yesu. 18Pompehohawa-Do Ueto i Yesu Kerisituu kumongkomio penaamiu, luwuno pepaekompo! Ami.
Currently Selected:
GALATIA 6: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
