GALATIA 4
4
Nahina mbo'u te'ataa
4:1-11
1Anu tinoo onaemo: tempono asa mia anu me'umbuo pusaka napi sompo tinuwuno, maupo tedei nahina teposisinggeno saru aasa ata, maupo onae umbuno luwuakoano; 2sine onae mo'ia i totono anu mekariao ka dinagai hawe a tempo anu ipakosiomo amano. 3Kanatuu koa mbo'u ontae: tempono napi sompo tinuwuto, mpetuundu kita koa mbo'u a hadio rupa po'eheno wawontolino. 4Sine mansano sompoomo tempono, onaemo ka Dotenao Ue Ala ana-Do, anu pine'anaakono asa beine ka metuundu a songka Taura. 5#Rom. 8:15-17 Ondae tinena ka Dotolosi ira, anu mpetuundu a songka Taura, ka tomentinarima gagi ana. 6Ka hangano omiu ana, onaemo ka Dotena Ira Ue Ala Penaa-Do ana-Do i laro aroato, anu mebooli, ”Oo Abba, oo Ama!” 7Gagi omiu komba ata mbo'u, tendeano ana; tewala ana komiu, saru koa omiu mbo'u umbuno pusaka, hangano Ondae Ue Ala. 8I ndi'upua, tempono nahi imento'ori Ira Ue Ala, impe'atao koroimiu a luwuno pinesombai anu menteeano komba Ondae Ue Ala. 9Sine kanandio-andio umarimiu mento'ori Ira Ue Ala, ke moikoopo, umari-Do tumo'ori komiu Ue Ala, kana'umpeke ka komiu mpepokule mbo'u a mperupa-rupa pabawano wawontolino anu molema ka mongkokolaro ka mpompu'u mpe'atao mbo'u koroimiu ndi onae? 10Omiu pompesu'ui mpelangkaio luwuno oleo anu pinakosi, luwuno wula, tempo ka ta'u anu wela pinelangkai. 11Salalaro aku ba mansa nahina tuduno kupe'i'iseiakomiu.
Impewowoloomo penggoeato amba-ambano
4:12-20
12Ku'emao ndi omiu, pepaekompo, imegagimo kana ongkue, hangano ongkue mbo'u gagi akumo kana omiu. Napi kuhori mompembasai hapa anu nahi moiko inso ndi omiu. 13Imento'orio, nine amba-ambano kupaleleo Lele Mawongkoa ndi omiu hangano mahaki aku. 14Maupo kanandio teweweuno koroiku atuu, anu gagi po'ara-arahako ndi omiu, komba imengkodei aroaakono ka memokoburuakono, sine imentotowo akumo, mengkena kana montotowo asa mala'eka-Do Ue Ala, tendeano mengkena kana tumotowo Ira i Kerisituu Yesu. 15Tedoa komiu meme'ura i tempo atuu! Ka kanandio-andio, isuaomoke me'uramiu atuu? Hangano ongkue mokompesakosii mongkona omiu, nine bakana igagi, imegogoiomo matamiu ka imeweeakune. 16Nde ba mompau menteea ndi omiu gagi akumo iwalimiuke? 17Memokua ira mpeteahako ka dompoko'ala komiu, sine komba a moleono aroado, hangano ira mponsua komiu inso ndi ongkue, ka imemokua koa tumonda ira. 18Lano moiko ba imokua mia meteahako mompete'umala mia susua a moikoa, poolo a sompo tempo ka komba butu ba kukongko i olomiu. 19Hei anaku, hangano omiu ka kupe'i'isei kana mahaki me'ana mbo'u, hawe rupa-Do i Kerisituu gagi mengkaa i laromiu. 20Tedoa aku tekewoi ka kukongko i olomiu i tempo andio ka mokompepauako suara anu susua, hangano nami kuto'orio ba kana'umpe umaropi komiu.
I Hagari ka i Sara
4:21-31
21Pauakunemo, hei omiu anu ineheno tuwu i totono songka Taura, nahi merongeoke songka Taura? 22#Teg. 16:15; 21:2 Komba hinaoke teburi, nine i Burahima hinao anano orua, asa mia inso a beine anu gagi atano ka asa mia inso a beine anu maradeka? 23Sine ana inso a beine anu gagi atano atuu pine'anaako montonda koroi ntolino ka ana inso a beine anu maradeka atuu hangano dandi. 24Andio onaemo aasa potundaano. Hangano beine orua ira atuu onaemo orua pompakosi-Do Ue Ala: anu aasa mepu'u inso i torukuno Sinai ka me'anaako ira ana nte'ataa, onaemo i Hagari – 25I Hagari onaemo torukuno Sinai i witado to Ara – ka onae mengkena saru Yerusale anu kanandio-andio, hangano onae tuwu a laro nte'ataa saru luwuno anano. 26Sine Yerusale nsuruga onaemo beine anu maradeka, ka onaemo ineto. 27#Yes. 54:1 Hangano hinao teburi,
”Po'undemo, hei anu biita anu nahi hori me'ana!
Temawongko ka peboo-boolimo po'unde, hei omue anu nahi hori
memarasaio mahaki me'ana!
Hangano anu binintano tamano ta laluaopo hadio anano
sekono anu metama.”
28Ka omiu, pepaekompo, mpengkena komiu kana i Saki onaemo ana dinandi. 29#Teg. 21:9-10 Sine kana i ndi'upua, onae, anu pine'anaako montonda koroi ntolino, bobarasaio anu pine'anaako montonda Penaa, kanatuu koa mbo'u kanandio-andio. 30Sine hapa pinauno Wunta Mempori? ”Saariomo ata beine atuu saru anano, hangano anano ata beine atuu nahi ta gagi me'umbuo pusaka meronga saru anano beine maradeka atuu.” 31Onaemo pu'uno, pepaekompo, ontae komba anano ata beine, tendeano anano beine maradeka.
Currently Selected:
GALATIA 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
