GALATIA 2
2
I Paulu dome'akuio luwuno tinena
2:1-10
1 #
Tin. 11:30; 15:2 Ka i'amba mansano laloomo hopulu ka opaa nta'u, lumako aku mbo'u i Yerusale saru i Baranaba ka maupo i Titu kuwawao mbo'u. 2Lumako aku me'empehiako aasa pepokomengkaa. Ka ndi ondae kupopauo Lele Mawongkoa anu pinaleleku i olodo luwuno tongku komba Yahudi – a laro mpepau-paua anu susua ndi ondae anu mentinudu –, ka si kolako-lako mpena kupeteahako ke meteahako akumo. 3Sine maupo i Titu, anu meronga saru ongkue, onaemo aasa to Yunani, sine komba dinadai ka ipetindi. 4Lano hinao pedada inso a mia mpo'onde-onde pepaekompo anu mansa mpewinso, onaemo ondae anu mpewuni mpewinso i larono ira mempoporooo maluaato anu hinaweto ndi Ondae i Kerisituu Yesu, ka ihina pesalaado mpokompe'ata kita. 5Sine maupo tesarai nahi kimebehe mposuka ka mpetuundu ndi ondae, ka ipokompo'ia mpiha ndi omiu menteeno Lele Mawongkoa. 6#Win. 10:17 Ka mongkona ondae anu topotaemo mentinudu atuu – ba kana'umpe potorodo i ndi'upua, nahi kukereo atuu, hangano Ondae Ue Ala nahi Dopongkita rupa – maupo kana'umpe, ondae anu mentinudu atuu nahina dompedadaakono anu susua ndi ongkue. 7Sine tendeano, mansado mengkitao nine pine'ala-alaakoomo ndi ongkue pompalelea Lele Mawongkoa a mia nahi dompetindi, mengkena kana ndi Peturu a mia mpetindi 8— hangano Ondae anu moweeakonomo roso i Peturu ka igagi tinena a mia mpetindi, Ondae koa mbo'u anu moweeakunemo roso a mia anu nahi dompetindi. 9Ka mansado mengkitao pompehohawa anu kuwineeako, onaemo i Yakobu, i Kepa ka i Yohane, anu tinudu gagi perorohiado bawaa, mpesangkalimaakune ka saru i Baranaba gagi tondonino tepo'asaa, omami ka kilako a mia anu nahi dompetindi ka ondae a mia anu mpetindi; 10butu omami asalakono mpewowolo ira mpiha mia memongkokolaro ka lano onaemo atuu anu kuteahakono ntu'u weweuo.
I Paulu teposisala saru i Peturu
2:11-14
11Sine tempono hawe i Kepa i Antiokia, kupauakono ntu'u i arono umewaio, hangano onae saala. 12Hangano napi domehawe ba opia mia inso ndi Yakobu, onae mongkaa me'asaako ira pepaekompo anu nahi dompetindi, sine mansado mehawe, onae monsuka ka olaiako ira hangano idoitoako ira pepaekompo anu mpetindi. 13Ka to Yahudi anu mehano mbo'u ntetonda mpo'onde-onde saru onae, ranta i Baranaba isa'a tetonda hangano po'onde-ondedo. 14Sine tempono kukitao, nine peleludo atuu nahi penunu saru menteeno Lele Mawongkoa, kupotaeakono i Kepa i arodo luwudo, ”Tewala omue, aasa to Yahudi, tuwumo pelahumoa ka komba kana to Yahudi, kana'umpeke ka upokodadai ira pepaekompo anu nahi dompetindi ka domentuwu kana to Yahudi?”
Anu lalua, saru mbo'u tiado to Kerisituu inuledo to Yahudi
2:15-21
15Montonda hinaamami onaemo to Yahudi ka komba mia ntehala inso a luwuno tongku susua. 16#Pud. 143:2; Rom. 3:20, 22 Imento'orio, nine nahina maupo te'asa mia anu pinokomentee hangano iweweuo songka Taura, sine hangano pompe'ala-ala ndi Ondae i Kerisituu Yesu. Onaemo pu'uno omami mbo'u kimpe'ala-ala Iramo i Kerisituu Yesu, ka kimempinokomentee hangano pompe'ala-ala ndi Ondae i Kerisituu ka komba hangano meweweuo songka Taura. Hangano, ”nahina maupo te'asa mia anu pinokomentee” hangano iweweuo songka Taura. 17Sine tewala omami isa'a, kontongaamami mpeteahako ka kimempinokomentee ndi Ondae i Kerisituu mengkaa nine mia mentehala, nde onaeke atuu pengkonaano, nine Ondae i Kerisituu puu pompekakaako hala? Naahi ntu'u. 18Hangano, tewala wali aku wanguo hapa anu kubetaomo kupokomengkaao koroiku gagi polimpai songka Taura. 19Hangano songka Taura onaemo ka kumateakono songka Taura, ka kutuwuako Ira Ue Ala. Pinaso akumo a ngkeu pinotamba saru Ondae i Kerisituu; 20maupo kanatuu tuwu aku, sine komba da ongkueku mbo'u anu tuwu, tendeano Ondae i Kerisituu anu tuwu i laroku. Ka tuwuku anu kutuwuako a ngkoroiku kanandio-andio, onaemo tuwu hangano pompe'ala-ala ndi Ondae Ana-Do Ue Ala anu mehohawa akumo ka meweengakono koroi-Do hangano ongkue. 21Pompehohawa-Do Ue Ala kutarimao. Nde tewala hinao menteea hangano songka Taura, nahina tuduno mate-Do i Kerisituu.
Currently Selected:
GALATIA 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
