Esera 1

I Koresi umindu ira mia mentinawa mpekule wali mpowangu Raha Mpesombaa

1:1-11

1 # Yer. 25:11; 29:10 # 2Taw. 36:22-23 A nta'u amba-ambano poparentaano i Koresi, mokole i Peresia, Ondae i Ue lumeluo aroano i Koresi, mokole Peresia atuu, ka ite'ihii pau-Do iUe anu pinauno i Yeremia. Onaemo ka ipinalele pepopoto'ori andio a luwuno poparentaa, pinau ka binuri, kanandio, 2#Yes. 44:28”Kanandiomo songkado i Koresi, mokole i Peresia: Luwuno poparentaa i wawontolino, Dowee akumo i Ue, Ue Alano asa wawontolino pabawaio. Ondae tumena aku mowangu Raha Mpesombaa i Yerusale, i wita Yehuda. 3Isema ndi omiu anu tewinso bawaa-Do, po'ineeomo ka Dokongkomio Ue Alano, ka ipepokule i Yerusale, i wita Yehuda, ka iwanguo Raha-Do i Ue, Ue Alado to Isaraeli, Ondae Ue Ala anu mo'ia i Yerusale. 4#Yes. 10:20-22; Pel. 12:35-36Sompo mia anu da tebinta maupo isua ipo'ia kana mia hawe, asalakono palili i tu'ai mpoweeakono salaka, wulaa, arataa ka pinotuwu, saru pesomba a moleono aroado, tiano powangu Raha-Do Ue Ala i Yerusale.”

5Onaemo ka dompepatinda petewawado suku Yehuda ka to Benami saru luwudo sando mpesomba ka to Lewi, sompo mia anu aroano Doleluo Ue Ala ka ipekule mowangu Raha-Do i Ue i Yerusale. 6Luwuno mia petengi-tengido mpopokowali mpompowee sangka salaka, wulaa, arataa ka pinotuwu, saru pompowee anu mentudu, naapo mbo'u luwuakoano anu dompesombaakono a moleono aroado.

7Mokole Koresi metena mbo'u lumuarakono parewano Raha-Do i Ue anu winawano i Nebukanesa inso i Yerusale ka inaao a laro raha pesombaa susua. 8I Koresi, mokole i Peresia, metena kai linuarako luwu ka idagaio i Metireda, puu pompekaria arataano mokole, onae anu dumoaakono luwu i Sesibasari, petewawado to Yehuda.

9Ndiomo burino; tolu pulu loea kodei wulaa, asa nsowu loea kodei salaka, rua pulu ka osio piso, 10tolu pulu piala wulaa mekaru, hinao mbo'u pato etu ka hopulu piala salaka mekaru, asa nsowu sangka susua. 11Luwuno parewa wulaa ka salaka atuu, porokono lima nsowu ka pato etu.

Luwuno atuu iwawao i Sesibasari i Yerusale, tempono dompekule mia mentinawa atuu inso i wita Babeli.

Currently Selected:

Esera 1: XMZ

Highlight

Copy

Compare