Yehesikieli 9

Mia mosa'o gaudo i Yerusale pinepate

9:1-11

1Ka ku'amba rumonge Ira mebooli suara-Do meroku, ”Asalakono mia anu ta molempao pohuku a ngkota andio aiwa me'umpedaako, singge mia saru parewa poropu a ngkaeno!” 2Kitao, onoo mia tama aiwa inso te'aro a Mpewowa Langkai Wawono, anu me'aro i utara, singge mia saru parewa pontunduhi a ngkaeno. Asa mia i olodo mesangka lena ka a ntongano hinao parewa poburi. Ondae mpewinso ka mpentade i horino meda pontunua pesomba mala. 3I tempo atuu maramba-Do Ue Alado to Isaraeli tetandeomo inso a wawo kerubi, po'iangano amba-ambano, a wawo montoweano pewowano Raha Mempori ka Dopoboio mia anu mesangka lena ka hinao parewa mpoburi a ntongano. 4#Meng. 7:3; 9:4; 14:1Pau-Do i Ue ndi onae, ”Pelempamo inso i tonga-tongano kota Yerusale ka buriomo aasa petondoni a ra'ido mia anu pompemasusa hangano luwuno wineweu mokoburu anu wineweu i ra'ai.” 5A anu susua kuronge Ira mepau, ”Tondaomo inso i bungkuno telalo a ngkota atuu ka weweuomo pompepatea siimo pompehohawa ka nahina mokoko'undua. 6Pompepate ka ropu ira mia anu mota'u, ana ntama kontuwuado, ka ana beine kontuwuado, nana'ote kodei ka luwuno beine! Sine, luwuno mia anu tinondoniomo, si danggi ira! Pompu'umo inso a mpo'ianga mempori-Ku!” Ka do'amba mpompu'u inso a mia memota'u anu mekongko i arono Raha Mempori. 7Ka Do'amba mepau ndi ondae, ”Kokoburutiomo Raha Mempori atuu ka kintalano buketiakonomo mia anu mempinepate. Lakomo!” Lumako iramo meluarako ka weweuo pompepatea a laro ngkota. 8Kontongaado pompepate, tempo atuu bininta aku asa-asaku, ongkue menggolontu mesomba ka mebooli, kupotae, ”Oo, Ue Ala, nde Iropu ira luwuke to Isaraeli anu da tebinta a laro te'uwuno tekuda-Miu i Yerusale?” 9Dosangki aku, ”Salado suku Isaraeli ka Yehuda tedoa langkai, ranta wita andio bukeako rea ka kota andio bukeako poweweu nahina moleoa. Hangano, dompotae, ’Wita andio Dobintaomo i Ue ka nahi Dokitao i Ue.’ 10Onaemo pu'uno Ongkue mbo'u nahi Kupompehohawa ka nahi Kumokoko'unduakono. Aku dumunsiako ira peleludo a uludo.”

11Kitao, mia anu mesangka lena saru parewa poburi a ntongano pauo ndi Ongkue, ipotae, ”Kuweweuomo kana anu Ipeparentaako ndi ongkue.”

Currently Selected:

Yehesikieli 9: XMZ

Highlight

Copy

Compare