Yehesikieli 7
7
Tampulaano Yerusale hawe
7:1-27
1Ka i'amba haweomo pau-Do i Ue ndi ongkue, 2”Omue, anano mia, pauomo: Kanandiomo pau-Do Ue Ala a wita Isaraeli:
Poko'ariano!
Poko'arianomo opaa siuno wita atuu.
3Kanandio-andio umariamu hawe
ka Aku umuwuo tekuda-Ku ndi omue.
Aku bitarako menunu saru pelelumu
ka mombalo ndi omue
luwuno wineweumu anu mokoburu.
4Nahi Aku mehohawako ka nahi ta hina pompehohawa.
Sine, Aku mombalo ndi omue menunu saru pelelumu
ka luwuno wineweumu anu mokoburu ta umaluko.
Ka komiu mento'orio nine Ongkuemo Ue.
5Kanandiomo pau-Do Ue Ala:
Kitao, masolaa metuda-tuda ta hawe!
6Tampulaano aiwa,
tampulaamu hawe.
Onae mewangu umewaiko;
kitao, onae haweomo!
7Masolaa hawe ndi omue,
hei palilino wita!
Tempono haweomo,
tempono umpedaomo! Oleo marisua,
komba pebooli mawongko a luwuno torukuno.
8Kanandio-andio Aku ronga umuwuo mosa'ono aroa-Ku ndi omue
ka motiio tekuda-Ku ndi omue.
Aku bitarako menunu saru pelelumu
ka mombalo ndi omue luwuno wineweumu anu mokoburu.
9Nahi Aku mompehohawa ka nahi ta hina pompehohawa;
Aku mombalo ndi omue menunu saru pelelumu,
ka luwuno wineweumu anu mokoburu ta umaluko.
Ka komiu mento'orio nine Ongkuemo Ue, anu montunduhi.
10Kitao, oleono hawe koa ntu'u.
Masolaa mewurosi;
pompokonsiia mentumba,
pompelangka-langkai te'ili.
11Pobobarasaia lumele gagi pontumbo mebungkui Ira i Ue.
Nahina anu tebinta inso ndi ondae, moiko inso a ngkaeaa maupo mare'eano;
tekosino mbo'u ta tepahihi.
12Hawe tempono, oleono umpedaomo!
Po'ineeomo anu mo'oli ka si mawongko ka anu mo'asa ka si pompemasusa,
hangano mokulano tekuda umaluo luwuno kaeado.
13Hangano, anu mo'asa nahi ta mekule a inasano,
maupo ondae da i tonga-tongano mia mentuwu.
Menteeano mokulano tekuda umaluo luwuno kaeado ka nahi pinoko'onto mbo'u.
Nahina maupo te'asa mia mokompeteahakono tuwuno hangano salano.
14Ondae pompuuri tawuwua ka luwuakoano tepatinda,
sine nahina maupo te'asa mia lumako metea,
hangano tekuda-Ku umaluo luwuno kaeado.
15Ponai kongko i bungkuno kota,
haki lele ka mokoninggoa kongko i larono.
Ba isema i bungkuno kota ta mateako ponai,
ka ba isema i laro kota ta mate hangano mokoninggoa ka haki lele.
16Maupo tewala inso ndi ondae hinao anu tola,
ira mpo'ia a luwuno torukuno kana marapatii a luwuno lembono;
luwuno mperaali,
singge mia hangano salano.
17Luwuno kae telupe
ka luwuno mia pasi'eme doito.
18Ira mpopokona sawu po'inombo,
doitoa pabawai ira.
Luwudo ira ntekoko'ii
ka luwuno ulu ta kineru londa.
19Salakado ta pinetadiako i bungkuno
ka wulaado ta rineke tesosa'ai.
Wulaa ka salakado nahi ta mokokadudui ira a oleo tekuda-Do i Ue. Nahi ira memowohiako onae ka kompodo nahi ta te'ihiiako onae. Hangano mongkona atuu gagi watu tetidua anu dumontai ira a laro salado.
20Peramba-ramba tekosi dompokonao gagi pompelangka-langkai.
Inso a mperamba-ramba atuu domeweweuo luwuno tinaha anu mokoburu ka luwuno lahumoado.
Onaemo pu'uno, Aku weweuo tesosa'ai ndi ondae.
21Aku meweengakono gagi rinontu a ngkaedo mia hawe
ka gagi pinomuru a mia mosa'o gauno i tolino
ka ondae andio ira mengkokoburutio.
22Aku wolilio rupa-Ku inso ndi ondae.
Luwuno anu pompomuru atuu ira mengkokoburutio raha-Ku anu masuli olino;
ira mpewinso i larono
ka mengkokoburutio.
23Patindao pompongu,
hangano wita atuu bukeako pasua rea
ka kota atuu buke pobobarasaia.
24Aku tumena ira tongku anu lalu lambaha
ka luwuno tongku andio ira me'alao luwuno rahado gagi tiado.
Aku mokompenaa-naao pompelangka-langkaido mia moroso,
ka luwuno po'ianga memporido mbo'u ta kinokoburuti.
25Doitoa hawe;
ondae mpo'ungke sintuwua, sine nahina.
26Masolaa metuda-tuda ta hawe,
lele metuda-tuda ta telele.
Ondae mpo'ungke-ungke pongkita inso a nabi;
pompaguru moliu inso a nsando mpesomba,
ka patudu inso a mia memota'u.
27Mokole ta mo'inombo,
ka petewawa ta pabawaio doitoa
ka kaedo luwuno palilino wita atuu gagi telusa tedoa doito.
Aku weweu ira menunu saru peleludo
ka bitara ira menunu saru gaudo mpobitara.
Ka iramo mento'orio nine Ongkuemo Ue.”
Currently Selected:
Yehesikieli 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
