Yehesikieli 5

1Omue, anano mia, alaomo asa ponai anu montaso ka pakeomo atuu gagi piso pongkeruno puu mpogonti. Keruakonomo atuu wuumu ka danggomu. Ka i'amba alaomo asa pontimba ka tiaomo wuumu. 2Asa ntia otolu asalakono ka utunuo a api i tonga-tongano kota atuu umarino tampulaomo tempo pongkadua; asa ntia otoluno mbo'u asalakono alao ka utotopiakono ponai atuu lumimbuo kota; ka asa ntia otoluno mbo'u rawoomo a angi ka Aku butao ponai i bungkudo. 3Omue asalakono mo'ala tedei inso a wuu atuu ka tumongoo a tompa hawumu.

4Pohona mbo'u omue asalakono umalao asa ntia inso ndi onae, petadiakono a laro api ka tunuomo atuu. Inso i ra'ai ta meluarako api ka ikaano luwuno suku Isaraeli. Ka i'amba potaemo ndi ondae, 5Kanandiomo pau-Do Ue Ala: Ndiomo Yerusale! Onae Kunaao i tonga-tongado tongku ka hinao luwuno wita lumimbuo. 6Onae umewaomo a luwuno atora-Ku mosa'oopo wineweuno sekonopo luwuno tongku ka a luwuno pompakosi-Ku mosa'oopo wineweuno sekonopo luwuno wita pehori-horino. Menteeano, nahi domentarimao luwuno atora-Ku ka peleludo nahi penunu saru luwuno pompakosi-Ku. 7Onaemo pu'uno, kanandiomo pau-Do Ue Ala: Omue mosa'oopo wineweumu sekonopo luwuno tongku pehori-horimu ka pelelumu nahi penunu saru luwuno pompakosi-Ku, ka mbo'u nahi uweweuo luwuno atora-Ku, tendeano luwuno atorado tongku pehori-horimu nahi uweweuo. 8Onaemo pu'uno, kanandiomo pau-Do Ue Ala: Kitao, Ongkue, oo Ongkue isa'a gagi ewaimu ka Aku modontaiakomu pohuku i arodo luwuno tongku. 9Hangano luwuno wineweumu anu mokoburu atuu, Aku weweuo ndi omue hapa anu napi Kuhori weweuo ka nahi Aku weweuo mbo'u. 10#Pons. 4:10Onaemo pu'uno, i olomiu ama ta kumaano anano ka ana ta kumaano amano. Aku modontaiakomu pohuku ka sumiarawoo luwuno anu tebinta inso ndi omue a luwuno siuno angi. 11Onaemo pu'uno, a nee-Ku anu tuwu, kanandiomo pau-Do Ue Ala, menteeano, hangano po'ianga mempori-Ku omue kumokoburutiakono luwuno pinesombai ka wineweuno kaemu anu mokoburu, Ongkue isa'a sumesewoko; nahi Aku mompehohawa ka mokoko'unduakomu. 12Asa ntia otolu inso ndi omue ta mate kona haki lele ka mate mokoninggo i tonga-tongamu; asa ntia otolu mbo'u ta mate ikaano ponai a mpehori-horimu; ka asa ntia otolu mbo'u Aku sumiarawoo a luwuno siuno angi ka Aku butao ponai i bungkudo. 13Aku motiio tekuda-Ku ndi ondae, ranta ka imorini mokulano aroa-Ku ka teende Akumo. Ira mento'orio nine Ongkuemo Ue anu pauo a laro pompemasusa-Ku, tempono Kupotiio mosa'ono aroa-Ku ndi ondae. 14Aku weweuko gagi tekale-kale ka tetewehia i olodo luwuno tongku a mpehori-horimu i arodo luwuno mia anu ntelalo. 15Omue kogagi tetewehia ka pepaukia, gagi pepopoto'ori ka pu'uno mongkokongiriado luwuno tongku a mpehori-horimu, tempono Kupoweeakomu pohuku a laro ntekuda ka mokulano aroa a laro pontunduhino a mosa'o aroa. Ongkue, Ue, anu pauo, 16tempono Kupotiiakomu mokoninggoa anu mongkokongiri, anu mompepate. Kupotiio ka ipepate komiu, tempono Kutiangio mongkokongirino mokoninggoa ndi omue ka rumopuo pepatinda kaangamu. 17#Meng. 6:8Aku mompotiiakomu mokoninggoa ka luwuno kondehora lambaha i tonga-tongamu, anu ta rumopu ira anamu. Haki lele ta lumele ka rea ta waa i tonga-tongamu ka Aku mompotiiakomu ponai, Ongkue, Ue, anu pauo.”

Currently Selected:

Yehesikieli 5: XMZ

Highlight

Copy

Compare