Yehesikieli 43

Ondae i Ue mekule a Raha Mempori a laro marambaa

43:1-12

1Ka i'amba wawa aku a mpewowa langkai, pewowa langkai anu me'aro i sabaano oleo. 2#Yeh. 10:3-4, 18-19; 11:22-23Mentee ntu'u, maramba-Do Ue Alado to Isaraeli hawe inso i sabaano oleo, suara-Do kana u'uruno uwoi mentoa, ka tolino mewanta hangano maramba-Do. 3Pongkita anu kinitaku atuu kana pongkita anu kinitaku tempono Do'aiwa Ira rumopuo kota atuu ka kana pongkita anu kinitaku a wiwi Ngkoro Kebari. Ka ku'amba menggolontu mesomba. 4Maramba-Do i Ue mewinso a laro Raha Mempori telalo a mpewowa langkai anu me'aro i sabaano oleo. 5Penaa tumande aku ka wawa aku a kintala i larono, mentee ntu'u, Raha Mempori atuu bukeako maramba-Do i Ue. 6Ka ku'amba rumonge Ira mepau ndi ongkue inso i larono Raha Mempori atuu, kontongaano mia anu sumongkao Raha Mempori atuu mentade i horiku. 7Pau-Do ndi ongkue, ”Hei anano mia, ndiomo po'iangano kadera poparentaa-Ku ka po'iangano pelengkaru-Ku. I ndi'aimo Aku mo'ia i tonga-tongado to Isaraeli ranta nahina tampulaano. Suku Isaraeli nahi ira mengkokoburutio mbo'u nee-Ku anu mempori, moiko ondae maupo luwuno mokoledo, hangano pebelesua ke saru wata ngkoroido luwuno mokoledo anu memate iramo, 8ke saru menaao montoweano pewowado umpeda montoweano pewowa-Ku ke montade ira karuno pewowado umpeda karuno pewowa-Ku ranta butu rere anu umoloti Aku inso ndi ondae. Saru luwuno wineweudo anu mokoburu, ondae mengkokoburutio nee-Ku anu mempori, onaemo ka Kupingko ira a laro ntekuda-Ku. 9Kanandio-andio, ira mpoko'olaio pebelesua ka wata ngkoroido luwuno mokoledo inso ndi Ongkue ka Aku mo'ia i tonga-tongado ranta nahina tampulaano.

10Omue, hei anano mia, pauako iramo suku Isaraeli mongkona Raha Mempori andio, ka domegagi memokoko'ii a luwuno salado, ka mongkona tadeno ka posongkano. 11Tewala domemokoko'iiakono luwuakoano anu wineweudo, gambaraomo Raha Mempori atuu, luwuno tiaano, luwuno pewowa peluarakoa ka luwuno pewowa pewinsoano ka luwuno gambarano rangkano. Pauako iramo luwuno atora ka songkano, ka buriomo atuu i arodo ka dompetenunu meweweuo luwuno songka ka atorano. 12Ndiomo pompakosi mongkona Raha Mempori atuu: luwuno wita i punsuno torukuno atuu tedoa mempori. Mentee ntu'u, onaemo atuu pompakosi mongkona Raha Mempori atuu.”

Luwuno songkano meda pontunua pesomba ka poronsoano

43:13-27

13 # Pel. 27:1-2; 2Taw. 4:1 Ndiomo luwuno songkano meda pontunua pesomba atuu a mposongka hiku, hiku anu ondauopo asa pelengkae inso a hiku biasa: pangkorono asa hiku ondalono ka asa hiku maluano, ka limbu pangkoro atuu hinao wiwino anu mantandeno asa otuwe. Ndiomo mantandeno meda pontunua pesomba atuu: 14inso a pangkoro laro wita hawe a asino i totono orua hiku ka maluano asino atuu asa hiku. Inso a asino i totono hawe a asino i wawono opaa hiku ka maluano asino atuu asa hiku. 15Pompotuwua api a meda pontunua pesomba atuu opaa hiku mantandeno ka inso a pompotuwua api atuu hinao opaa tandu telanso i wawono. 16Pompotuwua api atuu ondauno hopulu ka orua hiku ka maluano hopulu ka orua hiku, gagi tadeno opaa siuno mengkena. 17Asino pompotuwua api atuu ondauno hopulu ka opaa hiku ka maluano hopulu ka opaa hiku, gagi tadeno opaa siuno mengkena mbo'u. Lumimbuo meda puntunua pesomba atuu hinao pangkoro, asa hiku maluano, ka wiwino limbu pangkoro atuu entonga hiku maluano. Ensano meda pontunua pesomba atuu me'aro i sabaano oleo.

18 # Pel. 29:35-37 Ka Do'amba mepau ndi ongkue, ”Hei anano mia, kanandiomo pau-Do Ue Ala: Kanandiomo atora mongkona meda pontunua pesomba atuu: Tempono meda pontunua pesomba umariomo wineweu ka ipinesombaako pesomba tinunu ka mesiwuiakono rea i wawono, 19weeako iramo sando mpesomba to Lewi inso a inuleno i Sadoki asa sapi lakino mongura tiano pesomba po'onini hala, hangano ondaemo anu moiko umpeda ndi Ongkue ka dompoweweu pesombaa, kanandiomo pau-Do Ue Ala. 20Alaomo tedei inso a rea atuu ka ponaakono a opaa tanduno meda pontunua pesomba ka a opaa siuno asino atuu ka liimbu a wiwino. Kanatuumo upokomemporio meda pontunua pesomba atuu ka moweweuakono pesintuwua. 21Alaomo sapi lakino tiano pesomba po'onini hala atuu ka mia asalakono mentunuo a mpo'ianga anu tinantuimo i horino Raha Mempori, i bungkuno po'ianga mempori. 22A oleo ko'orua omue asalakono mesombaakono asa bembe lakino anu nahina tataano gagi pesomba po'onini hala ka mia asalakono mokomemporio meda pontunua pesomba atuu kana umariomo ipinokomemporiako sapi lakino. 23Umarino gau pompokomemporia atuu upoko'umario, omue asalakono mesombaakono asa sapi lakino mongura anu nahina tataano ka asa bimba lakino inso i olodo luwuno bimba, anu nahina tataado. 24Omue asalakono wawao i aro-Do i Ue ka luwuno sando mpesomba asalakono mporawo ohia i wawono ka mpesombaakono gagi pesomba tinunu tia-Do i Ue. 25I larono opitu oleo omue asalakono numahuo sompo oleo asa bembe gagi pesomba po'onini hala; asalakono ninahu mbo'u asa sapi lakino mongura ka bimba lakino inso i olodo luwuno bimba, anu nahina tataano. 26Opitu oleo tehineno ondae asalakono mpoweweu pesintuwua tiano meda pontunua pesomba atuu saru mpokomemporio. Kanatuumo moronso meda pontunua pesomba atuu. 27Umarino tampula luwuno oleo atuu, a oleo ko'oalu ka potilalono luwuno sando mpesomba ira menahuo luwuno pesomba tinunumu ka luwuno pesomba tekaduduiamu a wawo meda pontunua pesomba atuu ka Aku memoikoko, kanadiomo pau-Do Ue Ala.”

Currently Selected:

Yehesikieli 43: XMZ

Highlight

Compare

Copy