Yehesikieli 41

1Ka i'amba wawa aku i larono bolongko langkaino Raha Mempori ka isongkao karuno rere watuno. Karuno rere watu anu i asambalino i ndi'ai onoo hiku mokapano ka anu i asambalino raane onoo hiku mbo'u. 2Maluano pewowa atuu hopulu hiku ka maluano rereno horino olima hiku i asambalino i ndi'ai ka olima hiku i asambalino raane. Isongkao mbo'u bolongko langkai, ondauno pato pulu hiku ka maluano rua pulu hiku. 3Ka i'amba lumako a bolongko i larono. Isongkao karuno rere watuno: mokapano orua hiku, ka maluano pewowano onoo hiku ka maluano rereno horino opitu hiku i asambalino i ndi'ai ka opitu hiku i asambalino raane. 4Isongkao bolongko i larono atuu; ondauno rua pulu hiku ka maluano rua pulu hiku mengkena saru maluano bolongko langkai. Ka i'amba mepau ndi ongkue, ”Onaemo andio bolongko tedoa mempori.”

5Ka i'amba sumongkao rereno Raha Mempori atuu, mokapano onoo hiku ka bolongko tiangino lumimbuo Raha Mempori atuu, maluano opaa hiku. 6Luwuno bolongko tiangino atuu otolu ntuda ka porokono tolu pulu a sompo tudano. Lumimbuo rereno Raha Mempori hinao tumbono mokorosoo luwuno bolongko tiangino atuu, hangano luwuno bolongko andio nahi pino'asa a rereno Raha Mempori. 7Luwuno bolongko tiangino kolangka-langkaino inso a ntudano amba-ambano hawe a ntudano ko'otolu mengkena saru tetiangi langkaino tumbono a sompo tudano lumimbuo Raha Mempori atuu. Hinao ensa a pewuatakoa i wawono ranta mia mokompewuatako inso a ntudano i totono lumako a ntudano i wawono telalo a ntudano i tongano. 8Kukitao nine Raha Mempori atuu hinao pundasino anu lalu mantande lumimbuo gagi pundasino luwuno bolongko tiangino atuu; songkano asa tuko buke, onoo hiku mantandeno. 9Mokapano rere i bungkuno bolongko tiangino olima hiku; maluano a mpundasino Raha Mempori anu pino'inee mooa olima hiku. I olono pundasino winangu atuu ka 10luwuno bolongko olono rua pulu hiku lumimbuo winangu atuu. 11Hinao ba'opia pewowano bolongko tiangino lumako a moa atuu, asa pewowa i utarano ka asa pewowa i selatano. Maluano po'ianga anu mooa atuu olima hiku limbu-limbu.

12Winangu anu me'aro a kintala rinere i sumooano oleo maluano pitu pulu hiku. Rere anu lumimbuo mokapano olima hiku ka ondauno sio pulu hiku.

13Ka i'amba sumongkao Raha Mempori atuu; ondauno asa etu hiku. Kintala rinere saru winangu ka rereno, asa etu hiku mbo'u; 14Maluano i arono Raha Mempori saru kintala rinere i sabaano oleo asa etu hiku mbo'u. 15Ka i'amba sumongkao winangu anu me'aro a kintala rinere i sumooano oleo saru luwuno tambino a orua apano, ondauno asa etu hiku.

Bolongko langkai, bolongko i larono, ka bansala i bungkuno 16tinutuwiako dopi. Lumimbuo otolu bolongko atuu hinao ba'opia pentangoa metarali ka luwuno tambi i arono montoweano pewowa langkai atuu; luwuno tinutuwiako dopi, mompu'u inso a horo hawe a luwuno pentangoano, sekono luwuno pentangoa andio tererei, 17hawe i wawono pewowa ka bolongko i larono ka i bungkuno mbo'u. A luwuno rereno i larono ka i bungkuno ngginori 18gambarado kerubi ka keu kuruma, i olono orua kerubi asa ngkeu kuruma, ka singge kerubi atuu hinao orua rupano. 19Asambalino anu asa rupano mia ka asambalino anu susua rupano singa anu me'aro a ngkeu kuruma atuu; kanatuumo luwu iwineweu lumimbuo Raha Mempori. 20Inso a horo hawe i wawono pewowa mengginori kerubi ka keu kuruma a rereno Raha Mempori.

21Luwuno karu pewowano bolongko langkai tadeno mensiu opaa. I arono bolongko tedoa mempori tengkita asa anu kana tadeno 22meda pontunua pesomba inso a ngkeu, mantandeno otolu hiku, ondauno orua hiku ka maluano orua hiku. Luwuno siuno, empehino ka rereno inso a ngkeu. Ka i'amba mepau ndi ongkue, ”Onaemo andio meda anu kongko i aro-Do i Ue.”

23Bolongko langkai hinao orua pewowa, bolongko anu tedoa mempori: 24Singge pewowa atuu hinao orua tondo, onaemo orua tondo anu mokompewolili, orua tondo a mpewowa anu asa ka orua tondo a mpewowa anu susua. 25A luwuno pewowano bolongko langkai andio mbo'u mengginori kerubi ka keu kuruma, kana a luwuno rere. I bungkuno, i arono bansalano Raha Mempori atuu hinao ensa keu. 26A orua rereno horino bansala atuu hinao ba'opia pentangoa metarali ka nggorido keu kuruma.

Currently Selected:

Yehesikieli 41: XMZ

Highlight

Compare

Copy