Peluarakoa 9

Pohuku ko'olima: haki lele a mpinotuwu

9:1-7

1Mepau Ira i Ue ndi Musa, ”Lakomo ndi Pirao ka pohaweakono: Kanandiomo pau-Do i Ue, Ue Alado to Ibarani: Po'inee iramo ka domelako bawaa-Ku, ka dompesomba ndi Ongkue. 2Nde tewala u'onto ira mbo'u melako, ka kongkomu umonto ira, 3kitaomo kae-Do i Ue ira mompotii haki lele anu tedoa mongkokongiri a mpinotuwumiu, anu mpo'ia a tonga mpada; ngara, kalide, unta, sapi, asa bawaa bembe bimba. 4Mongkona andio, Ondae i Ue Ira moweweu teposisinggeno pinotuwudo to Isaraeli ka pinotuwudo to Masiri, onaemo pinotuwudo to Isaraeli nahi ta hina anu mate maupo te'asa.” 5Umarino atuu, Ondae i Ue pakosio tempono, ”Tisomo Kupogagio i wita andio.” 6Kanandiomo Doweweuo i Ue tisomono; luwuakoano pinotuwudo to Masiri memate, sine pinotuwudo to Isaraeli, nahina anu mate maupo te'asa. 7Ka i'amba i Pirao montena mia lumako i raane. Mengkaa, nahina inso a mpinotuwudo to Isaraeli maupo te'asa anu mate. Sine i Pirao kongkono motea aroa ka nahi eheako ira tongku atuudo melako.

Pohuku ko'onoo: mengkokamba

9:8-12

8Mepau Iramo i Ue ndi Musa ka ndi Haruni, ”Po'alamo awu inso a pontunua te'asa raku, ka irawoo i Musa a laro meene i arono i Pirao. 9Awu atuu ta gagi pampawu tesiarawo a luwuno wita Masiri. Pampawu atuu ta gagi mengkokamba anu tewotu a ngkulino mia ka pinotuwu.” 10#Meng. 16:2Umarino atuu, i Musa ka i Haruni mo'ala awu inso a mpontunua, ka dolako mentade i arono i Pirao. Ka i'amba i Musa rumawoo a laro meene, ka pampawu atuu gagi mengkokamba anu tewotu a ngkulino mia ka pinotuwu. 11Mia mpoto'ori atuu nahi domempolio me'aropio i Musa, hangano ondae i alu ira koa mbo'u mengkokamba kana luwudo to Masiri. 12Sine Ondae i Ue mokomoteao aroano i Pirao, onae ka nahi perorongeako ira, kana anu Dopauomo i Ue ndi Musa.

Tula ko'opitu: usa uwoi watu

9:13-35

13Pau-Do i Ue ndi Musa, ”Pewangumo da mo'oru ka ulako me'aro ndi Pirao ka pauakono: Kanandiomo pau-Do i Ue, Ue Alado to Ibarani: Po'inee iramo bawaa-Ku ka domelako mpesomba ndi Ongkue. 14Nde pohona andio Aku motolao luwuno pohuku-Ku a ngkoroimu, a mpegawaimu ka palilimu, nde kau to'orio koa, nahina anu kana Ongkue i asa wawontolino. 15Bakanaano tehineomo kae-Ku mompotii haki lele ta mepateko saru palilimu, ranta kau tampula i wawontolino. 16#Rom. 9:17Sine tinoo-Ku ka Kupo'ineekomiu mentuwu, onaemo ka imengkitao roso mpabawa-Ku, ka itelele nee-Ku i asa wawontolino. 17Hangano da kongkomu umonto ira bawaa-Ku, ba ira melako. 18Manasaomo tisomo bara'ura tempo kanandio Aku motiio usa uwoi watu anu tedoa mongkokongiri, anu napi hori gagi i wita Masiri mompu'u pentadeno poparenta Masiri ranta hawe kanandio-andio. 19Onaemo pu'uno, tena iramo mia miu mewawa ira pinotuwu ka luwuno pine'ue miu i tonga mpada, a mpo'ianga anu nahi ta dumunsi ira usa uwoi watu. Nde mia ka pinotuwu anu mo'ia a tonga mpada nahi pekule a mpo'iangano, ta mate idunsio usa uwoi watu.” 20Pegawaino i Pirao anu doito rumongeo pau-Do i Ue, dotena ira atado ka pinotuwudo mpewinso a raha, 21sine ondae anu nahi domperioo pau-Do i Ue, dompo'inee ira ata saru pinotuwudo a tonga mpada.

22Mepau iramo i Ue ndi Musa, ”Tandeomo kaemu kontahane i langi, ka ipetii usa uwoi watu asa wawo wita Masiri, dumunsio mia, kondehora ka luwuno pinopaho i wita Masiri.” 23Mansano tumandeo i Musa tukono kontahane i langi, Ondae i Ue mompotola ruudu saru usa uwoi watu asa wawo wita Masiri ka koliki tesosangkilo i tolino. Ondae i Ue mompotii usa uwoi watu buketio wita Masiri. 24#Meng. 8:7; 16:21Metiiomo usa uwoi watu anu tedoa marombo ka mongkokongiri saru berese ka koliki tesosangkilo. Anu kanandio napi hori gagi i wita Masiri, mompu'u domegagi asa tongku. 25Asa wawo wita Masiri usa uwoi watu atuu mepate ira luwuakoano anu i tonga mpada, inso a mia hawe a ngkondehora. Kanatuukoa mbo'u luwuno pinopaho, memate i dunsi ira ka luwuno keu i tonga mpada ipobangku ira. 26Butu a mpo'iangaado to Isaraeli i wita Gose, nahi petii usa uwoi watu. 27Montenaomo mia i Pirao moboi ira i Musa ka i Haruni, ka ipotae, ”Tehala akumo ntu'u andio, Ondae i Ue anu mentee. Ongkue ka paliliku, mensala kamimo. 28Pekakaimo ndi Ondae i Ue! Sompoomo kupompemarasai hangano ruundu ka usa uwoi watu anu tedoa marombo andio. Akumo mo'ineekomiu ka imelako, siimo imempo'ia tehine mbo'u.”

29Ipotae i Musa ndi Pirao, ”Tempono kupeluarako inso i kota andio, aku tumandeo kaeku ndi Ondae i Ue. Rundu ta menaa-naa ka usa uwoi watu nahi ta metii mbo'u, onae ka uto'oriokoa, nine tolino Ondae i Ue me'ueo. 30Sine kuto'orio, nine omiu saru pegawaimiu, napi medoito ndi Ondae Ue Ala.” 31Itempo atuu pinopaho rami ka jelai tesosa'ori, nde jelai atuu kontongaano mewua ka rami kontonaano mensisi. 32Sine gandu ka sekoi nahi domemate, hangano napi haweako tempono. 33Meluarakoomo i Musa inso a ngkota atuu bintao i Pirao, itandeomo kaeno ndi Ondae i Ue, menaa-naaomo rundu ka usa uwoi watu nahi te'uwu mbo'u i tolino.

34Sine mansano kumitao i Pirao, nine usa, rundu ka usa uwoi watu atuu menaa-naaomo, da kongkono moweweu hala; da motea aroano, kanatuu koa mbo'u pegawaino. 35I Pirao kongkono motea aroano, onae ka nahi po'inee ira to Isaraeli melako, kana anu umariomo Dopauo i Ue ndi Musa.

Currently Selected:

Peluarakoa 9: XMZ

Highlight

Compare

Copy