Peluarakoa 2

I Musa pine'anaako ka kinadudui

1:1-10

1Asa mia tama te'inso a inuleno i Lewi mongkombia asa beine to Lewi; 2#Tin. 7:20; Ibr. 11:23ka i'amba beine atuu mentia ka ipe'anaakono asa ana ntama. Mansano kumitao motae nana'ote atuu tekosi, iwunio otolu wula tehineno. 3Sine nahi pokowunio tehine mbo'u, onaemo ka i'alao burua tole, iwaluakono panti saru pulu beta'i, ipokoturio nana'ote atuu ilarono ka inaao burua atuu i olono ewo teberau i wiwino koro Nili. 4Akano anu beine mentade ola-olai ta kumitao, hapa anu ta gagi ndi onae. 5Haweomo beine anano i Pirao ta medolo i koro Nili, puu mpopekakaakono melempa-lempa i wiwi ngkoro Nili. Ikitao burua i'olono ewo teberau atuu, ka itenao atano beine umalao. 6Mansano umungkahio, ikitaomo nana'ote tama anu kontongaano mengese. Ipehohawao nana'ote atuu ka ipotae, ”Manasa andio anado to Ibarani.”

7Mesikenoomo akano nana'ote atuu a beine anano i Pirao, ”Tewala ipemoikoo, aku lumako mompoboiakomiu asa beine to Ibarani mompo'uoakomiu nana'ote andio.” 8Sumangki beine anano i Pirao ndi onae, ”Lakomo.” Ka i'amba lumako ana beine atuu moboio ineno nana'ote atuu. 9Motaeomo anano i Pirao, ”Wawaomo nana'ote andio ka upo'uoakune, ka aku moweeko tambomu.” Ka i'amba beine atuu umalao nana'ote atuu ka ipo'uoo. 10#Tin. 7:21Mansano nana'ote atuu langkaiomo, iwawaomo a beine anano i Pirao, anu tumandeo gagi anano, ka ineeakono i Musa, nde ipotae, ”Hangano ongkue wuatakono inso a uwoi.”

I Musa molai lumako wita Midia

2:11-22

11 # Ibr. 11:24-25 # Tin. 7:23-28 Tempo atuu, mangalitauomo i Musa, onae meluarako tepohaweako ira pepaekompono ta kumitao domedinadai mpo'angga. Ka ikitao asa to Masiri tumunduhio asa to Ibarani, asa mia te'inso ia pepaekompono atuu. 12Onae mengkikita ngkoraane ngkoramai, mansano kumitao nahina mia, ipepateo to Masiri atuu, ka iwunio wata ngkoroino a laro one.

13Mansano tisomono meluarako mbo'u, ihaweo orua ira to Ibarani kontongaado me'u'ua. Isikenoo anu moweweu sala atuu, ”Tembio ka utunduhio walimu?” 14Sine sumangki, ”Isema anu tumandeko gagi petewawa ka puu mpobitara ndi omami? Hapake tinoomu, komepate aku kana pompepatemu to Masiri atuu?” I Musa gagi doito, nde ipewowoloo, ”Asalakono anu gagi atuu teto'oriomo.” 15#Tin. 7:29; Ibr. 11:27Mansano rumongeo i Pirao mongkona anu gagi atuu, mo'ungkeomo akala ta mepateo i Musa.

Sine i Musa molai inso ndi Pirao ka ihawe i wita Midia, ka ipentoro-toro a wiwi nsumuru. 16Sando mpesomba i Midia atuu hinao opitu ira anano beine. Me'aiwa ira mpontambu uwoi umihiio dula pinotuwu ta mopo'inu ira asa bawaa bembe bimbano amado. 17Mehawe ira puu mpompakambi sumaari ira, sine i Musa mentade tumulungi ira ka mompopo'inu asa bawaa bembe bimbado. 18Mansado mehawe ndi Rehueli, amado, mesikenoomo, ”Tembio oleo andio kai ronga mpekule?” 19Mesangki ira, ”Asa to Masiri tumulungi kami inso a ponsosanggolido puu mpompakambi, ka onae montambuakami uwoi, hadio ntu'u tia mami ka mompo'inu ira asa bawaa bembe bimba.” 20Ipotaeako ira anano, ”Isuaomo? Tembio ka i mebintao mia atuu? Poboiomo ka ipongkaa.” 21I Musa inehekoa mo'ia i raha atuu, ka i'amba i Rehueli, mopokombiaakono i Musa, i Sipora, anano. 22Beine atuu me'anaako asa ana ntama, ka i'amba i Musa numeeakono nana'ote atuu i Geresoo, nde ipotae, ”Gagi akumo mia hawe i wita susua.”

I Musa Dotenao i Ue

2:23–4:17

23Tehine umari atuu mateomo mokole i wita Masiri. Sine to Isaraeli mpe'anaiki ira hangano pompe'ata. Mpeboo-booli ira, hangano pompe'ata atuu ka peboolido mpepetulungi, hawe ndi Ondae Ue Ala. 24#Teg. 15:13-14Ondae Ue Ala rumongeo peboolido, onaemo ka Dorambeo pedandia-Do saru i Burahima, i Saki ka i Yako. 25Ondae Ue Ala mensiroi ira to Isaraeli atuu, ka Doperio ira.

Currently Selected:

Peluarakoa 2: XMZ

Highlight

Compare

Copy