Peluarakoa 17
17
Bawaa to Isaraeli umara-arahako Ira i Ue i Masa ka i Meriba
17:1-7
1 #
Pod. 20:2-13
Inso i pada one Sini, mpelungka iramo luwu bawaa Isaraeli. Mpelempa inso a mperatoa lumako a mperatoa menunu kana songka-Do i Ue. Onaemo ka dompekema i Rapidi, sine i ra'ai nahina uwoi ta inuado. 2Gaagi, dompegagaakono i Musa, ka dompotae, ”Powee kamimo uwoi, ka kimpo'inu.” Sine ipotae i Musa ndi ondae, ”Tembio ka impegagaakune? Si me'ara-arahako Ira i Ue?” 3I ra'ai tongku atuu memokoranga. Tongku atuu mpewuruki iramo ndi Musa ka dompotae, ”Tembio kau wawa kami mpeluarako inso i wita Masiri? Nde komepate kami ke, luwuno ana mami ka pinotuwu mami ka kimemateako mokoranga?”
4Ka i'amba i Musa mebo-booli ndi Ondae i Ue, ipotae, ”Hapa anu ta wineweuku ia tongku andio? Nahi tehine mbo'u ira mewunoakune watu!”
5Mepau Iramo i Ue ndi Musa, ”Pelempamo i arodo tongku atuu ka powawa perongamu ba te'opia mia i olodo mia memota'u to Isaraeli; wawo mbo'u a ngkaemu tuko anu pinakemu mowombaako koro Nili ka lakomo. 6I ra'ai aku mentade i aromu a wawo watu i torukuno Hore. Wombakio watu i torukuno atuu ka inso i larono ta meluarako uwoi, ka dompo'inu tongku atuu.” Kanatuumo iweweuo i Musa i arono matado mia memota'u to Isaraeli.
7Po'ianga atuu nineeako Masa ka Meriba, hangano to Isaraeli mpegaga ka dome'ara-arahako ira i Ue dompotae, ”Ndio Ira koa ke i Ue i oloto?”
Poponangido to Isaraeli a nto Amale
17:8-16
8Mewahe iramo to Amale mpeteaako ira to Isaraeli i Rapidi. 9Ipotae i Musa ndi Yosua, ”Pobinikimo ba te'opia mia anu ira mentonda kita, ka mpeluarako mpetea umewai ira to Amale, tisomo aku mentade i punsuno pongku wita saru tuko-Do Ue Ala a ngkaeku.”
10Kanatuumo iweweuo i Yosua kana pinauno i Musa ndi onae ka ipetea umewai ira to Amale; sine i Musa, i Haruni ka i Huru mpewuatako a punsuno pongku wita. 11Ka gagiomo, tewala i tandeo i Musa kaeno, memoroso irapo to Isaraeli, sine tewala ipotiio kaeno, memoroso irapo to Amale. 12Sine mokendoomo kaeno i Musa. Onaemo ka dopo'ala watu, donaao i totono, ka ipentoro i wawono. I Haruni ka i Huru tumumboo orua kaeno, i manggali ka i koana, gagi kaeno tetande mpiha ranta kai sumoo oleo. 13Kanandiomo i Yosua inangiako ira ponai to Amale ka sorodaduno.
14 #
Win. 25:17-19; 1Sam. 15:2-9 Mepau Ira i Ue ndi Musa, ”Luwuno andio burio a wunta kai gagi pepopoto'ori, ka poporongeakono i Yosua, nine Aku umoninio pinewowolodo mongkona to Amale inso i wawo ntolino.”
15Ka i'amba i Musa mowangu pontunua pesomba ka ineeakono, ”Ondaemo i Ue poponangiku!” 16Nde Dopotae, ”Kae i wawono poponangi-Do i Ue! Ondae i Ue metea umewaio Amale ranta a inuledo.”
Currently Selected:
Peluarakoa 17: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
