Peluarakoa 15

Penanino i Musa ka Isaraeli

15:1-21

1 # Meng. 15:3 Itempono atuu i Musa saru to Isaraeli mpenaniako mpenani andio ndi Ondae i Ue,

”Aku menani ndi Ondae i Ue, nde Ondae maramba ka poponangi,

ngara ka anu mesawikio Dopetadiako ira a laro ntahi.

2 # Pud. 118:14; Yes. 12:2 Ondae i Ue rosoku ka penaniku,

Ondae gagi pongkaduduiku.

Ondae Ue Alaku, ku'unde-unde Ira,

Ondae Ue Alado amaku, kupelangkai Ira.

3Ondae i Ue tadulako mpeteaa;

Ondae i Ue, onaemo nee-Do.

4Karetano i Pirao ka sorodaduno Dopetadiako ira a laro ntahi;

luwuno petewawa sorodadu anu tebiniki Dopotondu ira a laro ntahi Teberau.

5Bombano tahi malua kuma'uwi ira;

kana watu, domentondu a uwoi ondalo.

6Kae ngkoana Miu, Ue, maramba a laro mpabawa Miu.

Kae ngkoana Miu, Ue, mokoropuo iwali.

7Saru mpoponangi-Miu anu langkai

Iropu ira anu umewaiko-Miu;

Ipotolao tekuda-Miu,

kana langano api, kumaa ira kana seami.

8Hangano pepuurino penaa-Miu uwoi mebomba langkai;

waaano uwoi mentade maleo kana binunto;

lolowi baaku i tonga-tongano tahi.

9Potaedo iwali: ’Aku lumampui ira ka humawe ira, aku tumia-tiao pinomuru;

Aku motolao tekudaku ndi ondae, aku butao ponaiku;

kaeku ta mokoropu ira!’

10Omiu mepuuriakono lompiu-Miu, tahi kuma'uwi ira;

kana tima domentondu a laro uwoi anu mongkokongiri.

11Isema kana Omiu i olodo pinesombai susua, O Ue?

Isema kana Omiu, maramba a laro mempori-Miu,

ntengiri hangano wineweu-Miu tepalele,

anu moweweu kinohali-haliako?

12Itaangakono kae ngkoana-Miu;

tolino tumele ira.

13A pompehohawa-Miu i taate ira bawaa anu tinolosi-Miu;

Hangano roso-Miu i taate ira hawe a mpo'ianga-Miu anu mempori.

14Luwuno tongku merongeo, mpondidi-ndidi ira;

mpondende umalu ira palili i wita Pelisiti.

15Tempo atuu maroaomo domempopauo a tongku Edomi,

Medanggara iramo anu mempabawa i Moabi;

luwuno palili wita Kana'a mpondidi-ndidi.

16Doitoa ka mongkokongiria umalu ira,

Hangano rosono kae-Miu mansa ira merodo kana watu,

ranta bawaa-Miu mpe'asatowaako, oo Ue,

ranta bawaa anu tinolosi-Miu mpe'asatowaako.

17Iwawa ira ka Ipekaria ira a wawo ntorukuno-Miu;

a mpo'ianga anu gagi po'iangaa-Miu, o Ue;

a mpo'ianga mempori, anu winanguno kae-Miu, o Ue.

18Omiu Ue moparenta ranta nahina tampulaano.”

19Mansano ngarano i Pirao saru karetano ka miano anu mpesawi a ngara mentondu a ntahi, onaemo ka Doweweuo i Ue uwoi ntahi mepokule kuma'uwi ira, sine to Isaraeli mpelempa a motu'iano a ntonga ntahi. 20Ka i'amba i Miria, nabi beine atuu, pepaekompono beine i Haruni, mo'ala rebana, pentade iramo luwuno beine mentondao mpotingko rebana saru mo'ende-ende. 21I Miria tumondao penanido to Isaraeli,

”Aku menani umunde-unde Ira i Ue, nde Ondae maramba poponangi;

ngara ka miano Dopetadiako ira a ntahi.”

I Mara ka i Elimi

15:22-27

22I Musa wawa ira to Isaraeli mpelungka inso i tahi Teberau, ka domelako i pada one Suri; otolu oleo dompelempa i pada one atuu nahi dompowahe uwoi. 23Mehawe iramo i Mara, sine nahi moiko dompo'inu uwoi i Mara atuu, hangano mopa'i. Onaemo pu'uno po'ianga atuu domeneeakono Mara. 24Onaemo ka dompewuruki tongku atuu ndi Musa, dompotae, ”Kami mpo'inu hapa?” 25Mebo-booliomo i Musa ndi Ondae i Ue, ka Ondae i Ue tumisoakono asa mpole keu. Ipewunoakono i Musa keu atuu a laro uwoi, uwoi atuu gagi mo'ahi dome'inuo. I ra'aimo Dopoweeako ira i Ue luwuno songka ka atora. I ra'aimo Do'arahako ira, 26Pau-Do i Ue, ”Ipompe'ala-alamo ndi Ongkue Ue, Ue Alamiu ka impoweweu anu moiko a mpongkita-Do, imerongeo luwuno songka-Ku ka tumondao songka-Ku, asalakono nahi Aku mo'ineeo haki hapamo koa metako ndi omiu, kana anu pinotii-Ku a nto Masiri; nde Ongkuemo Ue anu mokotompako.”

27Umarino atuu mehawe iramo i Elimi; i ra'ai hinao hopulu ka orua mata uwoi ka pitupulu keu koroma, ka mpekema iramo i wiwino uwoi atuu.

Currently Selected:

Peluarakoa 15: XMZ

Highlight

Compare

Copy