Esetere 5

I Esetere me'aro ndi ondae mokole

5:1-8

1A oleo anu ko'otolu, i Esetere mesangkaako sangka mokoleno beine, ka i'amba mentade a kintala i larono langkanaedo mokole, kona ntu'u i arono langkanaedo mokole. Ondae mokole mentoro a ngkadera poparentaa i larono langkanae, tepo'aro saru pewowa langkanae atuu. 2Mansado kumitao mokole, i Esetere, mokole beine mentade a kintala, onae dopekonaomo mokole, onaemo ka dotasiakono tuko wulaa a ngkaedo ndi Esetere, ka i'amba i Esetere merangkuhako ka idanggio untuno tuko wulaa atuu. 3Mesikeno ira mokole ndi Esetere, ”Hapa tinoomu hei mokole beine Esetere, ka hapa inehemu? Maupo hawe entongano poparentaa kowineeako.” 4Sumangki i Esetere, ”Tewala ipemoikoo mokole, po'ineeomo ka i'aiwa omiu mokole saru i Hamani oleo andio a mpelimbua anu pinatindano atamiu tiamiu mokole.” 5Metena iramo mokole, ”Tenaomo i Hamani ka ironga aiwa, kami umihiio po'emano i Esetere.” Hawe iramo mokole saru i Hamani a mpelimbua anu pinatindano i Esetere. 6Kontongaado mo'inu anggoro, mesikeno iramo mokole ndi Esetere, ”Hapake inemamu? Manasa ta inindu. Ka hapake inehemu? Maupo hawe entongano poparentaa ta inihii.” 7Onaemo ka isangki i Esetere, ”Po'ema ka po'eheno tetenaamiu onaemo: 8Tewala omiu mokole ipehohawao tetenaamiu, ka tewala moiko a pongkitamiu uminduo po'ema saru umihiio po'eheno tetenaamiu, po'ineeomo i'aiwa mbo'u omiu mokole saru i Hamani a mpelimbua anu ta patindao tetenaamiu tiamiu mokole ka i Hamani, tisomo aku weweuo anu inehemiu.”

I Hamani metena mompotade keu pesonsoano i Modekai

5:9-14

9Ia oleo atuu meluarakoomo i Hamani mawongko ntu'u aroano. Sine mansano kumitao i Modekai kongko a mpewowa langkai langkanaedo mokole, nahi pentade ka nahi pelelu melangkaio, onaemo kai tedoa mokula aroano i Hamani ndi Modekai. 10Sine ipedatoo i Hamani aroano, ka ipekule i rahano, ka ipoboi ira sambe'eno ka i Seresi, kombiano. 11Ka itutuluo i Hamani ndi ondae atuu hadio arataano, hadio ana ntamano ka luwuno pompelangkai anu doweeakono mokole ndi onae, saru pewuatakono pangkano iwawono luwuno anu mpepangka langkai ka pegawaido mokole. 12Motae mbo'u i Hamani, ”Tendeano nahina mbo'u maupo te'asa mia inemano i Esetere, mokole beine, anu aiwa meronga saru ondae mokole a mpelimbua anu pinatindano, sangkadio ongkue. Ka maupo tisomo i'olu aku meronga saru ondae mokole. 13Sine luwuno atuu nahina tuduno ndi ongkue, tewala da kukitao i Modekai to Yahudi atuu mentoro a mpewowa langkai langkanaedo mokole.” 14Ka i'amba motae i Seresi, kombiano, ka luwuno sambe'eno, ”Pontenamo mia moweweu keu pinontade anu mantandeno lima pulu hiku, ka pesombaakonomo tisomo mo'oru ndi ondae mokole, ka domesonsoo mia i Modekai a ngkeu pinontade atuu. Umarino atuu tamo mawongko aroamu lumako meronga saru ondae mokole a mpelimbua atuu.” Pohawedo atuu ipemoikoo i Hamani, ka i'amba metena moweweu keu pinontade atuu.

Currently Selected:

Esetere 5: XMZ

Highlight

Copy

Compare