Puu Pontutulu 5

1Si madara ungkahio ngangamu, ka siimo ipodadu aroamu moluarako pau i aro-Do Ue Ala, hangano Ondae Ue Ala kongko Ira i suruga ka omue i tolino. Onaemo atuu, po'ineeomo ka itedei koa paumu. 2Hangano, kana'umpe haweno mo'ipi a laro hadiono marepaa, kanatuu koa mbo'u tepopaua benge-benge a laro hadiono pau. 3Tewala omue montanga ndi Ondae Ue Ala, ronga ihiio, hangano nahi Dopemoiko ira mia mebenge-benge. Ihiiomo pontangamu. 4Moikoopo nahi upontanga sekonopo montanga sine nahi u'ihiio. 5Ngangamu ka siwawako a laro hala, ka sipepau i arodo tinena-Do Ue Ala nine nahi upe'inungakono. Nde laluopoke Ondae Ue Ala tekuda a luwuno pinaumu ka sumolangio hapa anu inanggano kaemu? 6Hangano, kana hadiono mo'ipi, kanatuu koa mbo'u hadiono pinau anu nahina tuduno. Sine doitoako Iramo Ue Ala.

Pompoli anu nahina tuduno

5:7–6:12

7Tewala ukitao pompokonsii a mia mongkokolaro i asa po'ianga ka podadaia songka saru moleoa, siimo kohali-haliakono mongkona atuu. Hangano, potoro mantande anu asa dumagaio anu susua, ka potorodo lalu mantande dumagai ira. 8Asa urano wita a laro nteweweu kanatuu onaemo tewala mokoleno pinelangkai i wita atuu.

9Isema mongkekewoi doi nahi ta mesompoo doi, ka isema mongkekewoi hadio arataa nahi ta mesompoo hinaweno. Ndio mbo'u nahina tuduno. 10Tekense hadio arataa, tekense hadio mbo'u mia anu mokopingkoo. Ka i'amba hapake urano anu me'ueo sangkadio kumitao? 11Rodoomo poturino mia anu mo'angga, moiko tedei ke hadio ipongkaa. Sine mowohino mia mompoli menteeano nahi weweuo ka ipokompoturi. 12Hinao urasa'o anu mompokomasusa kukitao i totono mata'oleo: pompoli anu ninaano ueno gagi urasa'ono onaeno. 13Pompoli atuu moliu hangano inangga mosa'o, ranta ka ihina anano nahina maupo hapamo koa ndi onae. 14#Ayb. 1:21; Pud. 49:18; 1Tim. 6:7Kana'umpe ipeluarako inso a mpe'anakaano ineno, kanatuu koa mbo'u ba ilako, kolambe-lambe kana tempono ihawe. Nahina ipohawe maupo hapamo koa inso a mpine'iseino anu pinokowawano kaeno. 15Ndio mbo'u urasa'o anu mompokomasusa. Kana'umpe ihawe, kanatuu koa mbo'u ba ilako. Ka i'amba hapake urano mia atuu anu me'i'iseiomo mobuani angi? 16Tendeano ipingkoo oleo ntumuwuno a laro wongi-wongia, saru hadio pe'o'ole, marasaia, ka tekudaa.

17Kitaomo, anu kupemoikoo ka koona ntu'u a mia onaemo mongkaa mo'inu ka mesana-sanaa a laro luwuno rinokuhi anu wineweu pine'isei i totono mata'oleo asa ntinuwu, anu Doweeakono Ue Ala, hangano onaemo tiano. 18Ka sompo mia anu Dopoweeakono Ue Ala pompoli ka arataa saru pinoweeako roso ka ipakeo, tumarimao tiano ka mawongko a laro mpe'iseiano. Atuu mbo'u pompowee-Do Ue Ala. 19Menteeano nahi mararu irambeo tinuwuno, hangano Dopo'ineeo Ue Ala ka imarepaako sanaano aroano.

Currently Selected:

Puu Pontutulu 5: XMZ

Highlight

Copy

Compare