Winali 30

Pinomule umarino tepidia

30:1-10

1Tewala luwuno ronso ka totonaa anu kupopo'aroakomu hawe ndi omue, ka imento'orio i laro aroamu i tonga-tongano luwuno tongku, ba isua Dosaarikomiu i Ue, Ue Alamiu, 2ba mpepokule komiu mbo'u ndi ondae i Ue, Ue Alamu, ka imperorongeakono pua-Do menunu saru luwuno anu kuparentaakomu oleo andio, moiko omiu maupo luwuno anamu a tompaano aroamu ka tompaano tinuwumu, 3onaemo Ondae i Ue, Ue Alamu, Ira mokomoikoo tumuwumu ka mehohawako. Ira wali pumpu komiu inso a luwuno tongku ba isua Dopeweengakomiumo i Ue, Ue Alamiu. 4Maupo luwuno mia anu tesaari ndi omiu kongko i tompano langi, inso i ra'ai mbo'u Ira pumpu komiu i Ue, Ue Alamiu ka wali umalakomiu. 5Ondae i Ue, Ue Alamu Ira wawakomiu mpewinso i wita anu pine'uedo uempu'umu ka komiu mpe'ueo mbo'u. Ira moweweu moiko ndi omue ka weweu komiu mehadio lumaloi ira uempu'umu. 6Ondae i Ue, Ue Alamu Ira balio aroamu ka aroado inulemu, ranta kai mpehohawa Ira i Ue, Ue Alamu tompaano aroamu ka tompaano tinuwumu, kai mentuwu. 7Ondae i Ue, Ue Alamu, Ira motiio sumpa atuu a iwalimu ka anu umo'aliaakomu anu lumulu komiu. 8Komiu wali mperorongeakono pau-Do i Ue ka meweweuo luwuno parenta-Do anu kupauakomu oleo andio. 9Ondae i Ue, Ue Alamu Ira mokohadioo moikoa a luwuno inanggano kaemu, wua mpe'anakaamu, hasilino pinotuwumu, ka hasilino witamu. Hangano Ondae i Ue, Ira wali mawongko hangano omiu a laro manangaiamu kana mawongkodo uempu'umu ndi'ipua, 10tewala imperorongeako Ira i Ue, Ue Alamu saru mpe'ini a parenta ka pompakosi-Do anu teburi a wunta Taura andio, ka tewala mpepokule komiu ndi Ondae i Ue, Ue Alamu tompaano aroamu ka tompaano tinuwumu.

Tuwua ke matea

30:11-20

11Menteeano parenta anu kupohaweakomu ia oleo andio, nahi upemotungkoo lahi, ka nahi olai lahi. 12#Rom. 10:6-8Komba i langi po'iangano, ka impotae, ”Isemake anu ta mewuatako i langi lumako umalaakita, ka moporongea kita ka tomeweweuo?” 13Komba mbo'u i asatowano tahi po'iangaano, ranta ka impotae, ”Isemake anu ta sumakio tahi lumako umalaakita ka moporongeakita ka tomeweweuo?” 14Sine pau andio umpeda ntu'u ndi omue, ilaro ngangamu ka ilaro aroamu kau weweuo

15Kitaomo, aku mopo'aroaakomu ia oleo andio, tuwua ka manangaia, matea ka masolaa. 16Hangano ia oleo andio kuparentaakomu ka upehohawa Ira i Ue, Ue Alamu, saru tuwu montonda sala-Do ka pe'ini a parenta, pompakosi ka atora-Do. Kanatuumo komiu mentuwu tetiangi hadio ka Doronsokomiu i Ue, Ue Alamu i wita ba isua impewinso mpetorokio. 17Sine, tewala aroamu mepokule ka nahi mporonge, tendeano komiu mepinokontesaa ka impenggolontu mpelangkaio pinesombai susua, ka mpesomba ndi onae, 18ka kupauakomu nine oleo andio manasa komiu memasola. Nahi ta melai tinuwumiu i wita anu komiu mpentorokio umarino imensakio koro Yarade. 19Aku moboio langi ka tolino gagi sakosii ndi omiu oleo andio: Kupo'aroakomu tuwua ka matea, ronso ka totonaa. Binikiomo tuwua, ka imentuwumoiko omiu maupo inulemu, 20#Teg. 12:7; 26:3; 28:13pehohawa Ira i Ue, Ue Alamu, rongeo pau-Do ka tumonda Ira. Hangano Ondaemo tinuwumu ka anu weweuakomiu mpo'ia tehine i wita anu dinandi-Do i Ue saru sumpa ndi Burahima, i Saki ka i Yako uempu'umu anu wineeako ndi ondae.

Currently Selected:

Winali 30: XMZ

Highlight

Compare

Copy