Winali 23

Mia anu nahi bisa mewinso a bawaa-Do i Ue

23:1-8

1”Mia anu tepeha wuku nsu'uluino ke anu tetotopi anuno, si dompontonda tepotowoa a bawaa-Do i Ue.

2Asa mia ana i olono sipewinso bawaa-Do i Ue, tendeano maupo inuleno anu kohopulu nahi bisa ipewinso a bawaa-Do i Ue.

3 # Neh. 13:1-2 Asa to Amoni ke to Moabi sipewinso a bawaa-Do i Ue, tendeano maupo inuledo anu kohopulu nahi bisa ipewinso a bawaa-Do i Ue, ranta nahina tampulaano, 4#Pod. 22:1-6hangano nahi domentotowoakomiu roti ka uwoi i tempono pelempaamiu mpeluarako inso i wita Masiri, ka hangano domentamboo i Bilea anano i Beori inso i Petori i Arami-Mesopotamia umewaiko, kai totonaako. 5#Pod. 23:7–24:9Sine Ondae i Ue, Ue Alamu nahi behe rumongeo i Bilea ka Dobaliomo i Ue, Ue Alamu totonaa atuu gagi ronsomu, hangano Dopehohawako iUe, Ue Alamu. 6Asa ntinuwumu si mpompewowoloako ira manangaiado ranta nahina tampulaano.

7Simokoburuako ira to Edomi, hangano onae pepaekompomu. Simokoburuako ira to Masiri, hangano omue mbo'u i ndi'ipua mia hawe i witado. 8Luwuno nana'ote anu hina ndi ondae a inule anu ko'otolu, bisa dompewinso a bawaa-Do i Ue.”

Tahirino pekemaa

23:9-14

9”Tewala kolumako saru sorodadumu umewaio iwalimu, asalakono komentangkoro a luwuno anu mosa'o. 10Tewala hinao i olomu asa tama anu nahi mempori hangano meluarako uwoi anuno i tempono wongi, asalakono ilako i bungkuno pekemaa, ka siimo ipekule mbo'u. 11Umpeda ngkiniwia asalakono ipedoloako uwoi. Tempono sumoo oleo, onae moiko wali mewinso a mpekemaa.

12I bungkuno pekemaa atuu, asalakono hinao ndi omue asa po'ianga ba isua uteta'i. 13I olono parewamu asalakono hinao ndi omue sikopa kodei. Tewala kotumotanda teta'i, asalakono upongkeke bolo mompake sikopa, ka howuio ta'imu. 14Hangano Ondae i Ue, Ue Alamu melempa inso i tonga-tongano pekemaamu Ira motolako ka meweengakono iwalimu ndi omue. Asalakono pekemaamu atuu mempori, kasi Dopongkita hapa anu nahi penunu i olomu, ka Dopebungkuiko.”

Ata anu molai

23:15-16

15”Sipeweengakono ndi ueno asa mia ata anu molai ndi omue inso ndi ueno. 16Moikokoa ipo'ia saru omue, i tonga-tongamu, a mpo'ianga anu bininikino i asa po'iangamu, anu ipemoikoo; ka sipokonsiio.”

Mo'ewai pebelesua a mpo'ianga mempori

23:17-18

17 # Ima. 19:29 I olodo ana beine Isaraeli sihina belesu a raha mpesombaa lahumoa, ka i olodo ana ntama Isaraeli sihina belesu a raha mpesombaa lahumoa. 18Sipowawa doi tambo pebelesua beine ke po'owahi pebelesua tama ia raha-Do i Ue, Ue Alamu, gagi po'ihii asa pontanga, hangano oruano atuu mokoburu-Do i Ue, Ue Alamu.

Simpo'ema anano doi inso a pepaekompo pe'asa tongku

23:19-20

19 # Pel. 22:25; Ima. 25:36-37; Win. 15:7-11 ”Sipompe'anaako doi a pepaekompomu, moiko doi maupo kaanga ke hapamokoa anu pinokompe'ana. 20Inso a mia hawe moiko impo'ema ana doi, sine inso a pepaekompomu simpo'ema anano doi, ka Doronsoko i Ue, Ue Alamu, a luwuno usahamu i wita anu komewinsokio ka mentorokio.”

Mongkona pontanga

23:21-23

21 # Pod. 30:1-16; Mat. 5:33 ”Tewala montangako ndi Ondae i Ue, Ue Alamu, sipotuluo weweuo, hangano manasa Ondae i Ue, Ue Alamu, Ira tumuntuo inso ndi omue, onaemo kai gagi halamu. 22Sine tewala komba montangako, mongkona atuu komba gagi halamu. 23Hapa anu meluarako inso a wiwimu, asalakono petenunu weweuo, hangano po'eheno aroamu montanga ndi Ondae i Ue, Ue Alamu, asa rupa anu pinauno ngangamu.”

Mongkona mo'opu wua anggoro ka bansano gandu i witado mia susua

23:24-25

24”Tewala molaloko lere anggorodo pe'asa miamu, moiko upongkaa wuano anggoro po'eheno aroamu, sine sipowinso a laro pontongomu. 25Tewala molaloko lere gandudo pe'asa miamu anu napi sinowi, moiko upo'opuako kaemu bansa-bansano, sine siponsewo gandudo pe'asa miamu atuu.”

Currently Selected:

Winali 23: XMZ

Highlight

Compare

Copy