Winali 17

1”Si mpesombaakono ndi Ondae i Ue, Ue Alamiu, sapi ke bimba anu hinao tataano, ke maupo hapa anu nahi moiko. Hangano anu kanatuu onaemo mokoburu-Do i Ue, Ue Alamiu.”

Pohuku mate a mia mompesombai lahumoa

17:2-7

2”Bara'ura i olomiu, i aasa kota anu Doweeakomiu i Ue, Ue Alamiu, hinawe asa mia tama ke beine anu moweweu hapa anu mosa'o a pongkita-Do i Ue, Ue Alamiu, saru luminggeio pedandia-Do. 3#Pel. 22:20Mia atuu lumako mesomba a luwuno anu pinesombai susua ka menggolontu mesomba ndi onae, ke a mata oleo ke a wula ke a luwuno sorodadu i langi, mongkona anu Ku'ontoomo atuu. 4Tewala mongkona atuu pinauako ndi omiuke imerongeo, asalakono imemparesao temoiko. Tewala mentee ntu'u ka manasaomo nine anu mokoburu atuu wineweu i Isaraeli, 5asalakono imewawao tama ke beine anu moweweuomo wineweu mosa'o atuu meluarako a mpewowa langkai kota. Ka i'amba tama ke beine atuu asalakono winunoako watu ranta kai mate. 6#Pod. 35:30; Win. 19:15; Mat. 18:16; 2Kor. 13:1; 1Tim. 5:19; Ibr. 10:28Pompaudo orua ke otolu mia sakosii, mia anu hinuku mate asalakono kai mate; siimo ihinuku mate butu pompauno asa mia sakosii. 7#1Kor. 5:13Kaedomo luwuno sakosii atuu anu amba-ambano humuku mateo, domentondao luwuno palili. Kanatuumo asalakono impokotampulao anu mosa'o inso i olomiu.”

Pekara-kara anu lalu i wawono

17:8-13

8Tewala asa kara-kara pekalatia i kotamiu impemotungkoo lahi memputusio, kana mompepate-pinepate, motuntu-tinuntu, ke mobelai-binelai, asalakono imelako mpe'aro a mpo'ianga anu Ira binikio i Ue, Ue Alamiu. 9Asalakono imelako ndi ondae luwuno sando mpesomba, to lewi atuu, ka ndi puu mpobitara anu kongko i tempo atuu. Asalakono impesikeno ka ira mempauakomiu pomputusino songka. 10Ka i'amba omiu asalakono meweweuo montonda pinutusi anu pinaudo ndi omiu inso a mpo'ianga anu Ira binikio i Ue. Asalakono impetenunu meweweuo luwuno anu dotisoakomiu. 11Montonda pontiso anu doweeakomiu ka montonda pinutusi anu pinaudo ndi omiu, asalakono imeweweuo. Si mepansia i koana ke i manggali inso a pinutusi anu pinaudo ndi omiu. 12Mia anu kowee-wee ka nahi perorongeakono pauno sando mpesomba anu mentade i ra'ai gagi puu mpopekakaako-Do i Ue, Ue Alamiu, ke maupo pauno puu mpobitara, manasa mia atuu mate. Kanatuumo asalakono impokotampulao anu mosa'o inso i Isaraeli. 13Ka luwuno tongku atuu ira merongeo ka gagi medoito ka nahi ira mengkowee-wee mbo'u.

Songka mongkona mokole

17:14-20

14 # 1Sam. 8:5 Tewala mpewinso komiu ia wita anu Doweeakomiu i Ue, Ue Alamiu, ka impentorokio, saru mpo'ia i ra'ai, ka i'amba mpotae, ”Aku mompotoro mokoleku, kana luwuno tongku petengi-tengiku,” 15ka butu mokole anu bininiki-Do iUe, Ue Alamu, anu moiko upotoroo. Inso i olodo pepaekompomu asalakono impotoroo mokolemiu, sine si mpompotoro mia hawe anu komba pepaekompomiu. 16#1Mok. 10:28; 2Taw. 1:16; 9:28Polomokoa, mokole atuu si pokohadioo ngarano ka siwawa ira tongku andio mpekule i wita Masiri kai pohawe hadio ngara, hangano mepau Iramo i Ue ndi omiu, ”Osi'i ntu'u impekule lumaloo mbo'u sala andio.” 17#1Mok. 10:14-22, 27; 11:1-8; 2Taw. 1:15; 9:27Kasi tiangio hadiono kombiano, kasi pansia aroano. Osi'i mbo'u ipokohadioo lahi wulaano ka salakano.

18Tewala onae mentoro a ngkadera poparentaa, asalakono iburio tiano polimbano songka andio montonda wunta anu kongko ndi ondae luwuno sando mpesomba, to Lewi. 19Wunta atuu asalakono kongko i horino ka asalakono ibasao asa ntinuwuno, kai pepaguru doitoako Ira i Ue, Ue Alano, me'ini a luwuno songka ka pompakosi andio, kai weweuo. 20Bakanatuu, nahi ta mompelangka-langkai a luwuno pepaekompono ke pansia inso a parenta atuu i koana ke i manggali, kai tehine ipoparenta, onae, ka anano saru ana'ueno i tonga-tongado to Isaraeli.

Currently Selected:

Winali 17: XMZ

Highlight

Compare

Copy