2 Samueli 9

Pompehohawano i Daudi ndi Mepibose

9:1-13

1 # 1Sam. 20:15-17 Motae i Daudi, ”Da hinao ke mia anu tuwu inso i olono somborino i Saulu, ka kupopokitaakono pompehohawaku ndi onae hangano i Yonata?” 2A somborino i Saulu hinao asa ata meneeako i Siba. Onae pinoboi me'aro ndi Daudi, ka i'amba mesikeno ira mokole ndi onae, ”Omueke i Siba?” Sangkino, ”humbee miu ueku.” 3#2Sam. 4:4Dopotae mokole, ”Nami hina mbo'u ke mia susua anu da kongko inso a somborino i Saulu ka kupopokitaakono pompehohawa-Do Ue Ala?” Mepauomo i Siba ndi ondae mokole, ”Da hinao asa mia ana ntamano i Yonata, anu nahi pokompelempa.” 4Mesikeno ira mokole ndi onae, ”Isua'oke onae?” Sumangki i Siba ndi ondae mokole, ”Onae mo'ia i rahano i Makiri anano i Amieli, i kota Lodebari.”

5Ka i'amba mokole Daudi montena mia lumako umalao inso a rahano i Makiri anano i Amieli, i kota Lodebari. 6I Mepibose anano i Yonata, anano i Saulu hawe me'aro ka ipenggolontuu mesomba. Motae i Daudi, ”Mepibose!” Sumangki, ”Oo ueku.” 7Motae i Daudi ndi onae, ”Sii doito, nde ongkue asalakono aku mopokitao pompehohawaku ndi omue hangano amamu i Yonata. Aku mokuleo ndi omue luwuno lereno uemu i Saulu, ka omue, kowela mongkaa meronga saru ongkue.” 8Ka i'amba i Mepibose menggolontu ka ipotae, ”Hapamoke atamiu andio, ranta kai perioo dahu mate kana ongkue andio?”

9Ka i'amba mokole moboio i Siba, atano i Saulu ka ipotaeakono, ”Luwuno arataano i Saulu ka arataano somborino kupeweengakono a ana ueno, uemu. 10Asalakono witano ka u'anggaakono, omue ka luwuno anamu ka luwuno atamu. Asalakono ka unaao wuano, ka ihina koa kaangado ana uedo, uemu. I Mepibose, ana ueno, uemu atuu, ta mongkaa merongaakune mpiha.” Anano i Siba hopulu ka olima ira tama ka rua pulu ira atano. 11Motae i Siba ndi ondae mokole, ”Aku weweuo mengkena kana parentamiu ueku Mokole ndi ongkue.” Kanandiomo i Mepibose mongkaa merongaako ira mokole Daudi, kana anano mokole. 12Hinao asa ana ntamano i Mepibose anu da kodei neeno i Mika. Luwuno mia anu mpo'ia i rahano i Siba, onaemo atano i Mepibose. 13Gagi i Mepibose mo'ia i Yerusale, nde onae wela mongkaa merongaako ira mokole. Orua karuno tiimpa.

Currently Selected:

2 Samueli 9: XMZ

Highlight

Copy

Compare