2 Samueli 20

Pe'ewano i Seba

20:1-22

1 # 1Mok. 12:16; 2Taw. 10:16 I ra'ai hinao asa mia lambaha, meneeako i Seba anano i Bikiri, to Benami. Ipuurio tawuwua ka ipotae,

”Nahi tompohawe tia a poparentaano i Daudi.

Nahi tompohawe tia pusaka a inuleno i Isai.

Singge mia lumako a ngkemano, hei to Isaraeli!”

2ka do'amba luwudo to Isaraeli atuu mebintao i Daudi ka domentondao i Seba anano i Bikiri, sine to Yehuda mpentonda ira mpiha a mokoledo, inso i Koro Yarade hawe i Yerusale.

3 # 2Sam. 16:22 Haweomo i Daudi a langkanaeno i Yerusale, ka do'amba mokole umala ira hopulu samburuedo anu bininta umiangakono langkanae, ka i'amba winso ira a laro aasa raha i totono podagaia. Ipekaria ira, sine nahi pewowaliako ira. Mensinongi ira ka mentuwu kana tuwu beine hawe oleo mateado.

4Motae iramo mokole ndi Amasa, ”Pumpuakune to Yehuda larono otolu oleo andio, ka u'amba aiwa mbo'u ramai!” 5Ka i'amba lumakoomo i Amasa pumpu ira to Yehuda, sine iwela motuluo anggaa atuu ranta ka ilalo tempo anu dopakosiakono mokole. 6Ka i'amba mepauomo i Daudi ndi Abisai, ”Kanandio-andio i Seba anano i Bikiri lalu mompokomasola ndi ontae sekono i Abisalo. Gagi omue, wawa iramo atado uemu andio ka luluomo, kasi haweo kota anu mebente, ka bakanandio onae toola inso ndi ontae.” 7Ka i'amba i Yoabi, to Kereti ka to Peleti ka luwuno pongkiari mpeluarako tumonda lembuio. Mpeluarako ira inso i Yerusale ira meluluo i Seba anano i Bikiri.

8Tempono domehawe a watu langkai i Gibeoni, ka i Amasa haweomo se'elu i ra'ai sekono ondae. Tempo atuu i Yoabi mompokona sangka mpetea ka i bungkuno hinao sulepe saru ponai ipetampio. Mansano lumako i arono tedontaomo ponai atuu. 9Motaeomo i Yoabi ndi Amasa, ”Moi-moikoko koake pepaekompoku?” Kontongaano atuu kae ngkoanano i Yoabi uminio danggono i Amasa ta woo-wooo. 10I Amasa nahi tangkoroo ponai anu a ngkaeno i Yoabi atuu. I Yoabi metoboakono ponai atuu a kompono, ranta ka ite'uweti ihi kompono a wita. Siimo pendua itoboo, hangano mateomo. Ka i'amba i Yoabi ka i Abisai, uaino, motilalo lumuluo i Seba anano i Bikiri. 11Ka asa mia inso a luwuno miano i Yoabi kongko mentade i horino wata ngkoroi atuu, kai potae, ”Isema anu ineheno ndi Yoabi ka isema anu me'alaako ndi Daudi, moikoomo ipetonda ndi Yoabi!” 12I tempo atuu i Amasa tepombole mate a laro reano a ntonga nsala langkai. Mansano kumitao mia atuu, nine luwuno palili mpentade mpekita, onaemo ka iliahakono wata ngkoroino i Amasa inso a nsala langkai wawao a mpada, ka i'amba tumutuwiakono sawu i wawono, hangano ikitao, nine sompo mia anu hawe i ra'ai mpentade mpengkita. 13Mansano ipoko'olaio wata ngkoroi atuu inso a nsala langkai, onaemo ka dompelempa mpotilalo luwuno mia atuu tumondao i Yoabi lumako lumuluo i Seba anano i Bikiri. 14Ilaloomo i Seba luwuno witado suku Isaraeli tetutu i Abeli-Beti-Ma'aka. Ka luwuno to Bikiri mpepumpu iramo ka domentondao. 15Sine mehawe iramo luwuno miano i Yoabi, ka onae domengkaduo i Abeli-Beti-Ma'aka; mpohowu ira wita gagi benteno kota andio ka bente andio raangku hawe a bungkuno bente, ka luwuno palili anu mperongaakono i Yoabi mengkekeo benteno kota atuu ira merongkao.

16Ka i'amba mebooliomo aasa beine pande mompewowolo inso i kota atuu, ”Rongeo! Rongeo! Imempauakono i Yoabi: Perangkuhakomo ramai, nde aku mepauakomu.” 17Onaemo ka iperangkuhako i Yoabi a beine atuu. Mesikenoomo beine atuu, ”Omueke i Yoabi?” Sumangki i Yoabi, ”Mentee!” Motaeomo beine atuu ndi onae, ”Rongeomo pinauno atamiu andio!” Sumangki i Yoabi, ”Moiko!” 18Ka i'amba mepauomo beine atuu, ”I ndi'ipua wela ira mpotae mia, kanandio: Moikoomo mia mpo'ema pontiso i Abeli ka i Dani, nde lano pinahihiomoke 19hapa anu domempakosiomo mia anu mpetenunu i Isaraeli! Sine omue andio montoo mokoropuo aasa kota, tamoako lahi aasa kota tedoa moiko i Isaraeli. Tembio kau mingki mokoropuo luwu tia pusaka-Do i Ue?” 20Ka i'amba sumangki i Yoabi, ”Te'olai, te'olai inso ndi ongkue ba aku mokoropuo! 21Menteeano komba kanatuu teweweuno. Sine asa mia inso i mentorukuno Eparai, anu meneeako i Seba anano i Bikiri, itandeomo kaeno umewai ira mokole Daudi; ipeweengakonomo asa-asano, manasa akumo monsuka inso i kota andio.” Motaeomo beine atuu ndi Yoabi, ”Moiko, uluno ta pinetadiako ndi omue inso i bungkuno bente andio.” 22Ka i'amba mewinsoomo mbo'u beine atuu ka ipepau momoiko a luwuno palili. Umarino atuu dome'impahio uluno i Seba anano i Bikiri ka dompetadiakono ndi Yoabi. I Yoabi puurio tawuwua, ka i'amba ntesiarawo iramo mebintao kota atuu, singge melako a mpo'iangado. Mekuleomo i Yoabi i Yerusale ndi ondae mokole.

Pegawaino i Daudi

20:23-26

(2Sam. 8:15-18; 1Taw. 18:14-17)

23I Yoabi gagi petewawa a luwuno sorodadu Isaraeli, ka i Benaya anano i Yoyada gagi petewawado to Kereti ka to Peleti. 24I Adorami gagi petewawado mia pine'ata mpo'angga ka i Yosapa anano i Ahiludi gagi puu pompekaria arataa. 25I Seya gagi puu mpoburi a poparentaa. I Sadoki ka i Abiata gagi sando mpesomba. 26I Ira mbo'u to Yaeri atuu gagi sando mpesombano i Daudi.

Currently Selected:

2 Samueli 20: XMZ

Highlight

Copy

Compare