2 Samueli 15
15
Pe'ewano i Abisalo
15:1-12
1Ba opia tempo lembuino i Abisalo mompatinda aasa kareta mpeteano saru ngara, ka lima pulu mia anu mpelulu i arono. 2Damo'oru i Abisalo ta mewangu ka mentade i wiwi nsala tetutu a mpewowa langkai. Sompo mia anu hinao kara-karano ka ta mewinso tepohaweako ira mokole mo'ungke moleoa, mia atuu ipoboio i Abisalo. Onae ta mesikeno, ”Inso i kota isuake omue?” Tewala sumangki, ”Atamiu andio te'inso a nsuku Isaraeli anu andio,” 3ta motae i Abisalo ndi onae, ”Kitao, anu tinuntumu atuu tekona ka mentee, sine inso ndi ondae mokole nahina maupo te'asa mia anu behe merorongeakomu.” 4Motae mbo'u i Abisalo, ”Ba mansa ongkue pinotoro gagi puu mpobitara i wita andio! Gagi sompo mia anu teposisala ke ba hinao kara-karano mongkona gau, moiko i'aiwa ndi ongkue, ka aku moweeakono otumpau anu moleo.” 5Tewala asa mia merangkuhako ta menggolontu mesomba ndi onae, i Abisalo ta tumasiakono kaeno, i'inio mia atuu ka iwoo-wooo. 6Kanatuumo iweweuo i Abisalo a luwudo to Isaraeli anu ta mewinso tepohaweako ira mokole ta mo'ungke moleoa. Kanatuumo ipongko'alao i Abisalo aroado to Isaraeli.
7Pato nta'u lembuino i Abisalo mesikeno ndi ondae mokole, ”I'eheeakunemo lumako, ka ku'ihiio tinangaku anu kudandiomo ndi Ondae i Ue i Heberoni. 8Hangano tempono da kupo'ia i Gesuri, i Arami, atamiu andio montangaomo, kanandio: Tewala Omiu UeIpokule aku ntu'u i Yerusale, asalakono aku moweweu pesomba ndi Omiu.” 9Dopotae mokole ndi onae, ”Lakomo temoiko.” Ka i'amba i Abisalo lumako i Heberoni.
10Kontongaano atuu, i Abisalo montena tinena rahasia a luwuno suku Isaraeli saru pe'oliwi, ”Tewala imerongeomo unino tawuwua, impeboolimo: I Abisalo gagiomo mokole i Heberoni!” 11Perongano i Abisalo anu lumako rua etu mia inso i Yerusale. Me'inolu ira ka melako maupo nahi domporerengkoo, ka nahi domento'orio luwuno atuu.
12Tempono ta mompesombaako pesomba, i Abisalo umoluo i Ahitopeli, to Gilo, puu mpopatuduno i Daudi, aiwa inso i Gilo, kotano. Morosoomo tepo'asaa umewa atuu ka kohadi-hadiono palili tumondao i Abisalo.
I Daudi molai inso i Yerusale
15:13-37
13Asa mia puu mpowawa lele aiwa ndi Daudi, ipotae, ”Aroado to Isaraeli te'alaakoomo ndi Abisalo.” 14Ka i'amba motae i Daudi a luwuno pegawaino anu kongko saru onae i Yerusale, ”Aiwa tompolai ba nahi kita mentola inso ndi Abisalo. Impontuturakomo melako, kasi ronga tumonda lembui kita ka isolangi kita ka inangiakono ponai kota andio!” 15Luwuno pegawaido mpotaeako ira mokole, ”Po'ehemiumo koa mokole! Luwuno atamiu andio mpepatinda!” 16ka i'amba meluarako iramo mokole dotonda ira luwuno pe'asa rahano, sine hopulu samburuedo dobinta ira mokole umiangakono langkanae. 17Ondae mokole meluarako domentondao luwuno miano. Mpenaa-naa ira ia raha anu pokotompa. 18Luwuno pegawaino mpelempa melaloo, kanatuu koa mbo'u to Kereti ka to Peleti. Kanatuu koa mbo'u to Gati nomo etu mia hadiono, anu lano mentondao mompu'u i Gati, mpelempa lumalo ira mokole.
19Mesikeno iramo mokole ndi Itai, to Gati, ”Tembio ka upelempa mbo'u saru omami? Pekule ka po'iamo saru mokole, hangano omue mia hawe, ka i'amba mbo'u omue mia tinadi inso a mpo'ianga insoamu. 20Da indiawi uhawe, kana'umpemo a oleo andio aku wawako melakopi meronga saru omami, kontongaano asalakono aku lumako nahi kuto'orio ba isua. Pekulemo ka wawa ira mbo'u luwuno pepaekompomu. Po'ineeomo Ondae i Ue mopokitao pompehohawa ka pokongkomi-Do ndi omue!” 21Sine i Itai sumangki ira mokole, ”A nee-Do i Ue anu tuwu ka a ntuwumiu ueku mokole, isua ipo'ia ueku mokole, moiko tuwu maupo mate, i tu'ai mbo'u atamiu andio.” 22Moteomo i Daudi ndi Itai, ”Ba kanandio, potilalomo pelempa.” Ka i'amba telaloomo i Itai, to Gati, saru luwuno miano ka luwuno pe'etuno. 23Luwuno inia mia mpengese meroku, tempono luwuno bawaa atuu ntelalo. Ondae mokole sumakio koro Kidironi ka luwuno bawaa atuu mpelempa tetutu i pada one.
24Ka hinaano, i Sadoki mbo'u kongko i ra'ai saru luwudo to Lewi puu mpontande Burua Pedandia-Do Ue Ala. Domenaao Burua Pedandia-Do Ue Ala ranta luwuno bawaa inso i kota umari mpesakiako. I Abiata mbo'u metonda. 25Ka i'amba motae iramo mokole ndi Sadoki, ”Wawaomo Burua Pedandia-Do Ue Ala pokuleo i kota. Tewala mohawe aku pompehohawa a pongkita-Do i Ue, Ira koa wawa aku mekule, ranta aku koa wali kumitao saru po'iangano mbo'u. 26Sine tewala mepau Ira, ’Nahi Kupekonako,’ mepatinda akumo, po'ineeomo Doweweuo ndi ongkue hapa anu moiko a pongkita-Do.”
27Motae ira mbo'u mokole ndi sando mpesomba Sadoki. ”Uto'oriomoke? Pekulemo temoiko i kota saru anamiu, i Ahima'asi anamu ka i Yonata anano i Abiata. 28To'oriomo, aku koa mesikori umpeda a luwuno po'ianga pesakia lumako i pada one, ranta kai hina lele anu pauakune inso ndi omue.” 29Ka i'amba i Sadoki ka i Abiata wawao Burua Pedandia-Do Ue Ala mokuleo i Yerusale ka dopo'ia i ra'ai.
30I Daudi morake a Pongku Wita Saitu kontongaano mengese, uluno mesoumbu ka ipelempa nahi pe'empehi karu. Luwuno palili anu mentondao mpesoumbu ira luwu, mporake kontongaado mpengese. 31Ndi Daudi pinauako kanandio, ”I Ahitopeli kongko i olodo mia anu ntepo'asaakono i Abisalo.” Motaeomo i Daudi. ”Siimo Ipokogagio patuduno i Ahitopeli atuu, oo Ue.”
32Mansano hawe i Daudi a punsuno, a mpo'iangado mia mpenggolontu mpesombai Ira Ue Ala, tengkitaomo i Husai, to Araki, tumotowoo melemba teberi ka wita a wawo uluno. 33Motae i Daudi ndi onae, ”Tewala kotumonda aku, te'ingka kogagi bebeatiku. 34Sine tewala mekuleko i kota ka upepau ndi Abisalo: Ongkue andio atamiu, oo mokole. Mompu'u i ndi'ipua ongkue atado amamiu ka kanandio-andio aku gagi atamiu. Bakanandio komokobalio patuduno i Ahitopeli hangano ongkue. 35Kombake i sando mpesomba Sadoki ka sando mpesomba Abiata saru omue i ra'ai? Luwuno anu rinongemu inso i langkanaeno mokole, asalakono kau pauakono sando mpesomba Sadoki ka i Abiata. 36Pewowoloomo, saru ondae i ra'ai kongko orua ira anado, i Ahima'asi anano i Sadoki ka i Yonata anano i Abiata. Molalo ondae, asalakono ime'oliwio ndi ongkue luwuno anu rinongemiu.”
37Kanandiomo i Husai, sambe'eno i Daudi hawe i Yerusale tekonai i Abisalo mewinso i kota atuu.
Currently Selected:
2 Samueli 15: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
