2 Samueli 13

I Aminoni sumolangio i Tamari

13:1-22

1Umari atuu gagiomo tegagia andio. I Abisalo, ana ntamano i Daudi hinao asa uaino anu tekosi, neeno i Tamari. I Aminoni, ana ntamano i Daudi mekokonoo. 2Aroano i Aminoni tedoa masusa ranta kai mahaki hangano i Tamari, pepaekompo awono. Nde, onae da ana beine ka montonda pinewowolono i Aminoni tedoa motungko ipoweweu hapamokoa ndi onae. 3I Aminoni hinao sambe'eno neeno i Yonada, anano i Simea, pepaekompono i Daudi. I Yonada asa mia anu tedoa pande. 4Ipotaeakono i Aminoni, ”Hei ana mokole, tembio kau tedoa masusa sompo mo'oru? Tembio ka nahi upauo ndi ongkue?” Motae i Aminoni ndi onae, ”Kupekokonoo i Tamari, uaino i Abisalo, pepaekompoku.” 5Motaeomo i Yonada ndi onae, ”Pepombolemo a mpoturiamu ka pompemaha-mahaki. Tewala haweomo amamu melungaiko, asalakono pauako ira: I'eheakono i Tamari, uaiku aiwa ka ipaka aku. I'eheakono mompatinda kaanga i aroku, ka kukitao ka iposumpuakune kaanga.”

6Umari atuu mepomboleomo i Aminoni ka ipompemaha-mahaki. Mansado hawe mokole melungaio, motaeomo i Aminoni ndi ondae mokole, ”I'eheakono i Tamari uaiku aiwa moweweu ba te'opia kukisi i aroku, ka isumpuakune.” 7Ka i'amba i Daudi me'oliwiakono i Tamari i rahano, ”Lakomo i rahano i Aminoni, pepaekompomu ka patindaakonomo kaanga.” 8Lumakoomo i Tamari i rahano i Aminoni, pepaekompono, anu tekonai mepombole. I'alaomo tarigu sinalo, ka ipisikio, moweweu kukisi i arono ka itunuo. 9Umarino atuu mo'alaomo kawali ka inaao ihino i arono i Aminoni. Sine i Aminoni nahi behe mongkaa ka ipotae, ”Tena iramo luwu mia mpeluarako binta aku.” Ka do'amba mpeluarako luwuno mia mebintao. 10Ka i'amba motae i Aminoni ndi Tamari, ”Wawaomo kaanga atuu a laro bolongko, ka kusangkao inso a ngkaemu.” I Tamari umalao kukisi anu wineweuno atuu, ka iwawao i bolongko ndi Aminoni pepaekompono. 11Tempono ana beine atuu mompatindaakono ka ipongkaa, i'inio moroso ana beine atuu ka ipotaeakono, ”Aiwamo poturi ndi ongkue, uaiku.” 12Sine ipotaeakono, ”Osi'i aka! Si solangi aku, nde gau anu kanandio nahi moiko i wineweu a nto Isaraeli. Si weweuo anu mosa'o andio. 13Isuamo kuwawao rupaku? Omue ko kinita kana mia anu mosa'o i Isaraeli. Gagi pauako iramo mokole, manasa ira koa uminduo meweengako aku ndi omue.” 14Sine, i Aminoni nahi perorongeakono pinauno. Hangano morosoopo sekono onae, ranta ka isolangio. 15Ka i'amba i Aminoni tedoa umo'aliaakono. Tendeano o'aliaa anu pimembasaino langkaiopo sekono pompekokono anu pinembasaino. Motae i Aminoni ndi onae, ”Pewangumo! Polaimo!” 16Motaemo ana beine atuu ndi onae, ”Si kanatuu, nde tumena aku lumako laluaopo mosa'ono sekonopo anu umari wineweumu ndi ongkue.” Sine i Aminoni nahi perorongeakono. 17Ipoboio ata anu mekakaakono ka ipotae, ”Tenaomo beine andio lumako inso i aroku ka kunsiomo pewowa i bungkuno.” 18Beine atuu mompokona lemba rahi anu tedoa tekosi; nde lano kanandiomo luwuno anado mokole anu da ana beine wela pompokona lemba rahi. Ka i'amba puu pompekakaako atuu sumaario meluarako ka ikunsio pewowa i bungkuno. 19Ka i'amba i Tamari monaa awu a ntoro'uluno ka iberio lemba rahi pinokonano anu tedoa tekosi. Inaao kaeno a ntoro'uluno ka ilako monsabangi tedoa meroku.

20Mesikeno i Abisalo pepaekompono, ndi onae, ”Nde i Aminoni, pepaekompomu atuu, ipewowaliakomumo? Kanandio-andio uaiku perodo-rodomo. Nde komba pepaekompomu ke onae? Kasi hangano atuu gagi pewowoloamu.” Ka i'amba i Tamari mo'ia asa-asano i rahano i Abisalo. 21Mansano rumongeo i mokole Daudi hapa anu gagi atuu tedoaomo tekuda. 22I Abisalo nahi pauakono i Aminoni mongkona hapamokoa, anu moiko ke anu mosa'o. Sine i Abisalo umo'aliakono i Aminoni, hangano i solangio i Tamari, uaino.

I Aminoni pinepate, i Abisalo molai

13:23-39

23Orua nta'u umarino atuu, i Abisalo mogonti wulu bimba i Baala-Hasori, umpeda i Eparai. Onaemo ka i'olu ira i Abisalo luwuno ana ntamado mokole. 24I Abisalo me'aro ndi ondae mokole ka ipepau, ”Atamiu andio kontongaano mogonti wulu bimba. Po'ineeomo omiu mokole ka luwuno pegawaimiu aiwa merongaakune.” 25Sine ondae mokole motae ndi Abisalo, ”Naahi anaku, siimo kimelako luwu, kasi kimpokomasusako.” I Abisalo medada, sine ondae mokole nahi dobehe lumako ka butu ira uminduo. 26Onaemo ka ipotae i Abisalo, ”Tewala kanatuu, i'eheakonomo i Aminoni, pepaekompoku, lumako saru omami.” Dosangkio mokole, ”Hapa tuduno ba ilako merongaakomu?” 27Sine mansano idadaio I Abisalo, i Daudi umeheakono i Aminoni ka luwuno ana ntamado mokole lumako saru onae.

28Ka i'amba i Abisalo parenta ira miano kanandio, ”Pepenteeomo! Tempono aroano i Aminoni mawongko hangano anggoro, ka aku mepau ndi omiu: Tunduhiomo i Aminoni ka pepateo. Si medoito, kombake ongkue anu parentako? Pokorosoo aroamiu ka imegagimo mosia!” 29Luwuno miano i Abisalo domeweweuo i Aminoni kana anu iparentaako ira i Abisalo. Ka i'amba luwuno ana ntamado mokole singge mia mesawi a bagalino ka dompolai.

30Tempono da mekongko ira a laansala, lele hawe ndi Daudi: I Abisalo mepate iramo luwu anado mokole, nahina maupo te'asa mia anu tola. 31Ondae mokole meberisakono sangkado ka dopepombole a horo. Luwudo pegawaido mpentade i tu'ai ka sangkado teberi. 32I Yonada anano i Simea, akano i Daudi, mepau, potaeno, ”Si ko'aro-aroa nine luwuno mia mongura, ana ntamado mokole atuu, mempinepate iramo. Butu i Aminoni anu mate, nde mongkona atuu gagiomo pompakosi aroano i Abisalo mompu'u i Aminoni sumolangio i Tamari, uaino. 33Gaagi, siimo ueku mokole i pompewowolo nine luwuno ana ntamamiu mokole memate iramo. Butu i Aminoni anu mate.”

34I Abisalo molai. Tempono mia anu tekonai medaga mengkikita, ikitaomo hadio mia mehawe inso i Horonai ihorino pongku wita. 35Motae i Yonada ndi ondae mokole, ”Kitao, luwudo ana ntamamiu mokole me'aiwa! Menteeomo kana anu pinauno atamiu.” 36Da'iapo i'umari mepau, mehawe iramo ana ntamado mokole atuu. Mpengese ira meroku. Mokole mbo'u ka luwuno pegawaino mpengese ira tedoa meroku.

37 # 2Sam. 3:3 I Abisalo molaiomo lumako ndi Talamai anano i Amihuri, mokoledo to Gesuri. I Daudi tehine ipompemasusa hangano anano atuu. 38Kanatuuumo polaino i Abisalo lumako i Gesuri ka mo'ia i ra'ai otolu nta'u tehineno. 39Luuntuomo tekudado mokole ndi Abisalo, hangano nami dopompemasusa mbo'u hangano mateno i Aminoni.

Currently Selected:

2 Samueli 13: XMZ

Highlight

Copy

Compare