2 Mokole 23

Pesomba ipokowo'ohuo i Yosia

23:1-30

(2Taw. 34:3-7; 35:1-27)

1Umarino atuu mokole montena mia pumpu ira luwuno mia memota'u i Yehuda ka i Yerusale. 2Ondae mokole lumako a raha-Do i Ue meronga luwuno to Yehuda ka palili i Yerusale, luwuno sando mpesomba, luwuno nabi, ka luwuno palili, inso anu kodei hawe anu langkai. I arodo ibasaako ira luwuno pauno Wunta Pedandia anu hinawe a raha-Do i Ue atuu. 3Ka i'amba mokole mentade umpeda a ngkaru raha pesombaa ka moweweu pedandia i aro-Do i Ue ta tumonda Ira i Ue, mekariao luwuno parenta-Do, atora-Do ka pompakosi-Do a tompaano aroa ka tompaano sumanga, ka umihiio pau pedandia anu teburi a wunta atuu. Luwuno palili mengkorahakono pedandia atuu.

4 # 2Mok. 21:3; 2Taw. 34:4 Ondae mokole parentao sando mpesomba langkai Hilikia, luwuno sando mpesomba i totono ka luwuno puu mpodagai pewowa ka domeluarakono inso a raha-Do i Ue luwuno parewa anu wineweuako i Ba'ala, i Asera ka luwuno sorodadu langi. Ka i'amba tumunuo luwuno atuu a ntonga mpada Kidironi i bungkuno kota Yerusale, ka awuno winawa i Beteli. 5Ipokompenaa-naa ira sando mpesomba lahumoa anu dompotoro iramo luwuno mokole i Yehuda ka dompotunu pesomba a luwuno pongku wita pesombaa a luwuno kota i Yehuda ka a mpetengi-tengino Yerusale, luwuno mbo'u mia anu mpotunu pesomba ndi Ba'ala, a dewa mata oleo, a dewa wula, a luwuno pehowuno anano wula ka luwuno sorodadu langi. 6Luwuno karuno pelahumoa inso a raha-Do i Ue winawa i bungkuno kota Yerusale, a ngkorono mo'are Kidironi, ka i'amba tinunu i tu'ai ka pinokomotutu gagi awu. Ka i'amba metadiakono awuno a wawo ngkaburudo palili i totono. 7Irongka ira bolongko pebelesua pelahumoa anu kongko a raha-Do i Ue, po'iangado beine puu mpohoru sawu pompesombaia i Asera. 8Luwuno sando mpesomba inso a luwuno kota i Yehuda itena ira me'aiwa, ka i'amba mokoburutio luwuno pongku wita pesombaa po'iangado sando pesomba atuu mpotunu pesomba, inso i Geba hawe i Bereseba. Ihoa ira mbo'u luwuno pongku wita pesombaa a luwuno pewowa langkai anu umpeda a nsala mewinso a mpewowa langkai Yosua, anu pabawa i kota atuu, anu kongko imanggali ba ipewinso mia a mpewowa langkai i kota atuu. 9Sine luwuno sando mpesombano luwuno pongku wita pesombaa atuu nahi moiko dompewuatako a meda pontunua pesomba-Do i Ue i Yerusale, sine moiko koa dompokaa roti anu nahi peragi i olono luwuno pepaekompodo. 10#Ima. 18:21; Yer. 7:31; 19:1-6; 32:35Ipokoburutio mbo'u Topeti anu kongko i lembono Beni-Hinomi, kasimo dompesombaakono mia anado tama ke beine gagi pesomba a laro api ndi dewa Moloki. 11Ipetadiako ira ngara anu ninaado luwuno mokole i Yehuda tiano dewa mata oleo a mpewowa mewinso a raha-Do i Ue, umpeda bolongkono i Natani-Meleki, pegawai langkanae anu mo'ia a raha langkai i horino. Kareta dewa mata oleo mbo'u itunuakono api. 12#2Mok. 21:5; 2Taw. 33:5Dopobangkuo mokole luwuno meda pontunua pesomba anu kongko a wawo ato, anu wineweudo luwuno mokole i Yehuda, a mpe'angi-angiano i Ahasi ka luwuno meda pontunua pesomba anu wineweuno i Manase a orua kintalano raha-Do i Ue. Ondae mokole rumawoo i ra'ai, ka i'amba awuno pinetadiako a ngkorono mo'are Kidironi. 13#1Mok. 11:5; 7Ondae mokole mokoburutio luwuno pongku wita pesombaa anu kongko i sabaano oleo Yerusale i selatano Pongku wita Tekalea ka anu winanguno i Salomo mokole i Isaraeli, tiano i Asitore, mokoburua anu pinesombaido to Sidoni, ka tiano i Kamosi, mokoburua anu pinesombaido to Moabi, ka tiano i Milikomi, pontataa anu pinesombaido to Amoni. 14Luwuno tugu pelahumoa ipuro-puroo ka luwuno karuno pelahumoa ituehio, ka i'amba po'ianga atuu buke ihowuiakono wukuno mia.

15 # 1Mok. 12:33 Ipobangkuo mbo'u meda pontunua pesomba i Beteli, po'ianga pompesombaia anu wineweuno i Yerobea anano i Nebati anu poko'ariano to Isaraeli mpoweweu hala. Meda pontunua pesomba ka po'ianga pompesombaia mbo'u atuu ipobangkuo. Luwuno watuno ipehao ka ipokomotutuo gagi awu, ka i'amba tumunuo karuno lahumoa. 16#1Mok. 13:2Mansano mewolili i Yosia, ikita ira kaburu i ra'ai a pongku wita atuu. Ka i'amba tumena ira mia me'alao luwuno wuku inso a ngkaburu atuudo, tumunu ira a wawo meda pontunua pesomba ka mokoburutio, menunu saru pau-Do i Ue anu ipebooliakonomo tetenaa-Do Ue Ala anu mohaweo luwuakoano andio. 17#1Mok. 13:30-32Ipotae, ”Hapake tondonino kaburu anu kinitaku andio?” Mia a ngkota atuudo mesangkio, ”Onaemo atuu kaburudo tetenaa-Do Ue Ala anu me'aiwa inso i Yehuda ka mpebooliakono luwuakoano anu uweweuomo a meda pontunua pesomba i Beteli andio.” 18Ka i'amba motae, ”Po'ineeomo atuu, si hina maupo te'asa mia dumanggi ira wukuno!” Gagi dompo'inee ira wukuno ka luwuno wukudo nabi anu me'aiwa iramo inso i Samaria atuu.

19I Yosia moko'olaio mbo'u luwuno raha pompesombaia i luwuno kota Samaria anu wineweudo luwuno mokole i Isaraeli ranta mokotesingkao tekuda-Do i Ue. A luwuno raha mpelahumoaa andio iweweuo mengkena kana anu wineweuno i Beteli. 20Isumbele ira sando mpesomba a luwuno po'ianga pompesombaia anu kogko i ra'ai i wawono luwuno meda pontunua pesomba atuu ka tumunu ira wukudo mia iwawono. Ka i'amba mekule i Yerusale.

21Ka i'amba mokole meparenta a luwuno tongku atuu, ”Imeweweuomo porame-ramea Pasa-Do i Ue, Ue Alamiu, kana anu teburi a Wunta Pedandia andio!” 22Hangano Pasa kanatuu nami riname-rame mbo'u mompu'u tempono dompoparenta puu mpobitara a nto Isaraeli ka i larono poparentaado luwuno mokole i Isaraeli ka i Yehuda. 23Sine i larono ta'u kohopulu ka oalu poparentaano mokole Yosia, ka i'ambapo Pasa-Do i Ue andio riname-rame i Yerusale.

24I Yosia mokotampula ira puu pompoboi onitu ka luwuno anu mpongkita anu ta gagi, saru mbo'u tinaha terapimi, luwuno lahumoa ka luwuno pinesombai mokoburu anu tengkita i wita Yehuda ka i Yerusale, anu tinoono umihiio pauno songka Taura anu teburi a wunta hinaweno sando mpesomba Hilikia a raha-Do i Ue. 25Se'eluno onae nahina mokole kana onae anu mepokule ndi Ondae i Ue a tompaano aroano ka tompaano tinuwuno ka saru tompaano rosono, menunu saru luwuno Taurano i Musa. Umarino onae nahina mbo'u me'umbaako mokole kana onae. 26Sine Ondae i Ue nahi bali inso a ntekuda-Do anu langkai, anu tensila a nto Yehuda hangano luwuno wineweuno i Manase anu mokotesingkao tekuda-Do. 27Ka i'amba mepau Ira i Ue, ”To Yehuda mbo'u Aku lumiahako ira inso i aro-Ku kana Kuliahako ira to Isaraeli, ka nahi Aku tumarimao Yerusale, kota anu bininiki-Ku andio, ka raha andio, maupo mepau Akumo: Nee-Ku ta mo'ia i ra'ai!”

28Anu susuano inso a nteweweuno i Yosia ka luwuno anu wineweuno, kombake luwuno atuu teburi a wunta tutuludo mokole i Yehuda? 29I tempo poparentaano, lumakoomo i Pirao Neko, mokoledo to Masiri umewaio mokoledo to Asuri i wiwi ngkoro Eparata. Mokole Yosia lumako umaropio, sine mansano kumitao, i Pirao tumangkarako mepateo i kota Migido. 30Luwuno pegawaino me'ulao wata ngkoroino a ngkadera inso i kota Migido ka mewawao i Yerusale. Ka do'amba mengkaburuo a ngkaburuno onaeno. Ka i'amba palili i wita atuu melako me'alao i Yoahasi anano i Yosia. Dome'urapio gagi mokole umeuo amano.

I Yoahasi mokole i Yehuda

23:31-35

(2Taw. 36:1-4)

31Tinuwuno i Yoahasi rua pulu ka otolu nta'u tempono igagi mokole ka otolu wula tehineno ipoparenta i Yerusale. Neeno ineno i Hamutali anano i Yeremia inso i Libina. 32Onae moweweu anu mosa'o a pongkita-Do i Ue, mengkena kana anu wineweudo uempu'uno. 33I Pirao Neko umukoo i Ribela i wita Hamati, kasi pokopoparenta i Yerusale. I Pirao mopotebiakono wita atuu denda anu langkaino asa etu talenta salaka ka hopulu talenta wulaa. 34#Yer. 22:11-12I Pirao Neko motoroo i Eliakimi anano i Yosia, gagi mokole umeuo i Yosia, amano ka umeuo neeno gagi i Yoyakimi. Sine iwawao i Yoahasi saru onae i wita Masiri ka i Yoahasi mate i ra'ai. 35I Yoyakimi mompowee wulaa ka salaka atuu ndi Pirao. Sine mo'ala sima'ulu inso i wita atuu kai pokopompowee doi atuu, menunu saru petenano i Pirao. Wulaa ka salaka atuu isingao inso a mpalilino wita, inso a sompo mia montonda hadiono sima'uluno anu ta wineeako i Pirao Neko.

I Yoyakimi mokole i Yehuda

23:36–24:7

(2Taw. 36:5-8)

36 # Yer. 22:18-19; 26:1-6; 35:1-19 Tinuwuno i Yoyakimi rua pulu ka olima nta'u tempono igagi mokole ka hopulu ka asa nta'u tehineno ipoparenta i Yerusale. Neeno ineno i Sebuda anano i Pedaya inso i kota Ruma. 37Onae moweweu anu mosa'o a pongkita-Do i Ue, mengkena kana anu wineweudo uempu'uno.

Currently Selected:

2 Mokole 23: XMZ

Highlight

Copy

Compare