2 Mokole 2

I Elia tinande i suruga

2:1-18

1Tempono Ondae i Ue Ira tumandeo i Elia i suruga a laro angi melompiu, i Elia ka i Elisa tekonai a laro pelempaa inso i Giliga. 2Motaeomo i Elia ndi Elisa, ”Po'iamo i ndi'ai, hangano Ondae i Ue tumena aku lumako i Beteli.” Sine sumangki i Elisa, ”A nee-Do i Ue anu tuwu ka a ntumuwumiu, nahi aku binta komiu.” Ka do'amba lumako i Beteli. 3Bawaado nabi anu kongko i Beteli mpeluarako ntepohaweakono i Elisa ka dompotae ndi onae, ”Uto'orio koake nine a oleo andio uemu Ira tumandeo i Ue inso i aromu?” Sangkino, ”Humbee, kuto'orio koa, siimo impepau mbo'u!” 4Motae i Elia ndi onae, ”Elisa, po'iamo i ndi'ai, hangano Ondae i Ue tumena aku lumako i Yeriko.” Sine sumangki, ”A nee-Do i Ue anu tuwu ka a ntumuwumiu nahi aku bintakomiu.” Ka i'amba hawe iramo i Yeriko. 5Bawaado nabi anu kongko i Yeriko merangkuhio i Elisa ka dompotaeakono, ”Uto'orio koa ke nine a oleo andio uemu Ira tumandeo i Ue inso i aromu?” Sumangki, ”Humbee, kuto'orio koa, siimo impepau mbo'u!”

6Motae i Elia ndi onae, ”Po'iamo i ndi'ai, hangano Ondae i Ue tumena aku lumako i koro Yarade.” Sumangki, ”A nee-Do i Ue anu tuwu ka a ntumuwumiu, nahi aku binta komiu.” Ka do'amba motilaloakono pelempaado. 7Lima pulu mia inso a bawaado nabi atuu mpelempa, ka do'amba mpenaa-naa ola-olai inso ndi ondae, kontongaado mentade orua ira i wiwi ngkoro Yarade. 8I Elia umalao lemba meloeno, ikaluluo ka ipesepiakono a wawo uwoi atuu. Tetiaomo uwoi atuu i apano anu asa ka i apano anu susua, ka i'amba orua ira mesakiako a wita anu motu'i. 9#Win. 21:17Sahawedo i asatowa, i Elia motaeakono i Elisa, ”Emaomo hapa anu aku mokoweweuoakomu, se'eluno napi kutinande inso i aromu.” Sumangki i Elisa, ”Po'ineeomo kupe'ueo orua ntia inso a mpabawa tiano nabi.” 10Motae i Elia, ”Omue mo'ema anu motungko. Sine tewala upokokitao ku'inala inso ndi omue, mongkona atuu ta gagi ndi omue, tewala naahi, mongkona atuu nahi ta gagi.” 11Kontongaado melempa mpiha ka dopepau-pau, borono kareta me'api ka ngara me'api hawe monsia ira, ka i Elia mewuatako i suruga a laro angi melompiu. 12#2Mok. 13:14Mansano kumitao i Elisa anu gagi atuu, onae mebooli, ”Amaku, amaku! Karetado to Isaraeli ka luwuno anu mpesawi a ngarano!” Ka i'amba nami kitao mbo'u. Irakuo sangkano kai berio tepe'orua. 13Umarino atuu ibinio lemba meloeno i Elia anu tedontaomo, ka i'amba mekule ka ipentade i wiwi ngkoro Yarade. 14I'alao lemba meloeno i Elia anu tedontaomo atuu, ipesepiakono a wawo uwoi kai pebooli, ”Isua Komiu ke Ue Alano i Elia?” Tempono ipesepiakono a wawo uwoi, uwoi atuu tetia i apano anu asa ka i apano anu susua, ka i'amba mesakiakoomo i Elisa. 15Tempono bawaado nabi inso i Yeriko atuu mengkitao inso olai, mpotae ira, ”Pabawano i Elia melimba ndi Elisa.” Me'aiwa ira ntepohaweakono ka dompenggolontu ndi onae ra'ido hawe a wita.

16Mpotae ira ndi onae, ”Kitao! I olodo atamiu andio hinao lima pulu tama anu moroso ka mosia. Po'ineeomo ka domelako me'ungkeo uemiu ba mansa Penaa-Do i Ue tumandeo ka metadiakono a asa wawono torukuno ke a asa lembono.” Sumangki i Elisa, ”Siimo tena ira melako!” 17Sine domedadaio mpiha ranta kai te'o'ondaha. Ka i'amba motae, ”Tena iramo ka domelako!” Domentena ira lima pulu mia atuu melako. Mia andiodo mpepo'ungke i larono otolu oleo, sine nahi domehaweo i Elia. 18Mansado mpekule ndi Elisa anu da mo'ia i Yeriko, ipotaeako ira, ”Kombake umariomo kupauakomiu: Si melako?”

I Elisa weweuo uwoi i Yeriko gagi moiko

2:19-22

19Mpotae iramo palili i kota atuu ndi Elisa, ”Menteeano po'iangano kota andio moiko, kana ikitao ueku, sine uwoino mosa'o ka witano nahi mewalo.” 20Sangkino, ”Alaakunemo asa mangko wo'ohu ka naaomo ohia i larono.” Domewawaomo mangko atuu ndi onae. 21Ka i'amba lumako a mata uwoi ka ipetadiakono ohia atuu i larono kai potae, ”Kanandiomo pau-Do i Ue: Kuweweuomo uwoi andio moiko, ranta nami ta mowawa matea ke nahi ta mompoko bita beine.” 22Kanandiomo uwoi atuu gagi moiko hawe oleo andio menunu saru pau anu ipohaweomo i Elisa.

Luwuno anano i Beteli mpopodeu-deuo i Elisa

2:23-25

23Inso i ra'ai i Elisa lumako i Beteli. Tempono onae tekonai melempa mewuatako, nana'ote inso i kota atuu mpeluarako mpopodeu-deuo, ”Londa ulu, mewuatako! Londa ulu, mewuatako!” Peboolido ndi onae. 24Onae ka ipewolili i bungkuno ka mansano kumita ira, itotonaa ira a nee-Do i Ue. Ka i'amba meluarakoomo orua berua inso a ntobu, ka i'amba doberi-berio pato pulu ka orua ira nana'ote inso ndi ondae. 25Inso i ra'ai onae lumako i torukuno Karameli, ka i'amba mekule i Samaria.

Currently Selected:

2 Mokole 2: XMZ

Highlight

Copy

Compare