2 Tawarika 8
8
Mperupa-rupa inanggano i Salomo
8:1-18
(1Mok. 9:10-28)
1Rua pulu nta'u lembuino umariomo i Salomo wanguo raha-Do i Ue ka langkanaeno onaeno. 2Ka i'amba i Salomo wali wanguo luwuno kota anu iweeakono i Hurami ndi onae, ka tumena ira to Isaraeli merodo i ra'ai. 3Ka i'amba i Salomo lumako i Hamati-Soba ka numangio. 4Onae mbo'u wali wanguo Tadimori i pada one ka luwuno kota ponaapa kaanga anu winanguno i Hamati. 5Onae wali wanguo Beti-Horoni Wawono ka Beti-Horoni Totono gagi kota bente anu merere watu, hinao pewowa langkaino ka melanso, 6saru mbo'u Baalati ka luwuno kota ponaapano kaanga i Salomo, luwuno kota po'iangano kareta, luwuno kota po'iangado sorodadu mpengara ka luwuno anu ineheno wanguo i Salomo i Yerusale, i torukuno Libano, ke ia luwuno wita pinabawaino. 7Luwuno mia anu da tebinta inso a nto Heti, to Amori, to Perisi, to Hewi ka to Yebusi, luwuno anu nahi tewinso to Isaraeli, 8onaemo inuledo luwuno tongku anu da tebinta i wita atuu ka nahi domensolangi ira to Isaraeli, ondaemo anu pinarentano i Salomo gagi puu mpo'angga medinadai hawe oleo andio. 9Sine, inso i olodo to Isaraeli nahina anu pine'atano i Salomo a anggaano. Ondae megagi sorodadu, petewawa a luwuno anu mantande potorono, ke tadulako sorodadu mpekareta ka sorodadu mpegara.
10Ndiomo luwuno petewawado puu mpodagai mia mpo'angga anu bininikido mokole Salomo: rua etu ka lima pulu mia anu moparenta palili.
11I Salomo lumimbao anano i Pirao inso i kota Daudi a raha anu iwanguakono, hangano ipotae, ”Kombiaku nahi moiko ipo'ia a langkanaeno i Daudi, mokole i Isaraeli, hangano luwuno po'ianga anu umariomo ipewinsokio Burua-Do i Ue atuu mempori.”
12Ka i'amba i Salomo mesombaakono luwuno pesomba tinunu ndi Ondae i Ue a wawo meda pontunua pesomba anu winanguno i arono tambino Raha Mempori, 13#Pel. 23:14-17; 34:22-23; Pod. 28:9–29:39; Win. 16:16menunu saru hapa anu pinakosi gagi pesomba a sompo oleo, montonda parentano i Musa, onaemo ia oleo Saba, ia wula wo'ohu, ka pentolu asa nta'u a luwuno oleo langkai andio: oleo langkai Roti Nahi Peragi, oleo langkai Opitu Minggu, ka oleo langkai Laika Lewe Ngkeu. 14Menunu saru po'atorano i Daudi, amano, ipakosio bawaado sando mpesomba a mpo'anggaado, ka luwuno to Lewi a anggaa mpenaniako po'unde-unde ka mpoweweu pesomba i arodo luwuno sando mpesomba montonda anu tinantui sompo oleo; kanandio koa mbo'u a sompo bawaado puu mpodagai pewowa langkai. Hangano kanandiomo parentano i Daudi, tetenaa-Do Ue Ala. 15Nahi domepansia inso a parentano mokole mongkona luwuno sando mpesomba ka to Lewi a laro luwuakoano, ka mbo'u mongkona ponaapa arataa. 16Luwuno inanggano i Salomo gagi, inso a oleo ipinonaako empehino raha-Do i Ue hawe ka i'umari. Kanandio umariomo raha-Do i Ue.
17Ka i'amba i Salomo lumako Esioni-Geberi ka i Eloti i wiwi ntahi, i wita Edomi. 18Molalo luwuno pegawaino i Hurami umoliwio ndi onae luwuno kapala ka luwuno pegawai anu meleleo iramo a ntahi. Meronga luwuno pegawaino i Salomo, melako ira i Opiri ka inso i ra'ai dome'alao pato'etu ka lima pulu talenta wulaa, ka do'amba mewawao ndi mokole Salomo.
Currently Selected:
2 Tawarika 8: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
