2 Tawarika 5

1 # 2Sam. 8:11; 1Taw. 18:11 Umariomo luwuno anggaa anu wineweuno i Salomo tiano raha-Do i Ue. Ka i'amba i Salomo winsoo luwuno sangka memporino i Daudi, amano, ka numaao salaka, wulaa ka luwuno parewa atuu inaao a laro mponaapa arataano raha-Do Ue Ala.

PORONSOA RAHA MEMPORI

LAMORO 5:2–7:10

Burua pedandia linimba

5:2–6:2

(1Mok. 8:1-13)

2 # 2Sam. 6:12-15; 1Taw. 15:25-28 I tempo atuu i Salomo tumena ira luwuno mia memota'u i Isaraeli ka luwuno petewawa suku, luwuno petewawa pepe'etuado to Isaraeli mpepumpu i Yerusale ka domewawao Burua pedandia-Do i Ue inso i kota Daudi, onaemo Sioni. 3Tepumpu iramo luwu to Isaraeli i arodo mokole ia oleo langkai wula ko'opitu. 4Mansano mehawe iramo luwu mia memota'u Isaraeli, luwuno to Lewi mentandeo Burua atuu. 5Domewawao Burua atuu, Kema Tepotowoa ka luwuno parewa mempori anu kongko i larono Kema atuu. Luwuno atuu domewawao sando mpesomba ka to Lewi. 6Mokole Salomo ka luwuno bawaa Isaraeli anu mpepumpu iramo i arono, mpentade i arono Burua atuu ka mpopesombaako asa bawaa bembe bimba ka sapi anu nahi pinokodoa ka nahi pinokopau hadiono. 7Ka i'amba luwuno sando mpesomba mewawao Burua pedandia-Do i Ue atuu a mpo'iangano, a bolongko i larono ntu'u raha atuu, a mpo'ianga tedoa mempori, i totono panido kerubi. 8Gagi Kerubi atuudo wileo orua panino i wawono po'iangano Burua atuu, ranta kerubi atuudo borungio Burua saru luwuno keu ponselano inso i wawono. 9Luwuno keu ponsela atuu ondau ntu'u. Tapuno tengkita inso a mpo'ianga mempori anu i larono bolongko i larono ntu'u atuu, sine nahi tengkita inso i bungkuno. I tu'aimo po'iangano hawe oleo andio. 10#Win. 10:5Nahina maupo hapa i larono Burua atuu sangkadio orua watu anu ninaano i Musa i larono, i torukuno Hore, po'ianga-Do i Ue mowutu pedandia saru to Isaraeli i tempono dompeluarako inso i wita Masiri.

11Umarino atuu luwuno sando mpesomba mpeluarako inso a mpo'ianga mempori. Luwuno sando mpesomba anu kongko i tempo atuu mpepokomempori iramo, nahi domentondao pepotudano singge bawaa. 12Luwuno puu mpenani to Lewi, onaemo i Asapi, i Hemani, i Yedutuni saru luwuno nana'ote ka luwuno pepaekompono, luwuno mpentade i sabaano oleo meda pontunua pesomba, mpesangka lena alusu ka saru simbali, gambusu ka katapi, meronga asa etu ka rua pulu sando mpesomba puu pompuuri napiri. 13#1Taw. 16:34; 2Taw. 7:3; Esr. 3:11; Pud. 100:4-5; 106:1; 107:1; 118:1; 136:1; Yer. 33:11#Pel. 40:34-35Luwuno puu pompuuri napiri ka luwuno puu mpenani atuu mperonga-ronga mpoporongeo suarado dompenaniako po'unde-unde ka pontarimakasi ndi Ondae i Ue. Mpenani ira meroku saru napiri, simbali ka luwuno parewa mpenani umunde-unde Ira i Ue, ”Hangano moiko Ira! Menteeano anu nahina tampulaano pompehohawa-Do.” Ka i'amba raha mbo'u atuu raha-Do i Ue, bukeako seru. 14Sando mpesomba atuu nahi dompokompentade mpoweweu pesombaa hangano seru atuu, hangano maramba-Do i Ue buketio raha-Do Ue Ala.

Currently Selected:

2 Tawarika 5: XMZ

Highlight

Copy

Compare